ކުރިޔަށް އޮތް ރިޔާސީ އިންތިޚާބަށް ކޯލިޝަނެއް ހައްދަވައިގެން، އެމްޑީޕީ ރިޔާސީ ޓިކެޓްގައި ނިކުންނެވުމަށް ރައީސް ސާލިހު ތައްޔާރުވެ ވަޑައިގަންނަވަމުން ގެންދެވިނަމަވެސް، ރައީސް ސާލިހުގެ ފަހަތްޕުޅަށް ގާސިމް އިބުރާހިމް ނާރުއްވާނެކަމުގެ "100 ޕަސެންޓް" ޔަގީންކަން އެބައޮތް ކަމުގައި، އެމްޑީޕީގެ ރިޔާސީ ޕްރައިމަރީން ބަލިވި، އެޕާޓީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ނަޝީދު މިގެން ވިދާޅުވެފައިވަނީ އެމްޑީޕީގެ އެހާރާއި މިހާރުގެ މަޖިލިސް މެމްބަރުން ތިއްބަވާ ވަޓްސްއަޕް ގުރޫޕަކަށް ފޮނުއްވި މެސެޖެއްގައެވެ. މި މެސެޖެޖުގައި ނަޝީދު ވިދާޅުވެފައިވަނީ މިފަހަރުގެ ރިޔާސީ އިންތިޚާބު ވެގެންދާނީ ރާއްޖޭގެ ވެރިކަމަށް ވަޑައިގަތުމަށް ގާސިމަށް ލިބިގެންދާނެ ރަނުގެ ފުރުސަތަކަށް ކަމުގައެވެ.

ނަޝީދުގެ ވާހަކަތަކަށް ރައްދު ދެއްވަމުން ރައްޔިތުންގެ މަޖިލިހުގެ އައްޑޫ މަރަދޫ ދާއިރާގެ މެމްބަރުން އިބުރާހިމް ޝަރީފު ވިދާޅުވީ، 2008 ވަނަ އަހަރު ގާއިމް ކުރެވުނު އެމްޑީޕީގެ ފުރަތަ ވެރިކަމުގައި، އޭރުގެ ސަރުކާރާއެކު ކޯލިޝަން ހަދައިގެން ގާސިމްއަށް ކުރެވުނީ ހިތި ތަޖުރިބާއެއް ކަމަށާއި، އޭރު ވެރިކަމުގައި ހުންނެވީ ނަޝީދު ކަމުގައެވެ.

ޝަރީފްގެ ވާހަކައަށް ރަށްދު ދެއްވަމުން ނަޝީދު ވިދާޅުވީ ގާސިމާއެކީ މީގެކުރިން އެމްޑީޕީން ކޯލިޝަން ހަދާފައިވާނީ އެ ޕާޓީގެ ގައުމީ މަޖިލިހުން ގަރާރެއް ފާސްކޮށްގެން ކަމަށާއި، އޭގެއިން ޝަރީފަށް އެނގިވަޑައިގަންނަވާނީ ވަރަށް ކުޑަ މިންވަރެއް ކަމުގައެވެ. އަދި ނަޝީދު ވިދާޅުވީ ރައީސް ސާލިހުގެ ފަހަތަށް މިފަހަރު ގާސިމް އަރުއްވާނެ އެއްވެސް ގޮތެއް ނެތްކަމުގައެވެ.

ނަޝީދުގެ ވާހަކައަށް ރަށްދު ދެއްވަމުން ޝަރީފު އިތުރަށް ވިދާޅުވެފައިވަނީ ސިޔާސީ ގޮތުން ނަޝީދު މިހާރު ދައްކަވާ ވާހަކަފުޅުތަކަކީ ދިމާނުވާ ވާހަކަފުޅުތަކެއް ކަމަށާއި، އޭގެ ހެއްކަކީ ނިމިދިޔަ އެމްޑީޕީގެ ރިޔާސީ ޕްރައިމަރީ ކަމުގައެވެ. އަދި ޕްރައިމަރީގެ ނަތީޖާ، ނަޝީދަށް ރައްދެއްވަމުން ޝަރީފް ވަޓްސްއަޕް ގުރޫޕުގައި ހިއްސާވެސް ކުރައްވާފައި ވެއެވެ.

އެހެންނަމަވެސް ނަޝީދު ވިދާޅުވީ، ރައީސް ސާލިހުގެ އަރިހުގައި ތިއްބެވި މެމްބަރުންނަށް ރައީސް ސާލިހަށް އޮޅުވާލެއްވުނު ނަމަވެސް، ރައްޔިތުން ދެކޭގޮތް ވަރަށްވެސް ތަފާތު ކަމަށާއި، ކުރިޔަށް އޮތް ރިޔާސީ އިންތިޚާބުގައި ރައީސް ސާލިހަށް ލިބިވަޑައިގަންނަވާނޭ ނަތީޖާ ފާއިތުވި ޕްރައިމަރީގައި ހާމަކުރައްވާފައި ވާނޭކަމުގައެވެ.

ކުރިޔަށް އޮތް ރިޔާސީ އިންތިޚާބުގައި ރައީސް ސާލިހަށް ތާއީދު ނުކުރައްވާނޭކަމުގައި، އެމްޑީޕީގެ ރިޔާސީ ޕްރައިމަރީން ބަލިވުމަށްފަހުވެސް ނަޝީދު ގެންދަވަނީ ވިދާޅުވަމުންނެވެ. އެއަށްފަހު ނަޝީދުވަނީ، ރިޔާސީ ޕްރައިމަރީގައި ގެންގުޅުއްވި ކެމްޕޭން ޝިއާރު ކަމުގައިވާ "ފިކުރެއްގެ ދިރުން" ޝިއާރުގެ ނަމުގައި އެމްޑީޕީގެ އެތެރޭގައި ވަކި ސިޔާސީ ހަރަކާތެއް ފެއްޓެވުމަށް މަސައްކަތް ކުރައްވަމުންނެވެ.

ގިނަ ބަޔަކު ބުނަމުންދަނީ ނަޝީދުގެ މަގުސަދަކީ ރައީސް ސާލިހަށް ކުރިޔަށް އޮތް ރިޔާސީ އިންތިޚާބު ކާމިޔާބުވިޔަ ނުދިނުމެވެ.