މިވަގުތަކީ އެމްޑީޕީގެ ހުރިހާ މެމްބަރުންވެސްއެއް ގަލަކަށް އަރާ، ރިޔާސީ އިންތިޚާބު ކާމިޔާބު ކުރުމަށް އެކުގައި މަސައްކަތް ފަށަންވީ ވަގުތު ކަމުގައި ރައީސް ސާލިހު ވިދާޅުވެއްޖެއެވެ.
އިއްޔެ ބޭއްވިގެންދިޔަ އެމްޑީޕީގެ ރިޔާސީ ޕްރައިމަރީ، އެޕާޓީގެ ރައީސް މުހައްމަދު ނަޝީދާއި ވާދަކުރައްވާ ބޮޑު ތަފާތަކުން ކާމިޔާބު ކުރެއްވުމަށްފަހު ކުރެއްވި ފުރަތަމަ ޓުވީޓުގައި ރައީސް ސާލިހުވަނީ އެމްޑީޕީގެ ރިޔާސީ ޕްރައިމަރީގައި ޕާޓީގެ މެންބަރުން އެމަނިކްފާނަށް ދެއްވި ތާޢީދާއި ކުރެއްވި އިތުބާރަށް ވަރަށް ބޮޑަށް ޝުކުރު އަދާ ކުރައްވާފައެވެ.
@MDPSecretariat ގެ ރިޔާސީ ޕްރައިމަރީގައި ޕާޓީގެ
މެންބަރުން އަޅުގަނޑަށް ދެއްވި ތާޢީދާއި ކުރެއްވި އިތުބާރަށް ވަރަށް ބޮޑަށް ޝުކުރު ދަންނަވަން. މިއީ ޕާޓގެ ހުރިހާ މެންބަރުން ރިޔާސީ އިންތިޚާބު ކާމިޔާބު ކުރުމަށް އެކުގައި މަސައްކަތް ފަށަންވީ ވަގުތު. އެމްޑީޕީ ކުރިއަށް!— Ibrahim Mohamed Solih (@ibusolih) January 29, 2023
އިއްޔެގެ ވާދަވެރި ވޯޓަށް މެމްބަރުންނަށް ރައީސް ސާލިހު ޝުކުރު އަދާ ކުރައްވާފައިވާއިރު، އިންތިޚާބުގެ ނާކާމިޔާބިއާއި ގުޅޭގޮތުން ނަޝީދު އަދި މިހާތަނަށް އެއްވެސް ބަހެއް ވިދާޅުވެފައެއް ނުވެއެވެ. އެހެންނަމަވެސް ނަޝީދުގެ ކެމްޕޭން ޓީމުން ރޭ ބުނެފައިވަނީ، ވޯޓުލުން ދިޔައީ އިންސާފުވެރިކޮށް ނޫން ކަމަށާއި، ހުރިހާ ނަތީޖާއެއް ދިރާސާ ކުރުމަށްފަހު، މައުލޫމާތު ދޭނެ ކަމުގައެވެ.
އިއްޔެގެ ވޯޓަށްފަހު އެމްޑީޕީގެ އިންތިޚާބާބެހޭ ކޮމިޓީން މިއަދުވަނީ އިންތިޚާބުގެ ވަގުތީ ނަތީޖާ އިއުލާން ކޮށްފައެވެ.
މިއަދު އެމްޑީޕީގެ އޮފީހުގައި، އެޕާޓީގެ އިންތިޚާބާބެހޭ ކޮމިޓީން ބޭއްވި ޕްރެސް ކޮންފަރެންސްގައި ޑެޕިއުޓީ ޗެއަރޕާރސަން އިބުރާހިމް ވަހީދު (އިބުރޭ) ވިދާޅުވި ގޮތުގައި އިއްޔެ ބޭއްވުނު އިންތިޚާބަކީ ވަރަށް އިންސާފުވެރިކޮށް ކުރިޔަށްދިޔަ އިންތިޚާބެއް ކަމުގައެވެ. މިގޮތުން ދެތިން ރަށެއްގައި ކޮންމެވެސް ވަރެއްގެ ހަމަނުޖެހުންތަކެއް ހިނގިނަމަވެސް އިބުރޭ ވިދާޅުވި އެ ރަށްރަށުގައިވެސް ޖެހުނު މައްސަލަތައް ހަލުކޮށް ވޯޓުލުން ކުރިޔަށް ގެންދެވިފައި ވާކަމުގައެވެ.
