މި އަހަރުގެ ރިޔާސީ އިންތިހާބަށް ޖުމްހޫރީ ޕާޓީ (ޖޭޕީ)ގެ ނިންމާ ނިންމުން ބަރޯސާވާ އެޕާޓީގެ ޤައުމީ ޖަލްސާ މިމަހުގެ 23 އިން 26 އަށް ބޭއްވުމަށް ނިންމައިފިއެވެ.
ޖުމްހޫރީ ޕާޓީން މިއަދު ބޭއްވި އެޕާޓީގެ ކައުންސިލް ބައްދަލުވުމުގައި ވަނީ ޤައުމީ ޖަލްސާ މިމަހުގެ 23 އިން 26 އަށް ދަރުބާރުގޭގައި ބާއްވަން ނިންމާފައެވެ. ޖުމްހޫރީ ޕާޓީގެ ލީޑަރު ޤާސިމް އިބްރާހިމް ރިޔާސަތު ބެލެހެއްޓެވި މިބައްދަލުވުމުގައި ކައުންސިލްގެ ގިނަ މެމްބަރުން ވަނީ އެބޭފުޅުންގެ ޝުއޫރު ފާޅުކޮށް ޕާޓީގެ ކުރިމަގާއިމެދު ދެކޭ ގޮތެއް ހާމަ ކުރައްވާފައެވެ.
މިއަދުގެ ބައްދަލުވުމުގައި ގައުމީ ޖަލްސާ ބާއްވާނެ ތާރީހެއް ކަނޑައެޅުމުގެ އިތުރުން އެޕާޓީގެ އަސާސީ ގަވާއިދާއަށް ހުށަހެޅުނު ބައެއް އިސްލާހުތަކާއިމެދުވެސް ވާހަކަ ދައްކާފައިވެއެވެ. ޖޭޕީގެ ސެކެރެޓިއޭޓުން ވަނީ ޕާޓީގެ ލީޑަރުގެ މަޤާމު އުވާލައި، ޕާޓީގެ ރައީސަކު އިންތިޚާބު ކުރާގޮތަށް އިސްލާހު ހުށަހަޅާފައެވެ. މިއިސްލާހާއިމެދު ގޮތެއް ނިންމާނީ ގައުމީ ޖަލްސާގައި ބައިވެރިވާ މަންދޫބުންގެ ވޯޓުންނެވެ.
ޖުމްހޫރީ ޕާޓީ އުފެދުނީއްސުރެ އެ ޕާޓީގެ ލީޑަރުގެ މަގާމު ފުރުއްވަނީ، މާމިގިލީ ދާއިރާގެ މެމްބަރު ގާސިމް އިބްރާހީމެވެ. ސިޔާސީ އެންމެ އިސް މަގާމުގެ ގޮތުގައި އޭނާ ހުންނަވާއިރު އިދާރީ ގޮތުން އެންމެ އިސް ބޭފުޅަކީ ޖުމްހޫރީ ޕާޓީގެ ރައީސެވެ. ދެން ތިއްބަވަނީ ނައިބު ލީޑަރުންނެވެ.
ރާއްޖޭގައި ތިން ވަނައަށް އެންމެ ބޮޑު ސިޔާސީ ޕާޓީގެ ކޮންގްރެސް ފަށަން ތައްޔާރުވެފައި އޮތް އިރު މިއަހަރުގެ ރިޔާސީ އިންތިހާބާ މެދު ގޮތެއް އަދި ނުނިންމައެވެ. ރިޔާސީ ކެންޑިޑޭޓަކު ނެރެގެން ވަކިން ވާދަކުރާނީތޯ ނުވަތަ ސަރުކާރު ކޯލިޝަނާ އެކު ކުރިއަށްދާނީތޯ އިއުލާނެއް ނުކުރެއެވެ.
ޖުމްހޫރީ ޕާޓީގެ ހުރިހާ އިންތިޚާބީ މަޤާމުތަކަށް މީހުން ހޮވައި ޤައުމީ މަޖިލީހުގެ ޖަލްސާގައި އެޕާޓީގެ ކައުންސިލް އިންތިޚާބުކުރާނެއެވެ. ޖޭޕީން ބުނީ، އަލަށް އިންތިޚާބުވާ ކައުންސިލްގެ ފުރަތަމަ ޖަލްސާގައި، ރިޔާސީ އިންތިޚާބުގައި ވާދަކުރުމާމެދުވެސް ގޮތެއް ނިންމާނެކަމަށެވެ. ޖޭޕީން ބުނީ ޤައުމީ ޖަލްސާއަށް ވާންޖެހޭ ހުރިހާ އިދާރީ ތައްޔާރީތަކެއް މިހާރު ނިމިފައިވާކަމަށެވެ.
ސިޔާސީ ޕާޓީތަކުގެ ދަފްތަރުގައިވާ ގޮތުން ތިންވަނަ އަށް އެންމެ މެމްބަރުން ގިނައީ ޖުމްހޫރީ ޕާޓީގައެވެ. އެޕާޓީގެ މެމްބަރުންގެ އަދަދީ 17913އެވެ.
ކޮމެންޓު ފޮނުވާ