މިހާރު ކުރިޔަށްދާ އެމްޑީޕީގެ ރިޔާސީ ޕްރައިމަރީއަކީ އެޕާޓީގެ ތާރީޚުގައިވެސް ފާހަގަ ކޮށްލެވޭ އިންތިޚާބެކެވެ. އޭގެ އެންމެ ބޮޑު އެއް ސަބަބަކީ އެމްޑީޕީގެ ހަޔާތުން ފާއިތުވެދިޔަ 15 އަހަރުތެރޭވެސް ޕާޓީގެ އެންމެ އިސް ދެލީޑަރުން ޕާޓީގެ އެތެރެއިންވެސް އަދި ބޭރުންވެސް އެއް އިންތިޚާބެއްގައި ވާދަކޮށްފައި ނެތުމެވެ.

އަދި ދެވަނަ ފަހަރަށް، 15 އަހަރު ތެރޭ އެމްޑީޕީ ވެރިކަމަށް އައިސްފައިވާއިރު، ވެރިކަމުގެ ދައުރެއް ފުރިހަމަކޮށް، ޖެހިޖެހިގެން ދެވަ ދައުރެއްގައި ވެރިކަން ކުރުމަށް މިއީ އެޕާޓީއަށް ލިބިގެންދާ ފުރަތަމަ ފުރުސަތުވެސް މެއެވެ. ހަމަ އެއާއެކު، ފާއިތުވެދިޔަ ތަނުގައިވެސް އެޕާޓީގެ އެތެރޭގައި ސިޔާސީ ޚިޔާލުތަފާތުވުން އުފެދި، ޕާޓީގެ ރައީސުންނާއި ނާއިބު ރައީސުންވެސް ޕާޓީއާއި ދުރަށް ޖެހުނު ނަމަވެސް، މި ނޫނީ، މި ޚިޔާލުތަފާތުވުންތަކުގައި ޕާޓީ ރަގަޅަށް ދެފަޅިވެ، ރަސްމީކޮށް ދެ ފެކްޝަނެއްގެ ގޮތުގައި ޕާޓީ މަސައްކަތް ކުރާން ފަށާފައެއް ވެސް ނުވެއެވެ.

އެހެންކަމުން އަންނަ ހޮނިހިރު ދުވަހު އެމްޑީޕީގެ އިލެކްޝަން ދަފްތަރުގައި ތިބި 57 ހާސް މެމްބަރުން އެޕާޓީގެ މުސްތަގްބަލް ކަނޑައެޅުމަށް ނިކުންނައިރު، އެމްޑީޕީގެ އާންމު މެމްބަރުންގެ އިތުރުން، އިތުރު އެތައް ބައެއްގެ ހިތުގައިވަނީ އެމްޑީޕީއާއި އެޕާޓީގެ ލީޑަރުންގެ ސިޔާސީ މުސްތަގްބަލާއި ގުޅޭގޮތުންވެސް އެތަކެއް ސުވާލުތަކެއް އުފެދިގެން ގޮސްފައެވެ.

މިއިންތިޚާބު ނަތީޖާ ކާމިޔާބު ކުރާނީ ކޮން ކެނޑިޑޭޓެއްތޯ ކުރެވޭ ސުވާލުތަކުގެ އިތުރަށް އިންތިޚާބުން ނާކާމިޔާބުވާ ކެނޑިޑޭޓަކު ސިޔާސީގޮތުން ދެން ކުރިޔަށް ވަޑައިގަންނަވާނޭ ގޮތަކާއި ގުޅޭގޮތުން އެތައް ބައެއްގެ ހިތުގައިވަނީ ގިނަގުނަ ސުވާލުތަކެއް އުފެދިގެން ގޮސްފައެވެ.

އިންތިޚާބުން ބަލިވެދާނެކަމަށް ދެބޭފުޅުންވެސް ހިސާބެއް ނުޖައްސަވާ!