މި ނޫސްވެރިންގެ ބައްދަލުވުމުގައި އޭނާ އިއުލާން ކުރެއްވި ވަގުތީ ނަތީޖާގައި ވާގޮތުން ރައީސް ސާލިހަށް އިއްޔެގެ އިންތިޚާބުގައި ލިބިލެއްވީ 24،573 ވޯޓެވެ. ރައީސް ސާލިހާއި ވާދަކުރެއްވި އެ ޕާޓީގެ ރައީސް މުހައްމަދު ނަޝީދަށް ލިބިލެއްވީ 15،631 ވޯޓެވެ. އެއީ ވޯޓު ލީ މީހުންގެ 6
އިންތިޚާބާބެހޭ ކޮމިޓީން އާންމު ކުރި ވަގުތީ ނަތީޖާގައި ވާގޮތުން މި އިންތިޚާބުގައި ވޯޓު ލާފައިވަނީ 40887 މެމްބަރުންނެވެ. އެއީ ވޯޓު ލުމުގެ ހައްގު ލިބިފައިވާ މެމްބަރުން 71.41 އިންސައްތަ މީހުންނެވެ.
މި އިންތިޚާބުގައި 680 ބާތިލް ވޯޓު ލާފައިވާއިރު ސައްހަ ވޯޓުގެ ގޮތުގައި ލާފައިވަނީ 40،207 ވޯޓެވެ.
އިންތިޚާބުގެ ނަތީޖާއަށް ބަލާއިރު، ރައީސް ސާލިހުއަށް ލިބިލެއްވީ 61.10 އިންސައްތަ ވޯޓެވެ. ނަޝީދަށް ލިބިލެއްވީ 38.9 އިންސައްތަ ވޯޓެވެ.
މިއަދުގެ ޕްރެސްގައި ވާހަކަ ދައްކަވަމުން އިބުރޭ ވިދާޅު ޝަކުވާ ހުޅަހެޅުމަސް ހުޅުވާލެވިފައިވާ ޕޯޓަލްއަށް ހުށަހެޅުނީ 50 ޝަކުވާ ކަމަށާއި، އަދި ފޯނަށް ލިބުނީ އެންމެ 10 ޝަކުވާ ކަމަށެވެ. ހުށަހެޅުނު ޝަކުވާތަކާއި ގުޅޭގޮތުން އިންތިޚާބު ކޮމިޓީގެ މެމްބަރު އަނަސް ވިދާޅުވީ، ހުށަހެޅުނު ޝަކުވާތަކުގެ ތެރޭގައި މުއްދަތު ހަމަވުމާއި ގުޅުހުރި ޝަކުވާތައް ހިމެނޭ ކަމުގައެވެ. އޭނާ އިތުރަށް ވިދާޅުވީ ސޯޝަލް މީޑިއާގައި ބައެއް ފަރާތްތަކުން ފާހަގަ ކުރި ކަންކަން، ރަސްމީ އެއްވެސް ޗެނަލެއް މެދުވެރިކޮށް އެއްވެސް ފަރާތަކުން ހުށަހަޅާފައި ނުވާކަމުގައެވެ.
އޭނާ ވިދާޅުވީ މި 50 ޝަކުވާގެ ތެރެގައިވެސް ބޮޑަށް ހިމެނިގެން ދިޔައީ މެމްބަރުންގެ ނަން ނެތުން ކަހަލަ ބައެއް ޝުކުވާތަކެއް ކަމުގައެވެ. އޭނާ ވިދާޅުވީ މި އިންތިޚާބުގެ ތެރެއަށް އެހެން ބައެއް ޕާޓީތަކުގެ މެމްބަރުން ވަދެ ވޯޓުލުން ހުއްޓުވުމަށް މަސައްކަތް ކޮށްފައިވާ ކަމުގައެވެ. އަދި ފުލުހުންގެ ބޭނުން ކޮށްގެން އެފަދަ ފަރާތްތައް ވޯޓުލާ މަރުކަޒުން ނެރެން ޖެހުނުކަމަށްވެސް އޭނާ ވިދާޅުވިއެވެ.
ކޮމެންޓު ފޮނުވާ