އެމްޑީޕީގެ އުސޫލުތަކާ ޚިލާފަށް ވާހަކަދެއްކުމާއި ނިޒާމުގެ ތެރެއިން މެމްބަރުންގެ އަޣުލަބިއްޔަތުން ނިމިފައިވާ ކަންކަމާމެދު ސުވާލުއުފައްދައި ދެކޮޅު ހައްދަވާތީ ރައީސް ނަޝީދު ޕާޓީގެ މަޤާމުތަކުން އިސްތިއުފާދެއްވުމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހީމް ޝަރީފް (މަވޯޓާ) ނުސީދާކޮށް ގޮވާލައްވައިފިއެވެ.
ނަޝީދުގެ ނަން ވިދާޅުނުވެ މަވޯޓާ ވިދާޅުވެފައިވަނީ އެމްޑީޕީގެ ލީޑަރޝިޕްގައި ހިމެނޭ ބައެއް ބޭފުޅުންނަށް، ޕާޓީގެ މެމްބަރުންގެ އަޣުލަބިއްޔަތުން ނިންމާ ނިންމުންތަކާ ދެކޮޅުހަދައި ޕާޓީގެ އަސާސީ ޤަވާޢިދާ ކަނޑައެޅިގެން ދެކޮޅުހަދަމުން މަޤާމުގައި ދެމިތިބެވިދާނެތޯ ސުވާލު އުފެދޭކަމަށެވެ. އަދި އެންމެ ރަނގަޅު ގޮތަކީ މަޤާމުން އިސްތިއުފާދެއްވުންކަމަށެވެ.
Ufedhey suvaaleh MDP ge leadership ga himeney baeh beyfulhunnah party ge memberun ge aghlabiyyathun nimmaa nimmun thakaa dhekolhu hadhaa party ge asaasee gavaaidhaa kada elhigen dhekolhu hadhamun magaamuga dhemi thibevi dhaane tho? Ragalhu gothakee magaamun isthiufaa dhevvun
— Ibrahim Shareef (@AdduShareef) February 16, 2023
މަވޯޓާ ރައީސް ނަޝީދުގެ ނަން ވިދާޅުނުވިޔަސް އޭނާ އެއިޝާރާތްކުރައްވަނީ އެމަނިކުފާނަށް ކަމަށް ބެލެވެއެވެ. ނިމިދިޔަ އެމްޑީޕީގެ ރިޔާސީ ޕްރައިމެރީ ޤަބޫލުފުޅު ނުކުރައްވައި ނަޝީދު އަންނަނީ ސަރުކާރާ ދެކޮޅަށް އެކިމަސައްކަތް ކުރައްވަމުންނެވެ. އަދި އެމްޑީޕީގެ ސެކްރެޓޭރިއަޓަށް ބަހުގެ ޙަމަލާތައް ދެއްވައި ސެކެރެޓޭރިއަޓުގެ ނިންމުތައް ބޮލާލައިޖަހަމުންނެވެ.
ރިޔަސީ ޕްރައިމެރީ ކާމިޔާބުކުރެއްވި ރައީސް ޞާލިޙަށް ޓިކެޓުއެރުވުން ހުރުދުވަހުގެރޭ އޮންނާނެއެވެ. އެކަމާދެކޮޅަށް ކޯޓަށް ވަޑައިގަތުމަށް ނަޝީދު ފެކްޝަނުގެ މެމްބަރަކު ވަނީ ނިންމާފައެވެ. ރިޔާސީ ޓިކެޓް ހަވާލުކުރުން ހުޓުވާ ދިނުމަށާއި، އަދި އެޕާޓީގެ ރިޔާސީ ޕްރައިމަރީ އަލުން ބާއްވާ ދިނުމުގެ ވަގުތީ އަމުރެއް ހޯދުމަށް، ޕޮލިސް ބޯޑުގައި ހިމެނިވަޑައިގަންނަވާ، އަދި އެމްޑީޕީގެ ކުރީގެ އިންޓަރނޭޝަނަލް ސްޕޯލްސްޕާރސަން ހާމިދު އަބުދުލް އަފޫލު ސިވިލް ކޯޓަށް މައްސަލަ ހުށަހަޅުއްވާފައިވެއެވެ.
