މިއަދުންފެށިގެން، ކުރިޔަށް އޮތް ނޮވެމްބަރުމަހާ ހަމައަށް އެމްނިކުފާނު ކުރައްވާން އޮތް ބޮޑު މަސައްކަތަކީ އޮމާންކަމާއެކީ ވެރިކަން ބަދަލުކުރުމުގެ މަސައްކަތް ކަމުގައި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު މިކަން ހާމަ ކުރެއްވީ މިރޭ ދިވެހި ޗެނަލަށް ދެއްވި ޚާއްސަ އިންޓަވިއުއެއްގައެވެ.
ދިވެހި ޗެނަލްގައި ވާހަކަ ދައްކަވަމުން ނަޝީދު ވިދާޅުވީ އެމަނިކްފާނު އެދިވަޑައިގަންނަވަނީ ދިވެހި ހުރިހާ ރައްޔިތުންވެސް މި މަސައްކަތުގަ ބައިވެރިވުމަށް ކަމަށާއި، ކުރިޔަށް މިއޮތް މުއްދަތުގައި ރާއްޖޭގެ ހުރިހާ ސިޔާސީ ލީޑަރުންވެސް މިކަމާމެދު ފުންކޮށް ވިސްނެވުމަކީ މުހިންމު ކަމެއް ކަމުގައެވެ.
އެމްޑީޕީގެ ޕްރައިމަރީއަށްފަހު އަޅުގަޑު އަމަލުކުރާނެ ގޮތް އަޅުގަޑު ސާފުކޮށް ބުނެދެމުން މިދަނީ. ދެން އެހެންވީމަ އަޅުގަޑު އުއްމީދުކުރަން އެހެން ބޭފުޅުންވެސް އެމީހުންގެ ކާޑު މޭޒުމަތީ ބައްވާނެކަމަށް. އެއްވެސް މީހަަކަށް ޝޮކެއްވެސް ބޭނުމެއް ނޫން. އެއްވެސްކަމެއް ނުހަމައިން ހިނގާކަށްވެސް ބޭނުމެއް ނޫން. އޮމާންކަމާ އެކީގަ ވެރިކަން ބަދަލުވާން ޖެހޭ. އެކަން ރަގަޅަށް ސަކާ ކޮށްގެން ގެންދިއުމަށް ކުރާންހުރި މަސައްކަތް އަޅުގަޑު ކުރާންނަ އިރާދަ ކުރެއްވިއްޔާ. މިއަދާއި އަންނަ ނޮވެމްބަރާ ދޭތެރޭގަ އަޅުގަޑު ދެކޭ ގޮތުގައި އަޅުގަޑު ކުރާންއޮތް ބޮޑު މަސައްކަތަކީ އެއީ. ދެން އަޅުގަޑު އެދެނީ ހުރިހާ ރައްޔިތުންވެސް އަޅުގަޑާ އެކީގަ މިމަސައްކަތުގަ ބައިވެރިވުން.
މި އިންޓަވިއުގައި ނަޝީދު ވިދާޅުވިއެވެ.
މި އިންޓަވިއުގަ އިތުރަށް ވާހަކަ ދައްކަވަމުން ނަޝީދު ވިދާޅުވީ ރާއްޖޭގެ ސިޔާސީ މަސްރަހުގައި ހަރަކާތްތެރިވާ ހުރިހާ ލީޑަރުންވެސް އަދި ސިޔާސީ ޕާޓީތަކުންވެސް ކުރިޔަށް އޮތްތަނުގައި އަމަލުކުރާނޭ ގޮތަކާމެދު ވަރަށްބޮޑަށް ވިސްނާން ޖެހިފައި ވާކަމުގައެވެ.
ކުރިޔަށް އޮތް ރިޔާސީ އިންތިޚާބުގަ ރައީސް ސާލިހުގެ ވެރިކަން ނިންމުމަށް މަސައްކަތް ކުރައްވާނެކަމުގައި ނަޝީދު މީގެ ކުރިންވެސް ވަނީ ވިދާޅުވެފައެވެ. މިގޮތުން ނިމިދިޔަ އެމްޑީޕީގެ ރިޔާސީ ކެމްޕޭންގައި ނަޝީދު ވިދާޅުވެފައިވަނީ، ރައީސް ސާލިހު ވެރިކަމަށް ގެނައީވެސް އެމަނިކްފާނު ކަމަށާއި، ވެރިކަމުން ބާލާނީވެސް އެމަނިކްފާނު ކަމުގައެވެ.
މިރޭ ދިވެހި ޗެނަލަށް ދެއްވި ޚާއްސަ އިންޓަވިއުގައި ނަޝީދު ވިދާޅުވެފައިވަނީ "ފިކުރެއްގެ ދިރުން" ނަމުގައި ގޮފިތައް ހައްދަވައިގެން ޕާޓީގެ އެތެރޭގައި އާ ސިޔާސީ ހަރަކާތެއް ހިންގުމަށް ނިންމަވާފައިވާ ނިންމުއާއެކު ކުރިޔަށް ވަޑައިގަންނަވާނެ ކަމަށާއި، ގޮފި ނުހަދަން ޕާޓީގެ ލީޑަރޝިލުން އެންގި ނަމަވެސް އެފަދަ އެންގެވުމަކަށް އަމަލު ނުކުރައްވާނެ ކަމުގައެވެ.
އެހެންނަމަވެސް، ފިކުރެއްގެ ދިރުން ނަމުގައި ގޮފި ހައްދަވައިގެން އެމްޑީޕީގެ އެތެރޭގައި ވަކި ސިޔާސީ ހަރަކާތެއް ހިންގެވުމަށް ނަޝީދު ނިންމެވި ނަމަވެސް ޕާޓީގެ ލީޑަރޝިޕުން ވިދާޅުވަމުން ގެންދަވަނީ، ޕާޓީގެ މެމްބަރެއްގެ ގޮތުގައި ހުންނަވައިގެން ޕާޓީގެ އެތެރޭގައި ވަކި ސިޔާސީ ހަރަކާތެއް ހިންގަވާ، އަދި ޕާޓީގެ ރިޔާސީ ކެނޑިޑޭޓު ނޫން އެހެން ރިޔާސީ ކެނޑިޑޭޓަކަށް ތާއިދު ކުރަން ޕާޓީގެ އެއްވެސް މެމްބަރަކަށް އަސާސީ ގަވާއިދުން ޖާގަދޭ ކަމެއް ނޫން ކަމުގައެވެ.
