ރޯޑް ޑިވެލޮޕްމަންޓް ކޯޕަރޭޝަން، އާރުޑީސީގެ ބޯޑުގެ ޗެއަރމަން އަބުދުﷲ އަފީފު، ކެމްޕޭންގެ އެންމެ ފަހު ޖަލްސާގައި ނަޝީދުގެ ކެމްޕޭނާއި ގުޅިވަޑައިގެންފިއެވެ.

މިގޮތުން، މިހާރު ކުރިޔަށްދާ އެމްޑީޕީގެ ރިޔާސީ ޕްރައިމަރީގެ ކެމްޕޭންގައި، ޕާޓީގެ އިސް ލީޑަރު ރައީސް ސާލިހުއާއި ޕާޓީގެ ރައީސް މުހައްމަދު ނަޝީދުއާއި ދެބެފުޅުންގެ މެދުގައި ހިނގަމުންދާ ވާދަވެރި ކެމްޕޭންގައި ފާއިތުވެދިޔަ މަހެއްހާ ދުވަހުވެސް އެއްވެސް ފަޅިއަކަށް ތާއީދު ކުރައްވާކަން ހާމަ ނުކޮށް ހުންނެވި، އާރުޑީސީގެ ބޯޑުގެ ޗެއަރމަންކަމުގެ މަގާމަށް ރައީސް ސާލިހު އައްޔަން ކުރައްވާފަ ހުންނެވި އަބުދުﷲ އަފީފުވަނީ ރޭ މާލޭގެ އާރޓިފިޝަލް ބީޗުގައި ބޭއްވުނު، ނަޝީދުގެ ކެމްޕޭން ޖަލްސާއަށް ވަނީ ނިކުންނަވާފައެވެ.

އެމްޑީޕީގެ ރައީސް މުހައްމަދު ނަޝީދާއި ޕާޓީގެ އިސް ލީޑަރު އިބުރާހިމް މުހައްމަދި ސާލިހުއާއި ދެބޭފުޅުންގެ މެދުގައި ކުރެވޭ ސިޔާސީ ވަރުގަދަ ހަނގުރާމެއެއްގެ ގޮތުގައި ސިފަ ކުރެވެމުންދާ ރިޔާސީ ޕްރައިމަރީގެ ކެމްޕޭނުގައި ފާއިތުވެދިޔަ ދެތިން ހަފްތާ ތެރޭގައި، ސަރުކާރުން އިސް ބައެއް މަގާމް ތަކުގައި ތިއްބެވި ބައެއް ބޭފުޅުންވަނީ ނަޝީދަށް ތާއީދުކޮށް ފާޅުގައި ރައީސް ސާލިހާއި ދެކޮޅަށް ކެމްޕޭންވެސް ކުރައްވަން ފައްޓަވާފައެވެ.

ހެންނަމަވެސް، އާރުޑީސީގެ ބޯޑުގެ ޗެއަރމަންކަމުގެ މަގާމަށް ރައީސް ސާލިހު އައްޔަން ކުރައްވާފަ ހުންނެވި އަބުދުﷲ އަފީފު މިހާތަނަށް އެއްވެސް ކެމްޕޭނަކަށް ތާއީދު ކުރައްވާކަން ހާމަކޮށްފައެއް ނުވެއެވެ.

މިހާރު ކުރިޔަށްދާ އެމްޑީޕީގެ ރިޔާސީ ކެމްޕޭންގައި ރައީސް ސާލިހު ސިޔާސީ ވަޒީފާ ދެއްވާފައިވާ، ސަރުކާރުގެ އިސް ބައެއް މަގާމްތަކުގައި ތިއްބެވި ފަރާތްތަކުގެ ތެރެއިން ރައީސް ސާލިހާއި ދެކޮޅަށް މަސައްކަތް ކުރެއްވުމަށް ނަޝީދުގެ ކެމްޕޭނަށް ތާއިދުކުރާކަން ފާޅުކޮށް، ކެމްޕޭންވެސް ކުރައްވަމުން ގެންދަވާ ފަރާތްތަކުގެ ތެރޭގައި ރައީސް އޮފީހުގެ މިނިސްޓަރު ޝިފާޒުއާއި އެސްޓީއޯގެ އަމުރުގެ އިތުރުން އޭނާގެ އަނބިކަބަލުން، އެލްޖީއޭގެ ރައީސް ކަމުގެ މަގާމުގައި ހުންނެވި އަފްޝަން ލަތީފްވެސް ހިމެނެއެވެ.

އޭގެ އިތުރުންވެސް އެގްރޯ ކުންފުނީގެ އެމްޑީ ހާރޫން ރަޝީދުއާއި ޕޯސްޓު ލިމިޓެޑްގެ ޑީއެމްޑީގެ މަގާމުގައި ހުންނެވި އަދުހަމްވެސް ވަނީ ނަޝީދުގެ ކެމްޕޭނާއި ގުޅިވަޑައިގެންފައެވެ.