ރައީސް ޔާމީން މިނިވަން ކުރުމަށް ގޮވާލާ އިދިކޮޅު ފަރާތްތަކުން މާލޭގައިި ކުރަމުން ގެންދާ ސިލްސިލާ މުޒާހަރާތަކުގެ ތެރެއިން ރޭގެ މުޒާހަރާގައި ދުވަސްވީ އަންހެނަކު ހައްޔަރު ކުރުމުގައި އަމަލުކޮށްފައިވާ ގޮތް ސާފުކޮށްދޭން ޖެހޭކަމަށް އެމްޑީޕީގެ ޕީޖީ ގްރޫޕް މެމްބަރު އިމްތިޔާޒު ފަހުމީ ވިދާޅުވެއްޖެއެވެ.

ރޭގެ މުޒާހަރާއި އުމުރުން ދުވަސްވީ އަންހެނަކު ފުލުހުންގެ ބެލުމުގެ ދަށަށް ގެންދާ މަންޒަރު އާއްމުވެފައިވާއިރު ފެންނަނީ ފުލުހުންނަށް ނުކިޔަމަންތެރިކަން ދައްކާ ގަދަބާރު ދައްކާ މީހުން ހައްޔަރުކުރާ ބީދައިން، އަތުގެ ކުޑަހުޅުވެސް ލަނބާލާފައިވާ ތަނެވެ. މިކަމާއި ގުޅިގެން ސޯޝަލް މީޑިއާގައި ފުލުހުންނަށް ވަނީ ވަރަށް ބޮޑަށް ފާޑުކިއުން އަމާޒުވެފައެވެ.

މިމައްސަލާގައި އިންތި ވިދާޅުވީ ޤާނޫނު އަސާސީން ލިބިދީފައިވާ އެއްވެ އުޅުމާއި ޚިޔާލް ފާޅު ކުރުމުގެ މިނިވަންކަމުގެ ދަށުން އެއްވެ އުޅުނު އުމުރުން ދުވަސްވީ މީހަކު ހިފާ ހައްޔަރު ކުރަންޖެހޭ ސަބަބު ފުލުހުން ހާމަކޮށްދޭންޖެހޭކަމަށެވެ.

ފަހަތުން ދުވެގޮސް ޝުޢޫރުފާޅުކުރާ އުމުރުން ދުވަސްވީ އަންހެން ބޭފުޅުން ހިފާ ހައްޔަރުކުރަންޖެހޭ ސަބަބަކީ ކޮބާ؟ https://t.co/zpZbsw8Jb1

— 𝐈𝐦𝐭𝐡𝐢𝐲𝐚𝐳 𝐅𝐚𝐡𝐦𝐲 (@Imthiyazfahmy) January 8, 2023

މި އަންހެންމީހާ ހައްޔަރުކުރި ގޮތާމެދު ސޯޝަލްމިޑިއާގައި ގިނަބަޔަކު އަންނަނީ ފުލުހުންނަށާއި ސަރުކާރަށް ވަރަށްބޮޑަށް ފާޑުކިޔަމުންނެވެ. އެގޮތުން އެވަރުގެ ދުވަސްވީ އަންހެނެއް ހައްރުކުރުމުގައި އެނޫން ގޮތެއް އޮންނަންޖެހޭނެކަމަށް ޢާންމުން ބުނެއެވެ. އަދި މިއީ ވަރަށް ހަޑިހުތު މަންޒަރެއްކަމަށާ، މިކަމާމެދު ފުލުހުން މަޢާފަށް އެދެންޖެހޭނެކަމަށްވެސް ބައެއް މީހުން ބުނެފައިވެއެވެ.

ރައީސް ޔާމީންގެ މައްޗަށް ތުހުމަތު ކުރެވުނު ޚިޔާނާތުގެ މައްސަލަތަކެއް ސާބިތުވެ ދަށުކޯޓުން އެމަނިކުފާނު 11 އަހަރަށް ޖަލަށްލާން ޙުކުމްކުރުމާއެކު، އެޙުކުމަކީ ސަރުކާރުގެ ނުފޫޒުން ބޭއިންސާފުން ކޮށްފައި އޮތް "ޙަރާމް ޙުކުމެއް"ކަމަށް ބުނެ އިދިކޮޅު ފަރާތްތަކުން އަންނަނީ ސިލްސިލާ މުޒާހަރާތަކެއް ކުރަމުންނެވެ. މާލޭގެ މަގުތަކުގައި ކޮންމެ ރެއަކު އެމުޒާހަރާތައް ކުރަމުންދެއެވެ. އަދި އަތޮޅުތަކުގެ ބައެއް ރަށްރަށުގައި ބައެއް ރޭރޭގައާއި ސަރުކާރުގެ އިސް ބައެއް ބޭބޭފުޅުން އެރަށްރަށަށް ވަޑައިގަންނަވާ ވަގުތުތަކާ ދިމާކޮށް މިމުޒާހަރާތައް ބާއްވައެވެ.

މާލޭގައި ކޮންމެރެއަކު ކުރާ މުޒާހަރާތަކުން ކޮންމެރެއަކުވެސް ގިނަބަޔަކު ހައްޔަރުކުރެއެވެ. އެހެންނަމަވެސް 24 ގަޑިއިރުގެ ތެރޭގައި އޭގެތެރެއިން ގިނަބަޔަކު، ދޫކޮށްލައެވެ. ގިނަދުވަސްދުވަހު އެންމެންވެސް ދޫކޮށްލައެވެ. ރޭގެ މުޒާހަރާގައި ބައިވެރިވި ޢުމުރުން ދުވަސްވީ އަންހެނަކު ހައްޔަރުކުރި މަންޒަރު ފެންނަ ވީޑިއޯއެއް ސޯޝަލް މީޑިއާގައި މިހާރު ދަނީ ދައުރުވަމުންނެވެ. މި ވިޑިއޯގައި އަންހެންމީހާ ފަހައި ދުވެ އޭނާ ގަދަކަމުން އަތުލައިގަނެއެވެ. އަދި އަތް އަނބުރާލައި ޙާލަތާ ނުބައްދަލު ބާރުގެ ބޭނުން ފުލުހުން ކޮށްފައިވާކަމަށް ގިނަބަޔަކު ދެކެއެވެ.