ސަރުކާރު ބަދަލު ކުރުމަށް ވައުދުވާ ކެމްޕޭނަކަށް ތާއީދު ކުރަމުން، ސިޔާސީ ވަޒީފާތަކުގައި ދެމި ތިބެންވީތަ؟

މިމަހުގެ 28 ވަނަ ދުވަހު ބޭއްވުމަށް ހަމަޖެހިފައިވާ އެމްޑީޕީގެ ރިޔާސީ ޕްރައިމަރީގެ ކެމްޕޭން އެޕާޓީގެ އެންމެ އިސް ދެ ލީޑަރުންގެ މެދުގައި ފޯރިއާއެކު ކުރިޔަށްދާއިރު، ޕާޓީގެ އެތެރޭގައި ހިގަމުންދާ ފޯރިގަދަ ކެމްޕޭނަކަށްވުރެ ބޮޑަށް މި ކެމްޕޭން ސިފަކުރެވެމުން ދަނީ ޕާޓީގެ އެންމެ އިސް ދެ ލީޑަރުންގެ ދެމެދުގަ އޮތް ސިޔާސީ ބޮޑު ވާދަވެރިކަމެއްގެ ގޮތުގައެވެ.

އަދި އެއީ ކަން އޮތް ގޮތްވެސްމެއެވެ. ސަބަބަކީ، މި ކެމްޕޭންގެ މާކުރިއްސުރެވެސް ދެބޭފުޅުންގެ މެދުގައި އުފެދިގެން ގޮސްފައިވާ ސިޔާސީ ވާދަވެރިކަން އޭގެ ހައްދުން ހެއްޓިގެން ގޮސްފައި ވާތީއެވެ.

މިގޮތުން، ރައީސް ސާލިހުގެ ވެރިކަމުގެ މެދަކާ ހަމައިން ނަޝީދާއި ރައީސް ސާލިހާއި ދެބޭފުޅުންގެ މެދުގައި އުފެދޭންފެށި މައްސަލަތައް ސިޔާސީ ވާދެވެރިކަމަށް ބަދަލުވެ، އެ ވާދަވެރިކަމުގައި ޕާޓީވެސް ވަނީ ދެ ފެކްޝަނަކަށް ބެހި، ދެ ފެކްޝަނެއްގެ ގޮތުގައި މަސައްކަތް ކުރާން ފަށާފައެވެ.

ނަތީޖާއެއްގެ ގޮތުން، ޕާޓީގެ ޕާލަމެންޓްރީ ގުރޫޕުގެ މެމްބަރުންނާއި، ގައުމީ މަޖިލީހުގެ މެމްބަރުންގެ އިތުރުން ކައުންސިލަރުންނާއި ޕާޓީގެ އާންމު މެމްބަރުންގެ ތެރެއިންވެސް ގިނަބަޔަކު ވަނީ ދެލީޑަރުންގެ ތެރެއިން ކޮންމެވެސް އެއް ލީޑަރަކު އިޚްތިޔާރުކޮށް، އެބަޔަކު ތާއީދުކުރާ ފެކްޝަނެއްގައި މަސައްކަތް ކުރާން ފަށާފައެވެ.

އެހެންނަމަވެސް ފާހަގަ ކޮށްލާންޖެހޭ މުހިންމު ނުކުތާއަކީ، އެމްޑީޕީ ދެފެކްޝަނަކަށް ބެހިގެން ދިޔައިރު، އެޕާޓީގެ ރައީސް މުހައްމަދު ނަޝީދަށް ތާއީދުކުރާ ފަރާތްތަކުގެ ތެރޭގައި ސަރުކާރުގެ ސިޔާސީ މަގާމްތަކުގަ ތިއްބެވި ބައެއް ފަރާތްތައް ތިބި ނަމަވެސް، އޭގެ ތެރެއިން ގިނަބަޔަކު މިހާތަނާއި ހަމައަށްވެސް ތިއްބެވީ އެކަން ވަންހަނާ ކޮށްގެން ކަމެވެ. އޭގެ އެއް ސަބަބެއްގެ ގޮތުގައި ބައެއް ފަރާތްތަކުން ފާހަގަ ކުރަނީ މިފަދަ ބައެއް ބޭފުޅުން ވަޒީފާ ގެއްލިގެން ދިއުމަށް ބޭނުން ނުވުމެވެ.

