ރައްޔިތުންގެ މަޖިލީހުގެ ރައީސް، އަދި ވެރިކަންކުރާ މައި ޕާޓީ އެމްޑީޕީގެ ރައީސް، ކުރީގެ ރައީސުލްޖުމްހޫރިއްޔާ މުޙައްމަދު ނަޝީދަށް އެވަރުގެ ސެކިއުރިޓީއެއް ދައުލަތުން ދިނުމަކީ ހެޔޮވާނެކަމެއް ނޫންކަމަށް މަޝްހޫރު ދީނީ ޢިލްމުވެރިޔާ ޑރ.މުޙައްމަދު އިޔާޒް ވިދާޅުވެއްޖެއެވެ.

ރައީސް ނަޝީދަށް ވަރަށްބޮޑަށް ފާޑުވިދާޅުވާ ޑރ.އިޔާޒް ކުރެއްވި ޓްވީޓެއްގައިވަނީ ރައީސް ނަޝީދަކީ އެމަނިކިފާނު ދިރިއުޅުއްވާ ގަނޑުވަރު ވަށައިގެންހުރި ގެތަކަށް ކުނިނަގާ މީހަކަށްވެސް ވަކިއުޞޫލެއްގެ ދަށުން މެނުވީ ނުވަދެވޭގޮތަށްހައްދައި ވަރުގަދަ ސެކިއުރިޓީއަކާއެކު ދިރިއުޅުއްވާ މީހަކަށް ވާއިރު، ހަށިރައްކައްކަލަށް ކަމަށް ވިދާޅުވެ މިވަރުގެ ސެކިއުރިޓިއަކާއެކު އުޅުއްވާ ބޭފުޅަކު އިންތިޚާބުގެ ކެމްޕެއިނުގައި ޢާންމު ގޭގެއަށް ވަދެ ގޭގޭގެ ބަދިއެއަށް ވަދެ އުޅުމަކީ ހަމަޖެހޭކަމެއް ނޫންކަމަށެވެ.

"ވެރިކަމަށް ދަހިވެތިވީމާ ގޮސް ގޭގޭގެ ބަދިގެ ތެރެއަށް ވަދެ ގަރުދިޔަ ކައްކަން އޮވެވޭނަމަ ކޮބައިތޯ އެއްށްބޮޑު ސެކިއުރިޓީގެ ބޭނުމަކީ؟" ޑރ.އިޔާޒް ސުވާލުކުރައްވާފައިވެއެވެ.

ދައުރު ހަމަނުކޮށް އިސްތިޢުފާ  ދެއްވިނަމަވެސް ކުރީގެ ރައީސަކަށް ލިބޭ ޢިނާޔަތްތައް ރައީސް ނަޝީދު ބަރާބަރަށް ނަންގަވާކަމަށާ، މަޖްލިސްގެ ރައީސްގެ ޙައިޘިއްޔަތުން މުސާރަ ނަންގަވާކަމަށާ، ތިމާގެ ހަށިރައްކަލަށޭ ކިޔާފައި މާލިއްޔަތުން ބޮޑު ޚަރަދު ކުރުވައިގެން ރަތްރޮނގު ގަނޑުވަރު ވަށައިގެން ދައްމުވާފައިވާކަމަށް ޑރ.އިޔާޒް ވިދާޅުވެފައިވެއެވެ.

ރަޢްޔިތުންގެ ފައިސާ އިން މިހާބޮޑު ޚަރަދެއް އެންމެ މީހަކަށް ކުރުމަކީ ހެޔޮވާވަރުގެ ކަމެއް ނޫން. @ibusolih

— Dr.Mohamed Iyaz (@dr_iyaz) January 17, 2023

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ޓެގްކުރައްވައި ޑރ.އިޔާޒް ވިދާޅުވެފައިވަނީ ރަޢްޔިތުންގެ ފައިސާ އިން މިހާބޮޑު ޚަރަދެއް އެންމެ މީހަކަށް ކުރުމަކީ ހެޔޮވާވަރުގެ ކަމެއް ނޫންކަމަށެވެ.

ރައީސް ނަޝީދުގެ ސަލާމަތީކަންކަން ވަރުގަދަކޮށްފައިވަނީ އެމަނިކުފާނު އަވަހާރަކޮށްލަން ދިން ބޮމުގެ ޙަމަލާއަށްފަހުއެވެ. މިދިޔަ އަހަރުގެ މެއި މަހުގެ 6ވަނަ ދިވަހުގެރޭ ދިން ޙަމަލާއިން ރައީސް ނަޝީދުގެ ފުރާނަ ސަލާމަތްވީ ހަނިގޮތަކަށެވެ. ބޮމުން ބުރައިގެން ދިޔަ ރޭޒާފުކެއް އެމަނިކުފާނުގެ ހިތަށް އަމާޒުނުވެ ދިޔައީ ކިރިޔާއެވެ.