މޯލްޑިވްސް ކަރެކްޝަނަލް ސަރވިސްގެ އައްސޭރި ޖަލުގެ 14 ވަނަ އަހަރީ ދުވަސް ކުލަގަދަކޮށް ފާހަގަކޮށްފިއެވެ.
އަހަރީ ދުވަސް ފާހަގަކުރުމުގެ ގޮތުން ކަރެކްޝަންސްއިން ވަނީ ފަތިސް ނަމާދަށްފަހު ދިދަ ނެގުމުގެ ރަސްމިއްޔާތެއް ބާއްވާފައެވެ. އެއަށްފަހު އެ ސާވިސްއިންވަނީ މިއަދު މެންދުރު އަހަރީ ދުވަހުގެ ރަސްމިއްޔާތު ބައްވާފައެވެ. މީގެއިތުރުން 14ވަނަ އަހަރީ ދުވަސް ފާހަގަ ކުރުމުގެ ގޮތުން ޑިނަރ ނައިޓެއް ވެސް ބޭއްވުމަށްވެސް ކަރެކްޝަންސްއިން ވަނީ ނިންމާފައެވެ.
ކަރެކްޝަންސްއިން މިއަދު ބޭއްވި އަހަރީ ދުވަހުގެ ރަސްމިއްޔާތު ޝަރަފުވެރިކޮށްދެއްވީ ކޮމިޝަނަރ އޮފް ޕްރިޒަންސް އަޙްމަދު މުޙައްމަދު ފުޅުއެވެ. ކޮމިޝަނަރގެ އިތުރުން މި ރަސްމިއްޔާތުގައި ޑެޕިއުޓީ ކޮމިޝަނަރ އޮފް ޕްރިޒަންސް އުސްތާޛް އިބްރާހިމް މުޙައްމަދު ދީދީ، އެސިސްޓަންޓް ކޮމިޝަނަރ އޮފް ޕްރިޒަންސް މުޙައްމަދު އާސިފް، އައްސޭރި ޖަލުގެ ޑައިރެކްޓަރ، އެސިސްޓެންޓް ސްޕްރިންޓެންޑެންޓް އޮފް ޕްރިޒަންސް ޢަބްދުﷲ އަމީން އާއި ކޮމިޝަންޑް އޮފިސަރުންނާއި އައްސޭރި ޖަލުގެ ގިނަ އަދަދެއްގެ އޮފިސަރުން ބައިވެރި ވެފައި ވެއެވެ.
މި ރަސްމިއްޔާތުގައި ކަރެކްޝަންސްއިން ވަނީ ވޭތުވެދިޔަ އަހަރު ހާޟިރީއަށާއި އެހެނިހެން ރޮނގުތަކުން ފާހަގަކޮށްލެވޭ އޮފިސަރުންނަށާއި މުވައްޒަފުންނަށް ހަނދާނީ ފިލާ އާއި ލިޔުން ވަނީ ހަވާލުކޮށްފައެވެ.
މި ރަސްމިއްޔާތުގައި ވާހަކަ ދައްކަވަމުން ކޮމިޝަނަރ އޮފް ޕްރިޒަންސް އަޙްމަދު މުޙައްމަދު ފުޅުވަނީ އައްސޭރި ޖަލަށް ގިނަ އުމްރާނީ އިސްލާހުތަކެއް ގެންނަންޖެހޭކަމަށް ވިދާޅުވެފައެވެ. އަދި މިމަސައްކަތްތަކަށް ކޯވިޑް-19 ގެ ގޮންޖެހުންތަކުން ލަސްތަކެއް ކުރިމަތިވީ ނަމަވެސް، އައްސޭރި ޖަލުގެ އޮފިސަރުންނާއި މުވައްޒަފުންގެ ބުރަ މަސައްކަތުން ރޭވިފައިހުރި ބައެއް ކަންތައްތައް ފުރިހަމަކޮށްފައިވާކަން ކޮމިޝަނަރ ފާހަގަކުރެއްވިއެވެ.
އެގޮތުން ކުޑަކުދިންގެ ޢަދުލުގެ ޤާނޫނު ވުޖޫދުވެ، އައްސޭރި ޖަލުގެ އޮފިސަރުންނާއި ޤައިދީންގެ ބުރަ މަސައްކަތުންނާއި ޕްރިސްކޯގެ ދީލަތި އެހީތެރިކަމުން، ކުށްކުރާ ކުޑަކުދިން ބޭއްތިއްބުމަށް ޖުވެނައިލް ޑިޓެންޝަން ސެންޓަރ ތައްޔާރުކޮށް ހުޅުވަން ބޭނުންވި ދުވަހަށް އެކަން ވުމަކީ އެމްސީއެސްއަށް ލިބުނު ވަރަށްބޮޑު ކާމިޔާބީއެއްކަން ކޮމިޝަނަރ ފާހަގަކުރެއްވިއެވެ.