ހަމައެއާއެކު، ފާއިތުވެދިޔަ 2 އަހައްހާ ދުވަހު، ވެރިކަންކުރާ ކޯލިޝަންގެ ތެރޭގައި ސަރުކާރަށް ކުރިމަތިވި އެންމެ ބޮޑު ގިންޖެހުމެއްގެ ގޮތުގައި، އެމްޑީޕީގެ އެތެރޭގައި އުފެދިގެންދިޔަ ސިޔާސީ ކޯޅުން ފާހަގަވެގެން ދިޔަނަމަވެސް، މި ކޯޅުމުގައި ސިޔާސީ ވަޒީފާތަކުގެ ތިއްބެވި ބައެއް ފަރާތްތަކުން ވަކި ފަރާތަކަށް ތާއީދުކުރުން އެއީ މާބޮޑު މައްސަލައެއްގެ ސަރުކާރުން ދެކިފައެއް ނުވެއެވެ. ސަބަބެއްގެ ގޮތުގައި ފާހަގަވާން އޮތީ އުފެދިގެން އުޅޭ ހިންހަމަ ނުޖެހުންތަކާއި ޚިޔާލުތަފާތުވުން ތަކަކީ އެއް ޕާޓީއެއްގެ އެތެރޭގައި އޮތް ސިޔާސީ ޚިޔާލު ތަފާތުވުމަކަށް ވާއިރު، ސަރުކާރުގެ ސިޔާސަތުތަކާއި ދެކޮޅަށް ވަޒީފާގައި ތިއްބެވި ބައެއް ފަރާތްތަކުން ފާޅުގައި ފާޑު ވިދާޅުވަމުން ނުދިއުމެވެ.

އެހެންނަމަވެސް، އެމްޑީޕީގެ އެތެރޭގެ ރިޔާސީ ޕްރައިމަރީގެ ވާދަވެރިކަން ފެށި، ޕާޓީގެ އެންމެ އިސް ދެލީޑަރުން ކެމްޕޭނަށް ނިކުންނެވުމާއެކު ފެނިގެން ދިޔައީ، ރައީސް ސާލިހުގެ ސިޔާސަތުތަކަށް ތާއީދު ނުކުރާ، އަދި ނަޝީދަށް ތާއީދުކުރާ ބައެއް ފަރާތަތްތަކުން، ފާޅުގައި ކެމްޕޭނަށް ނިކުންނަވާން ފެއްޓެވި މަންޒަރެވެ. މީގެ ތެރެއިން ބައެއް ބޭފުޅުންނަކީ ސިޔާސީ ވަޒީފާތަކުގައި ތިއްބަވައިގެން ރައީސް ސަލިހާއި ދެކޮޅަށް ކެމްޕޭން ކުރައްވަމުން ގެންދަވާ ބޭބޭފުޅުންވެސްމެއެވެ.

ސިޔާސީ ވަޒީފާތަކުގަ، ރައީސާއި ދެކޮޅު؟

ފާއިތުވެދިޔަ ހުރިހާ ސަރުކާރުތަކުންވެސް، އެސަރުކާރެއްގެ ވެރިކަމުގައި ސިޔާސީ ވަޒީފާތައް ބަހާފައި ހުރީ އެ ސަރުކާރެއް ވެރިކަމަށް ގެނައުމަށް މަސައްކަތް ކޮށްދިން ފަރާތްތަކަށް އިސްކަން ދީގެންނެވެ. މާނައަކީ، ހުރިހާ ސަރުކާރަކުންވެސް ސިޔާސީ މަގާމްތަކަށް މީހުން އައްޔަން ކޮށްފައިހުރީ އެއްވެސް ހާލަތެއްގައި ވަޒިފާ ދޭ މީހާގެ ގާބިލްކަމަށް ބަލައިގެނެއް ނޫނެވެ. ނަތިޖާއެއްގެ ގޮތުން، ކޮންމެ ވަރިކަމެއްގައިވެސް ؛ލިބިފައިވާ އިލްމާއި ނުބައްދަލު، އަދި އެބީދައިން ވަޒީފާތައް ހައްގު ނޫން އެތައްބަޔަކު ސިޔާސީ މަގާމްތަކަށް އާދެވެ.

