ރައްޔިތުންގެ މަޖިލީހުގެ ޖަލްސާގައި މެމްބަރުން ކުރާ ސުވާލުތަކަށް ޖަވާބު ދެއްވުމުގައި ގާބިލްކަން އސެއްފަރާތް ކުރައްވައި ތެދުބަހުން ޖަވާބު ދެއްވުމަށް މަޖިލިސް ރައީސް މުހައްމަދު ނަޝީދު ޕްލޭނިން މިނިސްޓަރު މުހައްމަދު އަސްލަމްގެ ކިބައި އެދިވަޑައިގެންފިއެވެ.
މަޖިލީހުގެ މިއަދު ޖަލްސާގައި އަމީނީ މަގުގެ މަސައްކަތާއި ގުޅޭގޮތުން ކުރެވުނު ސުވާލުގެ ޖަވާބާއި، އަދި އެހެން މެމްބަރުން ކުރައްވަމުންދިޔަ ސުވާލުތަކަށް ޖަވާބު ދެއްވުމުގައި މިނިސްޓަރ އަސްލަމް ދައްކަވާ ވާހަކަތަކާއި މެދު ކަންބޮޑުވެ ވަޑައިގެން ރައީސް ނަޝީދު ވިދާޅުވީ އަސްލަމް ވާހަކަ ދައްކަވާއިރު މީހާގެ ގާބިލްކަން ދެއްކެވުމަކީ މުހިންމު ކަމެއް ނޫންކަމަށެވެ.
މަޖިލީހުގައި ޖަވާބު ދެއްވާއިރު މުހިންމު ތެދުބަހުން މެމްބަރުން ކުރައްވާ ސުވާލުތަކަށް ޖަވާބު ދެއްވުންކަމަށާއި، ވަށައިގެން އެހެން ވާހަކަތަކެއް ދެއްކެވުމަކީ މުހިންމު ކަމެއް ނޫންކަމަށެވެ.
އިއްޒަތްތެރި ވަޒީރު. ޖަވާބު ދިނުމުގައި ތެދު ޖަވާބު ސާފުކޮށް ދެއްވީމާ ނިމުނީ. މަނިކުފާނުގެ ގާބިލުކަން މިކަމުގެ ތެރެއަށް ވަނުން އެއީ އެހާ ބޭނުންތެރި ކަމެއްނޫން.
– ނަޝީދު ވިދާޅުވިއެވެ.
ނަޝީދުގެ ވާހަކަތަކާއި ގުޅިގެން މިނިސްޓަރ އަސްލަމް ވިދާޅުވީ އޭނާ މަސައްކަތް ކުރަނީ މަޖިލީހުގެ މެމްބަރުން ކުރައްވާ ސުވާލުތަކަށް އޭނާގެ ގާބިލްކަން ހުރި މިންވަރަކުން ޖަވާބު ދެއްވުންކަމަށެވެ. ނަޝީދު އެފަދައިން ވިދާޅުވުމުން ދެން އަސްލަމް ވިދާޅުވީ ނަޝީދުގެ ވާހަކަތައް ރައްދު ދޭން ދެން ބޭނުންވެ ވަޑައިނުގަންނަވާ ކަމަށެވެ.
އިއްޒަތްތެރި ރައީސް އަޅުގަނޑު ނެތިން ތިވިދާޅުވި އެއްޗަކަށް ރައްދެއް ދޭން. އަޅުގަނޑު މަސައްކަތް ކުރާނީ އަޅުގަނޑުމެން ގާބިލްކަން ހުރި މިންވަރަކުން މިތަނުގައި ޖަވާބުދެވޭތޯ.
– މިނިސްޓަރ އަސްލަމް ވިދާޅުވިއެވެ.
މަޖިލީހަށް އަސްލަމް ހާޒިރުކުރެވޭ ގިނަ ދުވަސްތަކުގައި މަޖިލީހުގެ ރައީސާއި، އަސްލަމާއި ދެެމެދު ބަހުގެ ހަމަލާތައް ބަދަލު ކުރެއެވެ. އާންމުކޮށް މަޖިލިސް ރައީސް ކަންބޮޑުވުން ފާޅު ކުރަނީ އަސްލަމް ސުވާލާއި ނުގުޅޭ ވާހަކަ ދައްކާތީއެވެ.
