މި އަހަރުގެ މިހާތަނަށް 198 މިލިޔަން ރުފިޔާ މަސްވެރިންނަށް ދޫކޮށްފައިވާ ކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮންޕެނީ ލިމިޓެޑް (މިފްކޯ)އިން ހާމަކޮށްފިއެވެ.
މިއީ މަސްވެރިން އަތުން މިފްކޯއަށް ގަނެފައިވާ މަހަށް، މިފްކޯއިން އަގުގެގޮތުގައި ދޫކޮށްފައިވާ ފައިސާއެވެ. މިދުވަސްވަރަކީ ޢާންމުގޮތެއްގައި ރާއްޖޭގެ މަސްވެރިކަން ރަނގަޅު ދުވަސްވަރެކެވެ. ޚާއްސަކޮށް ދެކުނުގެ މަސްވެރިކަން ރަނގަޅެވެ.
މަސްވެރިން ބާނާ މަސް، މަސްވެރިކަން އެންމެ ރަނގަޅު ދުވަސްވަރު ނުކިރޭ މައްސަލަ އަބަދުވެސް މަސްވެރިން ފާހަގަކުރެއެވެ. އަދި މަސް ކިރުވާފައި ދޭންޖެހޭ ފައިސާ ނުދީ ލަސްވާ މައްސަލަވެސް މަސްވެރިން ފާހަގަކުރެއެވެ. ޒަމާންވީ މިމައްސަލައަށް ޙައްލެއް ހޯދުމަށް މިފްކޯއިން އަންނަނީ ފަހަކަށްއައިސް ގިނަ މަސައްކަތްތަކެއް ކުރަމުންނެވެ. އެކަންކަމުގެ ރަނގަޅު ނަތީވެސް އަންނަނީ ފެންނަމުންނެވެ.
މިފްކޯއިން ހާމަކޮށްފައިވާގޮތުގައި މިދިޔަ އަހަރުވެސް އެކުންފުނިން ވަނީ މަސްވެރިންނަށް 1 ބިލިޔަނަށްވުރެ ގިނަ ރުފިޔާ ދޫކޮށްފައެވެ. އެއީ މިފްކޯގެ ފާއިތުވެދިޔަ 12 އަހަރުދުވަހުގެ ތާރީޚުގައިވެސް އެންމެ ގިނަ ޢަދަދަކަށް މަސްވެރިންނަށް ފައިސާ ދޫކުރި އަހަރުކަމަށް މިފްކޯއިން ބުނެއެވެ. ބައެއް މީޑިއާރަކަށް މަޢުލޫމާތުދެއްވަމުން މިފްކޯގެ ސީއީއޯ އިސްމާޢީލް ފައުޒީ ވިދާޅުވެފައިވަނީ މިއަހަރުގެ މިހާ ހިސާބަށް އައިއިރު 12000 ޓަނުގެ މަސް މިފްކޯއަށް ގަނެފައިވާކަމަށެވެ. އަދި 198 މިލިޔަން ރުފިޔާ މަސްވެރިންނަށް ދޫކޮށްފައިވާކަމަށެވެ.