މިގޮތުން ބަލާއިރު، ސިޔާސީ ވަޒީފާތަކަށް އަބަދުވެސް މީހުން އައްޔަން ކުރެވެނީ ރައީސުލްޖުމުހޫރިއްޔާ ދެއްވާ މަގާމެއްގެ ގޮތުގައެވެ. އެއީ އެވަގުތަކު ހުންނަވާ ރައީސަކުގެ ހެޔޮފުޅުކަމުން ދެއްވާ ވަޒީފާތަކެވެ. އަދި ސިޔާސީ ވަޒީފާތަކަށް އައްޔަން ކުރެވެނީވެސް އެވަގުތަކު ހުންނަވާ ރައީސެއްގެ ސިޔާސަތުތަކަށް ތާއީދުކޮށް، ސަރުކާރަށް ހުރިހާ ގޮތަކުންވެސް އެއްބާރުލުން ދިނުމަށް ޝަރުތު ކުރެވުމަށްފަހުގައި ކަންވެސް ފާހަގަ ކޮށްލާން ޖެހެއެވެ.

އެހެންކަމުން، ސަރުކާރުގެ ސިޔާސީ މަގާމްތަކުގައި ތިއްބަވާ ފަރާތްތަކުން ސަރުކާރުގެ ސިޔާސަތުތަކަށް ތާއީދުކޮށް، ހުންނަވާ ވެރިއެއްގެ ސިޔާސަތުތައް ކުރިއެރުވުމަށް މަސައްކަތް ކުރުން ވެފައި އޮންނަނީ ސިޔާސީ މަގާމްތަކުގައި ތިއްބަވާ މުވައްޒަފުންގެ މައްޗަށް އޮންނަ "ޒާތީ ޒިންމާ" އެއްގެ ގޮތުގައެވެ.

އެކަން އޮންނާންވާނީ އެބީދައިންކަމުގައި ގަބޫލު ކުރާންވެސް ޖެހެއެވެ. އެއީ އަމިއްލަ ކުންފުންޏެއް ނަމަވެސް، ސަރުކާރު ނަމަވެސް، ވަޒީފާ ދޭފަރާތައް ބޯލެނބުމާއި އިޚްލާސްތެރިކަމާއި ތެދުވެރިކަން ދެއްކުމަކީ ވަޒީފާގައި ދެމިހުރުމުގެ ޝަރުތަކަށް ވާންޖެހޭނެކަމީ ސަބަބުވެރި ވިސްނުމަކުން ވިސްނާއިއިރު އެކަން އޮންނާނެޖޭ ގޮތްކަމުގައި ގަބޫލުރާން ޖެހެއެވެ.

އަދި ވަޒީފާ ދޭފަރާތުގެ ސިޔާސަތުތަކާމެދެ ހިންހަމަ ނުޖެހި، ނުވަތަ ތިމާގެ ޒަމީރު ގަބޫލު ނުކުރާ އުސޫލުތަކަށް ތިމާއަށް ބޯލަނބާން ޖެހިއްޖެ ހާލަތެއްގައި އަމަލުކުރާންޖެހޭ އެންމެ ރިވެތި އުސޫލަކީ، ވަޒީފާއެއްގައި ބަގުޑި ނުބައްދާ، ވަޒީފާ ދޫކޮށް، ތާއީދުކުރާ ވިސްނުމަކާއެކީ ކުރިޔަށް ދިއުމެވެ.

