ފްރާންސް ލީގު އެއް ވަނައިގައި އޮތް ޕީއެސްޖީން ރޭ ފަހަތުން އަރައި 2-1 އިން ތޫލޫސް ބަލިކޮށްފިއެވެ.
ޕެރިހުގައި ކުޅުނު ރޭގެ މެޗުން ޓުލޫސް އިން ވަނީ 20 ވަނަ މިނިޓްގައި ބްރާންކޯ ވެން ޑެން ބޫމަން، ހިލޭ ޖެހުމަކުން ޖެހި ގޯލުން ލީޑުނަގައިފައެވެ. ބޫމަން ފޮނުވާލި ހިލޭ ޖެހުން ގޯލަށް ވަނީ ޕީއެސްޖީން އަޅާފައި ހުރި ދިފާއީ ފާރުތެރެއިން ގޮހެވެ. ޕީއެސްޖީގެ ގޯލްކީޕަރު ޖިއަންލުއީޖީ ޑޮންނަރުންމާ އަށް އެ ބޯޅަ ހުއްޓުވަން މާ ބޮޑު ކަމެއް ނުކުރެވުނެވެ.
އަނިޔާގެ ސަބަބުން، ކީލިއަން އެމްބާޕޭ އާއި ނޭމާ ނުލައި، ޕީއެސްޖީން މި މެޗުގައި ކުޅުނުއިރު، އެ ޓީމުން ނަތީޖާ ހަމަހަމަކުރީ މެޗުގެ 38 ވަނަ މިނިޓްގައި ފުލްބެކް، އަޝްރަފް ހަކީމީ ޖެހި ގޯލުންނެވެ. މިއީ ކާލޮސް ސޮލެއާ ދިން ބޯޅައަކުން އޭރިއާބޭރުން ގޯލުގެ ދުރު ކަނަށް ބޯޅަ ފޮނުވާލައިގެން ހަކީމީ ޖެހި ގޯލެކެވެ. އޭގެ ކުރިން ނަތީޖާ ހަމަހަމަކުރެވޭތޯ ޕީއެސްޖީން ކުރި ގިނަ އެޓޭކްތަކެއް ދިޔައީ ކާމިޔާބުނުވެއެވެ.
މެސީ، ޕީއެސްޖީ މޮޅުކޮށްދިން ގޯލު ޖެހީ 58 ވަނަ މިނިޓްގަ އެވެ. ހަކީމީ ތަނަވަސްކޮށްދިން ފުރުސަތެއްގައި މެސީ ވަނީ އޭރިއާބޭރުން ގޯލުގެ ކައިރީ ކަނަށް ބޯޅަ އަމާޒުކޮށްލައިފަ އެވެ. މިއީ ލީގުގައި މެސީ ޖެހި 10 ވަނަ ގޯލެވެ. ސީޒަނުގެ ޖުމްލަ އަކީ 15 ގޯލެވެ.
މި ނަތީޖާއާ އެކު ޕީއެސްޖީން ލީގުގެ އެއް ވަނައިގައި އޮތީ އަށް ޕޮއިންޓުގެ ލީޑަކާ އެކުއެވެ. ޕީއެސްޖީ، އެއް ވަނައިގައި އޮތީ 22 މެޗުން 54 ޕޮއިންޓާ ހޯދައިގެންނެވެ. ދެ ވަނައިގައި އޮތް މާސޭ އަށް ވަނީ 21 މެޗުން 46 ޕޮއިންޓް ލިބިފައެވެ.
