އދ. އަތޮޅުގައި އޮންނަ މާފުށިވަރު ރިސޯޓު ކައިރިއަށް ސްނޯކްލިންއަށް ގޮސް އުޅެނިކޮށް ނިޔާވި ނިޝާހް ޢަބްދުލްޣަފޫރަކީ ހިތްވަރުގަދަކަމާއި އިންސާނިއްޔަތުކަމުގެ ލާމަސީލު މިސާލެއްކަމުގައި ރައީސް ސާލިހު ވިދާޅުވެއްޖެއެވެ.
ރައީސް ސާލިހު މިއަދު ކުރެއްވި ޓުވީޓެއްގައި ވިދާޅުވީ އިއްޔެ ވަކިވެގެންދިޔަ ނިޝާހްއަކީ ސްކައުޓް އެސޯސިއޭޝަނަށް ރީތި ނަން ހޯދައިދިން ޒުވާނެއް ކަމަށާއި މަރުޙޫމްގެ ފުރާނައަށް މާތް ﷲ ހެޔޮ ރަޙުމަތް ލައްވައި ޢާއިލާއަށް ކެތްތެރިކަން ދެއްވުން އެދި ދުޢާކުރައްވާ ކަމުގައެވެ.
އިއްޔެ އަޅުގަނޑުމެންނާ ވަކިވެގެންދިޔަ ނިޝާހް ޢަބްދުލްޣަފޫރަކީ ހިތްވަރުގަދަކަމާއި އިންސާނިއްޔަތުކަމުގެ ލާމަސީލު މިސާލެއް. ސްކައުޓް އެސޯސިއޭޝަނަށް ރީތި ނަން ހޯދައިދިން ޒުވާނެއް. އެ މަރުޙޫމްގެ ފުރާނައަށް މާތް ﷲ ހެޔޮ ރަޙުމަތް ލައްވައި ޢާއިލާއަށް ކެތްތެރިކަން ދެއްވާށި.
— Ibrahim Mohamed Solih (@ibusolih) January 31, 2023
މައުލޫމާތު ލިބިފައިވާ ގޮތުގައި ނިޔާވި ނިޝާހުއަކީ ރ. އިނގުރައިދޫގެ ޒުވާނެކެވެ. އަދި މި ޒުވާނާ މަސައްކަތް ކުރަމުން އައިސްފައިވަނީވެސް، އދ. މަހިބަދޫ ކައިރީގައި އޮންނަ މި ރިސޯޓުގައި ކަމަށްވެސް މައުލޫމާތު ލިބިފައި ވެއެވެ.
ނިޝާހު ނިޔާވުމާއި ގުޅިގެން ސްކައުޓު އެސޯސިއޭޝަންއިން ނެރުނު ބަޔާނެއްގައި ބުނެފައިވަނީ ނިޝާހުއަކީ 18 ނޮވެމްބަރ 2018ގައި ރ. އިނގުރައިދޫގައި މޫދަށް އެރިއުޅުނު ކުއްޖަކު ގެނބުނު ހިތާމަވެރި ހަދިސާގައި އެކުޖާގެ ފުރާނަ ސަލާމަތް ކުރުމުގައި ނަމޫނާއާއި ހިތްވަރު ދެއްކި ކުޅަދާނަ ސްކައުޓެއް ކަމުގައެވެ.
އަދި ނިޝާހުގެ އެ ހިތްވަރުގަދަ އަމަލަކީ ކޮންމެ ސްކައުޓަކަށްވެސް މަތިވެރި ނަމޫނާއެއްކަމުގައިވެސް ސްކައުޓު އެސޯސިއޭޝަންއިން ބުނެފައިވެއެވެ.
ނިޝާހު ނިޔާވެފައިވަނީ ސްނޯކްލިންއަށް ގޮސް އުޅެނިކޮށް ގެނބެމުން ދިޔަ މީހަކު ސަލާމަތް ކުރަން އުޅުމުގެ ތެރޭގައި ކަމަށްވެސް ބައެއް ފަރާތްތަކުން ބުނެއެވެ.
ސްކަައުޓު އެސޯސިއޭޝަންއިންވަނީ ނިޝާހުގެ ޖަނާޒާއަށް ވީހާވެސް ގިނަ ބަޔަކު ދިއުމަށް އިލްތިމާސް ކޮށްފައެވެ.
