ރާއްޖޭގެ އެއްވެސް ރަށެއްގެ އެއްވެސް ރައްޔިތެއް ބާކީނުކޮށް ހަމަހަމަ ކަމާއިއެކު ޚިދުމަތްދީ، ޚިޔާލްފާޅު ކުރުމާއި ބަސްބުނުމުގެ ހައްގު ކަށަވަރުކޮށް ދެވިފައިވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
އެމްޑީޕީގެ ޕްރައިމަރީގައި ވާދަކުރައްވާ ރައީސް ޞާލިހު ކެމްޕެއިންގައި ރ.މާކުރަތު އެމްޑީޕީ މެމްބަރުންނާއި ބައްދަލު ކުރައްވައި ވިދާޅުވީ އެމަނިކުފާނުގެ ސިޔާސަތަކީ ކޮންމެ ރަށެއްގައި ހުރި ކޮންމެ މީހަކީވެސް އަސަސީ ހައްގުތައް ލިބެންޖެހޭ އެކަމުގެ ކަށަވަރުކަން އޮތް މީހަކަށް ވުމަށްކަމަށެވެ.
ކުރީ ސަރުކާރުތަކުން ރަށްރަށުގެ ތަރައްގީއަށް އަދި އަސާސީ ހިދުމަތަކަށް ކުރަންޖެހޭ އެއްވެސް ކަމެއް ކުރަނީ ވަކި ފިކުރަކަށް ބޯލަނބައިގެން ތިބި ރަށްތަކަށް ކަން ފާހަގަކުރައްވާ ރައީސް ވިދާޅުވީ އެމަނިކުފާނުގެ ވެރިކަމުގައި އެއްވެސް ރަށެއް ބާކީނުކޮށް ހުރިހާ ރަށެއްގައި ތަރައްގީގެ މަޝްރޫއުތައް ހިންގަމުންދާ ކަމަށެވެ.
ރައީސް އިތުރަށް ވިދާޅުވީ ރައްޔިތުންނަށް ހަމަހަމަކޮށް ހިދުމަތް ކޮށްދިނުމާއި ބަސް ބުނުމުގެ މިނިވަންކަން ލިބިގެންދިޔައީ އެމަނިކުފާނުގެ ސަރުކާރާއެކު ކަމަށެވެ. އަދި އެކަން ދެމި އޮންނާނީ ވެސް އެމަނިކުފާނު ދެ ވަނަ ދައުރަަކަށް އިންތިހާބުވެ ކުރެއްވުމުން ކަމަށް ވިދާޅުވިއެވެ.
ރައީސް @ibusolih އެމްޑީޕީ މާކުރަތު މެންބަރުންނާ ބައްދަލު ކުރެއްވުން. މާކުރަތު މެމްބަރުން ތިބީ މި ޕާޓީ ކުރިއށް ގޮސް ރިޔާސީ އިންތިހާބު ކާމިޔާބު ކުރަން#MDPKuriah #Ibu2023 pic.twitter.com/T2vwmlTpa5
— MDP Kuriah (@MDPKuriah) January 6, 2023
އެމްޑީޕީގެ ވެރިކަންތަކުގެ މާޒީއަށް ބަލައި މެމްބަރުންނާއި މުޚާތަބު ކުރައްވަމުން ރައީސް ޞާލިހު ވިދާޅުވީ އެމްޑީޕީއަށް 2008 ވަނަ އަހަރު ލިބުނު ވެރިކަމުގައި ކަންކަން ވެގެންދިޔައީ ވަރަށް ދެރަކޮށް ކަމަށެވެ. ވެރިކަން ނިމިގެންދިޔައީ އެންމެ ބޭނުންވާ ގޮތަށް ނޫންކަން ފާހަގަކުރައްވައި ރައީސް ވިދާޅުވީ އެކަންކަން ތަކުރާރުވިޔަ ނުދިނުމަށް ކުރަންޖެހޭ ކަންކަން މިހާރުވެސް ކުރައްވަމުންދާކަމަށެވެ.
2013 އިން 2018 އަށް އެމްޑީޕީގެ އާންމު މެމްބަރުން ތިބި ހާލަތާއިމެދު ވާހަކަ ދައްކަވަމުން ރައީސް ވިދާޅުވީ ރައީސް ޔާމީންގެ ވެރިކަމުގެ ފަސްއަހަރަކީ ކިހިނެތް ހިނގަދިޔަ ފަސްއަހަރުކަން ދިވެހި ކޮންމެ ރައްޔިތަކުވެސް ހަނދާން ހުންނާނެކަމަށެވެ. ވަކިިން ޚާއްސަކޮށް އެމްޑީޕީގެ މެމްބަރުން ރެއާއި ދުވާލު މަގުމަތީގައި ވީގުރުބާނީއަކީ ބޮޑު ގުރުބާނީއެއް ކަމަށެވެ.
ކުރިއަށް އޮތް ތަނުގައިވެސް އެމްޑީޕީގެ މެމްބަރުން އެންމެބޮޑަށް ވިސްނަންވީ އެދުވަސް އަލުން އިޔާދަ ނުވާނޭހެން ކަންކަން ބައްޓަން ކުރަންކަމަށް ރައީސް ވިދާޅުވިއެވެ. ސިޔާސީގޮތުން އެމްޑީޕީއަށް ވެރިކަން ކުރެވޭނެ ގޮތަކާއި އެފުރުސަތު ތަނަވަސްވަނީ ކިހިނެތް ކަންކަން ކޮށްގެން ކަމާއިމެދު އެމްޑީޕީގެ މެމްބަރުންނަށް މިހާރު އޮޅިފައި ނުވާނެކަމަށް ރައީސް ޞާލިހު ވިދާޅުވިއެވެ.
ރައީސްގެ ކެމްޕެއިންގައި މިއަދު ފުރަތަމަ ވަޑައިގެންފައިވަނީ ރ. މާކުރަތެވެ. އެ ރަށުގައި ތިބި އެމްޑީޕީގެ މެމްބަރުންނާ ބައްދަލު ކުރެއްވުމަށް ފަހު، އެމަނިކުފާނުގެ ދެވަނަ މަންޒިލަކީ ރ. އިންނަމާދޫއެވެ. އެ ރަށުގައި ތިބި އެމްޑީޕީގެ މެމްބަރުންނާ ރައީސް ބައްދަލު ކުރައްވާނެއެވެ. އެއަށް ފަހު، ރައީސް ވަޑައިގަންނަވާނީ ރ. މީދޫއަށެވެ. އެ ރަށުގައި ހާއްސަ ޖަލްސާއެއް އޮންނާނެއެވެ.