ފާއިތުވެދިޔަ 3 ހަފްތާ ވަންދެން ކުރިޔަށް ގޮސްފައިވާ އެމްޑީޕީގެ ރިޔާސީ ޕްރައިމަރީގެ ކެމްޕޭންގައި، މި އިންތިޚާބުގެ ނަތީޖާއިން ނާކާމިޔާބީއާއި ކުރިމަތިލައްވަން ޖެހިވަޑައިގެންފިނަމަ ދެން ހައްދަވާނޭ ގޮތުގެ ސުވާލަކީ، ޕްރައިމަރީގައި ވާދަ ކުރައްވަމުން ގެންދަވާ ދެކެނޑިޑޭޓުންނާއިވެސް ފާއިތުވެދިޔަ ތަނުގައި، އެތައް ފަހަރެއްގެ މަތިން އަމާޒު ވެގެން ގޮސްފައިވާ ސުވާލެކެވެ.

މި ސުވާލުގެ ޖަވާބުގައި ރައީސް ސާލިހު ވިދާޅުވެފައިވަނީ ޕްރައިމަރީގެ އިންތިޚާބުން ބަލިވެވަޑައިގަތަސް އެމަނިކްފާނު އަބަދުވެސް ހުންނަވާނީ އެމްޑީޕީއާއެކު ކަމަށެވެ. އެހެންނަމަވެސް ތަކުރާރުކޮށް ވިދާޅުވަމުން ގެންދަވަނީ ބޮޑުތަނުން އިންތިޚާބު ކާމިޔާބު ކުރައްވާނޭ ކަމަށެވެ.

އެއާއި ޚިލާފަށް، ފާއިތުވެދިޔަ ނޫސްވެރިންގެ ބައްދަލުވުންތަކުގައި، ކުރިޔަށްދާ ރިޔާސީ ޕްރައިމަރީން ނާކާމިޔާބު ވެވަޑައިގެންފިނަމަ ދެން ހައްދަވާނޭ ގޮތަކާއި ގުޅޭގޮތުން ތަކުރާރުކޮށް، އެތައް ފަހަރެއްގެ މަތިން އެއް ސުވާލެއް ނޫސްވެރިންގެ ފަރާތުން އަމާޒު ކުރެވިގެން ދިއުމާއެކުވެސް، ނަތީޖާއިން ނާކާމިޔާބީއާއި ކުރިމަތިލައްވަން ޖެހިވަޑައިގެންފިނަމަ ދެން ހައްދަވާނޭ ގޮތެއް ނަޝީދު ސާފުކޮށް ވިދާޅުވެ ދެއްވާފައެއް ނުވެއެވެ. އަބަދުވެސް ވިދާޅުވަމުން ގެންދަވަނީ މި ރިޔާސީ ޕްރައިމަރީން ބަލި ނުވާނެކަމަށާއި، އެ ނޫން ހާލަތެއް ނުވެސް ނެތް ކަމުގައެވެ.

އެހެންނަމަވެސް ޕްރައިމަރީގެ ކެމްޕޭންގައި ބައެއް ރަށްރަށް ކުރެއްވި ދަތުރުފުޅުތަކުގައި، އެމްޑީޕީގެ އާންމު މެމްބަރުންނާއި ބައްދަލުކޮށް ވާހަކަދައްކަވަމުން ނަޝީދު ވަނީ، އިންތިޚާބުން ބަލިވިޔަސް ރައީސް ސާލިހުގެ ފަހަތްޕުޅަށް ނާރުއްވާނޭ ކަމަށް ވިދާޅުވެފައެވެ.

އެހެންކަމުން، ރައީސް ސާލިހާއި ނަޝީދާ ދެބެފުޅުންގެ މެދުގައި ފާއިތުވެދިޔަ ތަނުގައި ހިނގަމުން އައިސްފައިވާ ސިޔާސީ ކޯޅުންތަކާއި އަދި ދެކޮޅުވެރިކަން އޮތް ނިސްބަތަށް ރަގަޅަށް ރިއާޔަތްކޮށް ނަޒަރެއް ހިންގާލާއިރު، ނަޝީދުގެ ހުރިހާވެސް ވިސްނުމަކާއި އަމާޒެއް ހުރީ އިންތިޚާބުން ބަލިވާ ހާލަތުގައިވެސް ރައީސް ސާލިހުގެ ފަހަތްޕުޅަށް ނޭރުއްވުން ކަމުގައި މިއަދު މިވަނީ ގަބޫލުކުރާން މަޖުބޫރުވެފައެވެ.

