ޔުއެފާ ޗެމްޕިއަންސް ލީގުގެ ގަދަ 16 ގެ ފުރަތަމަ ލެގުގައި ޕީއެސްޖީއާ ދެކޮޅަށް ކުޅުނު މެޗު ބަޔާން މިއުނިކުން ކާމިޔާބުކޮށްފިއެވެ.
ޕީއެސްޖީގެ ދަނޑުގައި ކުޅުނު މިމެޗް ބަޔާނުން ކާމިޔާބުކުރީ އެއްލަނޑު ސުންލަނޑުންނެވެ. ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ބަޔޭންއިންނެވެ. މިމެޗްގައި ޕީއެސްޖީ ފެނިގެންދިޔައީ ހީކުރިވަރަށް ވުރެ އާދައިގެ ގޮތަކަށެވެ. މިގޮތުން އެޓީމްގެ ވަރުގަދަ ކުޅުން މިމެޗްގައި ދެެއްކޭގޮތެއްނުވިއެވެ.
މިމެޗަށް ނިކުންއިރު ކުރިއަށް ކުޅޭ ދެކުޅުންތެރިންކަމަށްވާ ލިއޮނެލް މެސީ އާއި ކިލިއަން އެމްބާޕޭ އަނިޔާއިން އެނބުރި އައިސް ޓީމާއި ގުޅިފައިވީ ނަމަވެސް އެންމެ ރަނގަޅަށް ފިޓްކަމަކަށް ނުދެއްކިއެވެ. މިގޮތުން މެސީ ފުރަތަމަ އެގާރައިގާ ހިމެނުނު ނަަމަވެސް އެމްބާޕޭ ކުޅެންއަރުވާފައިވަނީ ދެވަނަ ހާފްގައެވެ.
މިމެޗްގައި ބަޔޭންއިން ޖެހި ހަމައެކަނި ލަނޑު މެޗްގެ 53 ވަނަ މިނެޓްގައި ޖަހާދިނީ ފަރަންސޭސިވިލާތަށް ނިސްބަތްވާ އަދި ކުރީގެ ޕީއެސްޖީގެ ކުޅުންތެރިޔާ ކިންގްސްލީ ކޯމަންއެވެ. ކޯމަންއަކީ މިދެޓީމް މީގެ ތިން އަހަރު ކުރިން މިމުބާރާތުގެ ފައިނަލްގައި ވާދަކުރި ފަހަރުވެސް ލަނޑު ޖަހާދިން ކުޅުންތެރިޔާއެވެ.
މިކާމިޔާބީއާއެކު ބަޔޭންއަށް މިހާރު މިވަނީ ކްއާޓަރ ފައިނަލަށް ކުރަމުންދާ އުންމީދު ބޮޑުވެފައެވެ. އެއީ ދެޓީމްގެ މެދުގައި މިއަންނަ މަހު ކުޅޭ ދެވަނަ ލެގް ކުޅުމަށް ހަމަޖެހިފައިވަނީ ބަޔޭންގެ ދަނޑުގައި ކަމަށްވާތީއެވެ. ނަމަވެސް އެއްލަނޑު ސުންލަނޑުގެ ނަތީޖާއަކީ ޕީއެސްޖީއަށްވެސް އަނބުރާނުލެވޭވަރުގެ ނަތީޖާއެއް ނޫންކަމުން އެޓީމަށްވެސް ކްއާޓަރ ފައިނަލްގެ ފުރުސަތު އަދި ނުގެއްލެއެވެ.
