މިހާރު ކުރިއަށް އެމްޑީޕީގެ ރިޔާސީ ޕްރައިމެރީ ކެމްޕެއިންގެ ތެރޭގައި ނަޝީދަށް ތާޢީދުކުރާ އެއްވެސް މީހަކު އެމްޑީޕީގެ ޗެއަރޕާސަން އަދި އިކޮނޮމިކް މިނިސްޓަރ ފައްޔާޒު އިސްމާޢީލާއި އޭނާގެ ޢާއިލާއާ ދިމާނުކުރަން ރައީސް ނަޝިދު އެދިވަޑައިގަތުމުން ފައްޔާޒު ޝުކުރު އަދާކުރައްވައިފިއެވެ.
ރައީސް ނަޝީދު މިހެން ވިދާޅުވެފައިވަނީ އެމަނިކުފާނުގެ ސޯޝަލްމީޑިއާ ގްރޫޕެއްގައެވެ. އެގްރޫޕުގައި ރައީސް ނަޝީދު ވިދާޅުވެފައިވަނީ ކުރިއަށްއޮތް ރިޔާސީ ޕްރައިމެރީ އެމަނިކުފާނަށް ކާމިޔާބު ވާނެކަމާމެދު އެއްވެސް ޝައްކެއް ނެތްކަމަށެވެ. އެހެންކަމުން އެމަނިކުފާނުގެ އެދުމަކީ އެއްވެސް މީހަކު މިނިސްޓަރ ފައްޔާޒާއި އޭނާގެ ޢާއިލާއާ ޒާތީގޮތުން ދިމާނުކުރުންކަމަށެވެ.
ރައީސް ނަޝީދު މިހެން ވިދާޅުވީ ކީއްވެގެންކަމެއް ނޭނގެއެވެ. އެމްޑީޕީގެ ޕްރައިމެރީ ކެމްޕެއިން ފެށިފަހުން އެއްވެސް ކެނޑިޑޭޓެއްގެ އެއްވެސް ޙަރަކާތަކުން މިިނިސްޓަރ ފައްޔާޒު ނުފެނެއެވެ. މިކަމާބެހޭގޮތުން ބައެއް މީހުން ސުވާލު އުފެއްދުމުން، ފައްޔާޒުގެ ބައެއް ގާތް ބޭފުޅުން ވިދާޅުވީ ޕްރައިމެރީގެ ކެމްޕެއިން ކުރިއަށްދާއިރު ފައްޔާޒަކީ ޕާޓީގެ ޗެއަރޕާސަންކަމަށްވުމުން ވަކި ކެންޑިޑޭޓެއްގެ ކެމްޕެއިންގައި ބައިވެރިވުމަކީ ރަނގަޅުކަމަކަށް ނުވާނެކަމަށެވެ.
ރައީސް ނަޝީދުގެ މެސެޖުގެ ސްކްރީންޝޮޓަކާއެކު ފައްޔާޒު ވަނީ ޓްވީޓެއް ކުރައްވާފައެވެ. އޭގައިވަނީ މީޑިއާގައި ވެސް، އެހެން ގޮތަކުންވެސް ތިމަންނާއާ ދިމާ ކުރެވިދާނެކަމަށާ، ސިޔާސީ ޚިޔާލު ތަފާތުވުމުން މަގުމަތިން އަނބިދަރިންނާ ދިމާ ކުރުމަކީ ބަލައިގަނެވޭނެ ކަމެއް ނޫންކަމަށެވެ. އެކަން އެހެން ނުކުރުމަށް ކެމްޕޭން ޓީމަށް އިލްތިމާސް ކުރެއްވީތީ ރައީސް ނަޝީދަށް ޝުކުރު ދަންނަވަނާކަމަށެވެ.
މީޑިއާގައި ވެސް، އެހެން ގޮތަކުންވެސް އަޅުގަނޑާ ދިމާ ކުރެވިދާނެ. ސިޔާސީ ޚިޔާލު ތަފާތުވުމުން މަގުމަތިން އަނބިދަރިންނާ ދިމާ ކުރުމަކީ ބަލައިގަނެވޭނެ ކަމެއް ނޫން. އެކަން އެހެން ނުކުރުމަށް ކެމްޕޭން ޓީމަށް އިލްތިމާސް ކުރެއްވީތީ ރައީސް @MohamedNasheed ޝުކުރު ދަންނަވަން pic.twitter.com/K9ngl2U2UV
— Fayyaz Ismail (@faya_i) January 13, 2023
މިނިސްޓަރ ފައްޔާޒަކީ ރައީސް ޞާލިޙް ފެކްޝަންގެ ބޭފުޅެއްކަމަށް ވެއެވެ. މި ޕްރައިމެރީ ކެމްޕެއިންގައި ފައްޔާޒް ނުފެނުނަސް އެމްޑީޕީގެ ޤައުމީ މަޖިލީހުގައި ފައްޔާޒު ޢަމަލުކުރައްވަނީ ބޭއިންސާފުން ރައީސް ޞާލިޙަށް ފަހިވާގޮތަށްކަމަށް ބުނެ ނަޝީދު ފެކްޝަނުގެ މެމްބަރުން އަންނަނީ ނުރުހުން ފާޅުކުރަމުންނެވެ. ރިޔާސީ ޕްރައިމެރީ އިންތިޚާބާ ބެހޭ ކޮމިޓީ އެކުލަވާލަން އެންމެފަހުން ބޭއްވި ޤައުމީ މަޖިލީހުގެ ބައްދަލުވުމުގައިވެސް ނަޝީދު ފެކްޝަނުގެ މެމްބަރުންނާއި ފައްޔާޒާ ދެމެދު ވަރަށް ހޫނު ބަހުގެ ޙަމަލާތައް ބަދަލުކުރިއެވެ. އަދި އެދުވަހުގެ ޖަލްސާ ހޫނުވެ ނަޝީދު ފެކްޝަނުންވަނީ ޖަލްސާ ދޫކޮށް ނުކުމެފައެވެ.