އަދި އެފަދަ ހާލަތެއްގައި ދެން ނަޝީދު ކަންކުރައްވާނީ ކިހިނަކުންތޯ މިއީ ގިނަބައެއްގެ ހިތުގައި އުފެދިފައިވާ ވަރަށް ބޮޑު ސުވާލެއް ކަމުގައި ދަންނަވާން ޖެހެއެވެ.

ނަތީޖާ ގަބޫލު ނުކުރުމާއި އަމިއްލަ ގޮތުން ރިޔާސީ އިންތިޚާބުގައި ވާދަކުރެއްވުން!

ގިނަ ބަޔަކު ގަބޫލު ކުރާ ގޮތުގައި، އެމްޑީޕީގެ ރިޔާސީ ޕްރައިމަރީގެ ކެމްޕޭންގެ ފެށުމާއެކުވެސް، ޕާޓީގެ ދަފްތަރުން 39 ހާސް މެމްބަރުން ނުހައްގުން ވަކި ކޮށްފައިވާކަމަށް ވިދާޅުވެ ނަޝީދު ދައްކަވަމުން ގެންދަވާ ވާހަކަފުޅަކީ، އެއީ އިންތިޚާބުގެ ނަތީޖާ ގަބޫ ނުކުރުމަށް އޮތް އެއްމެ އަސަސީ ބިންގާކަމުގައި ގަބޫލު ކުރައްވައިގެންނެވެ.

އޭގެ އެންމެ ބޮޑު އެއް ސަބަބަކީ، އިންސާފުވެރި ނުވާނޭކަމަށް އަމިއްލަފުޅަށް ވިދާޅުވާ އިންތިޚާބެއްގައި ނަޝީދު ވާދަކުރައްވަމުން ވަޑައިގެންނެވުމެވެ. ހަމަ އެއާއެކު ފާއިތުވެދިޔަ ތަނުގައި ނަޝީދު ކެމްޕޭންގައި ދައްކަވާފައިވާ ވާހަކަތަކަށް ބަލާއިރުވެސް، މަކަރާއި އޮޅުވާލުމުގެ ތެރެއިން ރައީސް ސާލިހު އިންތިޚާބުގެ ނަތީޖާ ނެރުއްވަން މަސައްކަތް ކުރައްވާކަމުގެ ތުހުމަތުވެސް ނަޝީދު ވަނީ އެތައް ފަހަރެއްގެމަތިން ކުރައްވާފައިވެސްމެއެވެ.

އެހެންނަަމަވެސް، ފާއިތުވެދިޔަ 3 ހަފްތާއެއްހާ ދުވަހުގެ ތެރޭގައި މިހާތަނަށް ދެ ކެނޑިޑޭޓުންގެ ފަރާތުން ރައްޖޭގެ އެކި ކަންކޮޅުތަކުގައި ކޮށްފައިވާ ކެމްޕޭންތަކާއި، ކެމްޕޭން ޓީމުތައް ރަށްރަށުގައި ހަރަކާތްތެރި ވަމުންދާ ގޮތަށް ބަލާއިރު، ގިނަ ބަޔަކުގަބޫލު ކުރާގޮތުގައި މިޕްރައިމަރީގެ ނަތީޖާ ނިކުމެގެން ދިއުން ބޮޑަށް ގާތީ ރައީސް ސާލިހުގެ ފަޅިއަށް ބުރަވެގެންނެވެ.

އެއާއިއެކު ގިނަބަޔެއްގެ ހިތުގައި އުފެދިގެންދާ ބޮޑު ސުވާލަކީ، ޕްރަައިމަރީގެ ނަތީޖާއިން ނުކުމެގެންދާނެ ތަފާތުގެ ކުޑަ ބޮޑުމިނެވެ. މިގޮތުން ގިނަބަޔަކު ގަބޫލުކުރާ ގޮތުގައި ކޮންމެ ފަދަ ތަފާތަކުން ބަލިވިޔަސް ނަޝީދު އަމިއްލަ ގޮތުން ކުރިޔަށް އޮތް ރިޔާސީ އިންތިޚާބުގައި ވާދަކުރައްވާނެއެވެ.

