ރައްޔިތުންގެ މަޖިލިހުގެ މެމްބަރަކު އެމަނިކްފާނާ ޚިޔާލު ތަފާތު ވުމެއްގެ ހުންނެވި ނަމަވެސް، ޚިޔާލު ތަފާތުވާ މެމްބަރުގެ ދާއިރާވެސް ބާކީ ނުކުރައްވާނެ ކަމުގައި ރައީސް ސާލިހު ވިދާޅުވެއްޖެއެވެ.
މިހާރު ކުރިޔަށްދާ އެމްޑީޕީގެ ޕްރައިމަރީގެ ކެމްޕޭންގައި އއ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި މިއަދު ތޮއްޑޫގައި ވާހަކަ ދައްކަވަމުން ރައީސް ސާލިހު ވިދާޅުވީ ތޮއްޑޫ ދާއިރާގެ މެމްބަރު ހަސަން ޝިޔާން ހުންނެވީ "އެހާ ކައިރީގަ" ނޫން ކަމުގައެވެ. އެހެންނަމަވެސް އެއީ ދާއިރާ ބާކީ ވެގެންދާނެ ސަބަބެއް ނޫންކަމުގައި ރައީސް ސާލިހު ވިދާޅުވިއެވެ.
ކަންތައްތައް ނިންމަމުން މިގެންދަނީ ކައުންސިލާއި މަޝްވަރާ ކޮށްގެން، ރައްޔިތުންގެ މަޖިލިހުގެ މެމްބަރުންނާއި މަޝްވަރާ ކޮށްގެން. ތެދުފުޅެއް، މިދާއިރާގެ މެމްބަރު އަޅުގަޑަކާ އެހާ ކައިރިއަކު ނޫން ހުރީ އަކީއެއް. އެހެންނަމަވެސް އެއީއަކީއެއް ދާއިރާ ބާކީވެގެން ދާނެ ކަމެއް ނޫން.
ރައީސް ސާލިހު ވިދާޅުވީ ސަރުކާރުން ކުރާ ހުރިހާކަމެއްވެސް ކުރަމުންދާނީ ރައްޔިތުންގެ އަޑު އަހައިގެން ކަމުގައެވެ. އަދި ރައްޔިތުންގެ ހުރި ކަންބޮޑުވުންތަކަށް ހައްލު ހޯއްދަވާ ދެއްވާނެކަމަށް ރައީސް ސާލިހު ވިދާޅުވިއެވެ.
ތޮއްޑޫ ދާއިރާގެ މެމްމަރު ހަސަން ޝިޔާން (ގިޓާ)އަކީ އެމެޑިޕީގެ ރައީސް މުހައްމަދު ނަޝީދުގެ ފެކްޝަނަށް ތާއީދު ކުރައްވާ މެމްބަރެކެވެ. އަދި އޭނާއަކީ އެމްޑީޕީގެ ޕާލަމެންޓްރީ ގުރޫޕްގައި ރައީސް ސާލިހަށް އަމާޒުކޮށް އެންމެ ހަރުކަށިކޮށް ފާޑު ވިދާޅުވަމުން ގެންދަވާ އެއް މެމްބަރުވެސްމެއެވެ.
މިހާރު ކުރިޔަށްދާ އެމްޑީޕީގެ ރިޔާސީ ޕްރައިމަރީގެ ކެމްޕޭގައި، މިއަދު ކ. އަތޮޅުގެ ކާށިދޫއާއި ގުރައިދުއަށް ވަޑައިގަތުމަށްދަހު ރައީސް ސާލިހު ވަނީ އއ. އަތޮޅުތަކުގެ ބައެއް ރަށްތަކަށް ވަޑައިގެންފައެވެ.
ރައީސް ސާލިހު މިއަދު އއ. ތޮއްޑޫއަށް ވަޑައިގަތުމުން އެރަށުން ވަނީ ރައީސަށް ހޫނު ބަރުހަބާއެއް ދަންނަވާފައެވެ. އއ. ތޮއްޑޫގައި ރައީސް ސާލިހުވަނީ އެރަށުގެ އެމްޑީޕީގެ މެމްބަރުންނާ ބައްދަލުކޮށް ވާހަކަ ދައްކަވާފައެވެ.
ރައީސް ސާލިހު މިއަދު ކ. އަތޮޅާއި އއ. އަތޮޅުގެ ބައެއް ރަށްތަކަށް ދަތުރު ކުރައްވަމުން ގެންދަވާއިރު، ރައީސް ސާލިހާއި ޕްރައިމަރީގައި ވާދަ ކުރައްވަމުން ގެންދަވާ އެމްޑީޕީގެ ރައީސް މުހައްމަދު ނަޝީދުވަނީ މިއަދުވަނީ އައްޑުއަށް ވަޑައިގެންފައެވެ. އަދި އައްޑޫއަކީ ނަޝީދުގެ ކެމްޕޭންގެ އެންމެ ފަހު މަންޒިލް ކަމުގައިވަނީ މައުލޫމާތު ލިބިގައެވެ.
މިގޮތުން ޕްރައިމަރީއަށް ފޯމު ހުށަހެޅެއްވުމަށްފަހު ފެއްޓެވި ކެމްޕޭން ދަތުރުތަކުގައި ނަޝީދު ރާއްޖޭގެ 70އަށްވުރެ ގިނަ ރަށަށް ވަޑައިގެންފައިވާއިރު، ކެމްޕޭން ޓީމުން މައުލޫމާތު ލިބިފައިވާ ގޮތުގައި މި ކެމްޕޭންގައި ނަޝީދު މިހާރުވަނީ ރާއްޖޭގެ ހުރިހާ އަތޮޅަކަށް ވަޑައިގެންފައެވެ.
އޭގެ އިތުރަށް "ފިކުރެއްގެ ދިރުން" ކެމްޕޭންގެ 3 ޓީމަކުން ރާއްޖޭގެ 3 ސަރަހައްދެއްގައި ކެމްޕޭން ކުރަމުންދާއިރު، މިހާތަނަށް ނަޝީދުގެ ކެމްޕޭނުން ރާއްޖޭގެ ހުރިހާ ރަށެއް ކަވަރުކޮށް ނިންމާފައިވާ ކަމަށްވެސް މައުލޫމާތު ދީފައި ވެއެވެ.
ރައީސް ސާލިހުގެ "އެމްޑީޕީ ކުރިއަށް" ކެމްޕޭނުން ހާމަ ކޮށްފައިވާ ގޮތުގައި އެމަނިކްފާނުގެ ޕްރައިމަރީ ކެމްޕޭން ނިންމުމުގެ ޖަލްސާ ބޭއްވުމަށް ހަމަޖެހިފައިވަނީ އައްޑޫ ސިޓީގެ ހިތަދޫގައި މިމަހުގެ 26 ވަނަ ދުވަހުގެ ރޭ 8:30 ގައެވެ.
އެމްޑީޕީގެ ޕްރައިމަރީގެ ވޯޓުލުން ބޭއްވުމަށް ހަަމަޖެހިފައިވަނީ އަންނަ ހޮނިހިރު ދުވަހުއެވެ.
ކޮމެންޓު ފޮނުވާ