އެހެންނަމަވެސް މިއުސޫލާ ޚިލާފަށް، މިހާރު ކުރިޔަށްދާ އެމްޑީޕީގެ ރިޔާސީ ޕްރައިމަރީގައި، ރައީސް ސާލިހުގެ ސިޔާސަތުތަކަށް ފާޅުގައި ފާޑު ވިދާޅުވެ، ޒާތީގޮތުންވެސް ރައީސް ސާލިހަށް ހަޖޫ ޖެހުމާއި، މައްލަވަ ކުރުމާއި، ޕާޓީގެ އުސޫލުތަކުން ބޭރުން، އެއްގޮތަކުން ނުވިއްޔާ އަނެއްގޮތަކުންވެސް ރައީސް ސާލިހުގެ ވެރިކަން ބަދަލު ކުރުމަށް ވައުދުވެ ކުރެވެމުންދާ ނަޝީދުގެ ޕްރައިމަރީ ކެމްޕޭންގައި، ރައީސް ސާލިހު ދެއްވި ސިޔާސީ ވަޒީފާތަކުގައި ތިއްބެވި ބައެއް ފަރާތްތަކުން ދަނީ ފާޅުގައި، ރައީސާއި ދެކޮޅަށް ކެމްޕޭން ކުރަމުންނެވެ.

މީގެ ތެރޭގައި، ސަރުކާރުގެ ކެބިނެޓްގައި ނުހިމެނުނު ނަމަވެސް ވަޒީރުންގެ ފެންވަރުގައި ތިއްބެވި ފަރާތްތަކާއި، މިނިސްޓްރީތަކާއި ބޭރުގެ މިޝަންތަކާއި އަދި ކުންފުނިތަކުގެ އިސް މަގާމްތަކުގައި ތިއްބެވި ބައެއް ފަރާތްތައްވެސް ހިމެނޭކަން މިފުރުސަތު ފާހަގަ ކޮށްލާން ޖެހެއެވެ.

ވަޒީފާގައި ބަގުޑި ބެއްދުމުގެ ސަގާފަތް!

ހިނގަމުންދާ އެމްޑީޕީގެ ރިޔާސީ ޕްރައިމަރީއަކީ، ޕްރައިމަރީގެ ވާދަވެރިކަމަށްވުރެ ބޮޑަށް އެޕާޓީގެ އެންމެ އިސް ދެލީޑަރުންގެ މެދުގައި ހިނގަމުންދާ ސިޔާސީ ވާދަވެރިކަމެއްގެ ގޮތުގައި ސިފަކުރެވެމުން ދާއިރު، ސިޔާސީ ވަޒީފާތަކުގައި ތިއްބަވައިގެން ރައީސް ސާލިހާ ދެކޮޅަށް ކެމްޕޭން ކުރައްވަމުން ގެންދަވާ ޕާޓީގެ އެންމެ އިސް ފަތާރެއްގެ ގޮތުގައި ފާހަގަވާން ހުރީ ރައީސް އޮފީހުގެ މިނިސްޓަރެއްގެ މަގާމަށް އައްޔަން ކުރައްވާފަ ހުންނެވި، އަދި އެޕާޓީގެ ނާއިބުރައީސްގެ މަގާމުގައިވެސް ހުންނެވި މުހައްމަދު ޝިފާޒެވެ.

އަދި އޭގެ އިތުރުން ޕޯސްޓް ލިމިޓެޑްގެ ޑެޕިއުޓީ މެނޭޖިންގ ޑިރެކްޓަރުކަމުގެ މަގާމަށް ރައީސުލްޖުމްހޫރިއްޔާ އައްޔަން ކުރައްވާފަ ހުންނެވި އަހުމަދު އަދުހަމްގެ އިތުރުން އިނގިރޭސިވިލާތުގެ ހުންނަ ދިވެހިރާއްޖޭގެ ހައިކޮމިޝަންއަށް ރައީސުލްޖުމްހޫރިއްޔާ އައްޔަން ކުރައްވާހުންނަވާ ނައުޝާދު ވަހީދާއި އޭގެ އިތުރުން ޓުއަރިޒަމް މިނިސްޓްރީގެ އެގްޒެކެޓިވް ޑިރެކްޓަރުކަމުގެ މަގާމަށް ރައީސް ސާލިހު ހަމަޖައްސަވާފައިވާ އަލީ ހާޝިމް (ސުމިތު)ވެސް ފާހަގަ ކޮށްލެވެނީ ސިޔާސީ މަގާމްގަ ތިއްބަވައިގެން ޕާޓީގެ ޕްރައިމަރީ ކެމްޕޭންގައި ރައީސް ސާލިހަށް ތާއީދު ނުކުރާކަން ހާމަކޮށްފައިވާ ފަރާތްތަކުގެ ގޮތުގައެވެ.