އެހެންނަމަވެސް، އިންތިޚާބުގައި ބޮޑު ތަފާތަކުން ބަލިވެއްޖެ ހާލަތެއްގައި، އެމްޑީޕީގެ ޓިކެޓާއި ނުލާ، ކުރިޔަށް އޮތް ރިޔާސީ އިންތިޚާބުގައި، ކޯލިޝަނަކާވެސް ނުލާ ގިނިކަންޏާ ވާދަ ކުރައްވައިގެން އެދެވޭ ނަތީޖާއެއް ނެރެވިދާނޭކަމުގެ މާބޮޑު އުއްމީދެއް ޚުދު ނަޝީދަށްވެސް ނޯންނާނޭ ކަމީ ކަށަވަރުވެ ޔަގީންވާން އޮތް ކަމެކެވެ.

އަދި އެފަދަ ހާލަތެއްގައި، ކުރިޔަށް އޮތް ރިޔާސީ އިންތޚާބުގައި ވާދަކޮށް، ރައީސް ސާލިހު ބަލިކޮށްގެން ކުރިޔަށް އޮތްތަނުގައި ޕާޓީގެ ކޮންޓްރޯލް އަނބުރާ ހޯއްދެވުމަށް ނަޝީދު ކުރައްވަފާނޭ އުއްމީދުތަަކަށްވެސް ވަރަށްބޮޑަށް ހިޔަނި އެޅިގެން ދާނެއެވެ.

އެހެންކަމުން ދެން އޮތް ހާލަތަކީ، ކުރިޔަށްދާ ރިޔާސީ ޕްރައިމަރީން ބޮޑު ބައްޔަކުން ނަޝީދު ބަލިވިނަމަވެސް، އަދި ކުޑަ ތަފާތަކުން ބަލިވެގެން ދިޔަނަމަވެސް، އިންތިޚާބު އިންސާފުވެރި ނޫންކަމަށް ވިދާޅުވެ، އިންސާފު ހޯއްދެވުމަށް ކޯޓުތަކަށް ވަޑައިގެންނެވުމެވެ. އެފަދަ ހާލަތެއްގައި، ކޯޓުގައި އިންސާފު ހޯއްދުމުގެ ނަމުގައި ވަކާލާތު ކުރައްވަމުން، ކުރިޔަށް އޮތް ރިޔާސީ އިންތިޚާބުގައި ވާދަ ކުރެއްވުމަށް އަމިއްލަގޮތުން ކެމްޕޭން ކުރައްވަމުން ވަޑައިގެންނެވުކަމީވެސް ބައެއް ފަރާތްތަކުން ދެކޭގޮތުގައި ނަޝީދު އިޚްތިޔާރު ކުރެއްވުން ގާތް މަގެކެވެ.

ކޮންއެއަކަސް ކުރިޔަށްދާ ކެމްޕޭންގެ މަލަމަތި މިހާރު ފެންނަމުންދާ ގޮތަށް ބަލާއިރު، މިއިންތިޚާބު ކާމިޔާބު ވެދިއުމަށްވުރެ، ނަޝީދަށް އިންތިޚާބު ކާމިޔާބު ނުވެދިއުމަކީ ގާތްކަން އޮތްކަމެއް ކަމުގައި ދަންނަވާން ޖެހެއެވެ.

އެފަދަ ހާލަތެއްގައި ގިނަ ބަޔަކު އިއްތިފާގުވާ އެއްކަމަކީ، 39 ހާސް މީހުންގެ ހައްގު އަސާސީ އުޒުރަކަށް ހައްދަވާ، އިންސާފުވެރިކަމެއް ނެތްކަމަށް ވިދާޅުވެ ނަޝީދު އިންތިޚާބުގެ ނަތީޖާ ގަބޫލު ނުކުރެއްވުމެވެ. ގިނަ ބައެއްގެ ޝައުގުވެރިކަން ބޮޑަށް ހުއްޓިފައި ހުރީ އެއަށްފަހު ދެން ކަންވެގެންދާނެ ގޮތެއްގެ މައްޗަށެވެ. އެދުވަސް އޮތީ ވަރަށްވެސް ކައިރީގައެވެ.