ބައެއް ފަރާތްތަކުން ދެކޭގޮތުން، ސަރުކާރުގެ އިސް މަގާމްތަކުގައި ތިއްބެވި މިފަދަ ބޭފުޅުންނަށްވެސް އެބޭފުޅަކު ބޭނުންފުޅުވާ ފަރާތަކަށް ތާއީދުކޮށް ކެމްޕޭން ކުރުމަކީ އޮތް މިނިވަންކަމަކަށް ވިނަމަވެސް، އޭގެ އެންމެ ރިވެތި އުސޫލަކީ ރައިސުލްޖްމުހޫރިއްޔާ ދެއްވި ސިޔާސި މަހާމެއްގައި ހުންނަވާ، ވަޒީފާ ދިންފަރާތުގެ ސިޔާސަތުތަކާއި ފިކުރު އެއްގޮތް ނުކުރެވޭނަމަ ތިއްބެވި ވަޒީފާތަކުން އިސްތިއުފާ ދެއްވުމަށްފަހު ކެމްޕޭނަށް ނިކުންނެވުމެވެ.

އެއީ ހިނގަމުންދާ ކެމްޕޭންގައި ރައީސް ސާލިހަށް ތާއީދު ނުކުރެއްވޭތީ، ނަޝީދުގެ ކެމްޕޭނަށް އެއްބާރުލުން ދިނުމަށްޓަކާ، ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ނައިބުގެ މަޤާމުގައި ހުންނެވި، ފުވައްމުލަކު ސިޓީގެ ކުރީގެ މޭޔަރު ފަލާހު ޝަރީފް އަމަލް ކުރެއްވި ރިވެތި އުސޫލެވެ.

އޭނާވަނީ ނަޝީދަށް ތާއީދު ކުރައްވާކަން ހާމަ ކުރައްވަމުން ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ނައިބުކަމުގެ މަގާމުން އިސްތިއުފާ ދެއްވާފައެވެ.

އެހެންނަމަވެސް އެއާއި ޚިލާފަށް ރައީސް ސާލިހު ދެއްވާފައިވާ ވަޒިފާގައި ތިއްބަވައިގެން، އެހެންނަމަވެސް އެމަނިކްފާނުގެ ސިޔާސަތުތަކަށް ތާއީދު ނުކޮށް، ވެރިކަން ބަދަލުކުރުމަށް ވައުދުވަމުން ކުރިޔަށްދާ ކެމްޕޭނަކަށް ތާއީދުކުރަމުން، ވަޒީފާގައި "ބަގުޑި" ބައްދަވައިގެން ތިއްބެވި ބައެއް ފަރާތްތައް އަދިވެސް ތިއްބެވީ ބައެއް ސިޔާސީ އިސް މަގާމްތަކުގައެވެ.

ގިނަބަޔަކު ގަބޫލުކުރާ ގޮތުގައި، މއީ ޑިމޮކްރަސީގެ އެއްވެސް އުސޫލަކަށް ނުފެތޭ، އިންޓަގްރިޓީއާއި، ތެދުވެރިކަމާއި އިޚްލާސްތެރިކަމުގެ ހަމައިން ބެލިކަމުގައިވި ނަމަވެސް، ދެކޮޅު ޖެހޭ އުސޫލެއް ހަމައެއް ނޫނެވެ. އެހެންނަމަވެސް މިއީ އިއްޔެވެސް މިއަދުވެސް ރާއްޖޭގައި އޮތް ސަގާފަތެވެ. އެއީ ވަޒީފާގައި "ބަގުޑި" ބެއްދުމުގެ ސަގާފަތެވެ.