އެމްޑީޕީގެ ޕްރައިމަރީގައި ވާދަކުރައްވާ ރައީސް އިބްރާހިމް މުހައްމަދު ޞާލިހުގެ ފަރާތްޕުޅުން ރޭ ފެނިގެން ގޮސްފައިވަނީ ކެތްތެރިކަމުގެ ލާމަސީލު ނަމޫނާއެއް ކަމުގައި އެމަނިކުފާނުގެ އަނބިކަނބަލުން މެޑަމް ފަޒުނާ ވިދާޅުވެއްޖެއެވެ.
މެޑަމް ފަޒުނާ މިހެން ވިދާޅުވީ ރައީސް އެމްޑީޕީ ހަރުގޭގައި އެމަނިކުފާނުގެ ސަޕޯޓަރުންނާއި ބައްދަލު ކުރެއްވުމަށް ޖަލްސާ ބޭއްވި ވަގުތު އިދިކޮޅު ޕީޕީއެމްގެ ފޯރިގަދަ ޖަލްސާއެއް އާޓްފިޝަލް ބީޗުގައި ކުރިއަށް ދިއުމަށް ޖާގަ ދެއްވުމުން އެކަމަށް ތައުރީފް ކުރައްވައި ކުރެއްވި ފޭސްބުކް ޕޯސްޓެއްގައެވެ.
މެޑަމް ފަޒުނާ ވިދާޅުވީ ރޭ ރައީސް ޞާލިހުގެ ފަރާތްޕުޅުން ފެނިގެން ގޮސްފައިވަނީ ކެތްތެރިކަމުގެ ލާމަސީލު މިސާލެއް ކަމަށެވެ. ޚިޔާލްފާޅު ކުރުމުގެ މިިނިވަންކަން އިންތިހާއަށް ދެއްވައި، އެއްވެސް ސިޔާސީ މީހަކު ޚިޔާލް ފާޅުކޮށްގެން ހައްޔަރުނުކޮށް ހަމަނުހުމެއް ނެތި އެއް ސަރަހައްދެއްވައި ވާދަވެރިންނާއިއެކު ޖަލްސާއެއް ނިންމާލުމަކީ ފެނިގެންދިޔަ އުފާވެރި މަންޒަރެއްކަމަށް ފަޒުނާ ވިދާޅުވިއެވެ.
ހަމަނުޖެހުމެއް ނުހިނގާ. ބާރުގެ ބޭނުން ނުކޮށް އިދިކޮޅު ޖަލްސާއަށް ހުރަހެއް ނާޅާ. ނުހުއްޓުވާ. މީހަކު ހައްޔަރެއް ނުކުރޭ.
– ފަޒުނާ ވިދާޅުވެފައިވެއެވެ.
ފަޒުނާ ވިދާޅވީ މި ސަރުކާރުގައި ހިޔާލުފާޅުކުރުމުގެ ފުރިހަމަ މިނިވަންކަން އޮތްކަން ރޭ ފެނިގެން ދިޔަ ކަމަށާއި ރެއަކީ ތާރީހީ ރެއެއް ކަމަށެވެ. މެޑަމް ފަޒްނާ ރޭގެ ޖަލްސާއަށް އެމްޑީޕީ ހަރުގެ ސަރަހައްދަށް ވަޑައިގެންނެވި ނަމަވެސް އެކަމަނާ ހަރުގެ ތެރެއަށް ވަދެވަޑައިގެންފައެއް ނުވެއެވެ.
ރޭ އެމްޑީޕީގެ މައި ޖަގަހައިގައި "ކުރިޔަށް" މި ނަމުގައި ބޭއްވުނު ރައީސް ސާލިހުގެ ފެކްޝަންގެ އެމްޑީޕީ ޕްރައިމަރީގެ ފުރަތަމަ ރަސްމީ ބައްދަލުވުމުގައި ވާހަކަ ދައްވަމުން ރައީސް ސާލިހު ވިދާޅުވީ އެމަނިކްފާނު ނިކުމެ ހުންނެވީ ރާއްޖޭގައި ސުލްހައާއި ހަމަޖެހުން ގާއިމް ކޮށްދެއްވުމަށް ކަމަށާއި، 2013 ވަނަ އަހަރުން ފެށިގެން 2018ވަނަ އަހަރާއި ހަމައަށް ރާއްޖެއާއި މާލޭގެ ހާލަތު އޮތީ އުދަގުލާއި ބިރުވެރިކަމާއި ނާމާން ކަމުގައި ކަމަށެވެ.
އެހެންނަމަވެސް، 2018 ވަނަ އަހަރު އެމަނިކްފާނު ވެރިކަމަށް ވަޑައިގެންނެވުމަށް އެހާލަތު ބަދަލު ކޮށްލާފައި ވާކަމަށް ވިދާޅުވަމުން ރައީސް މިސާލު ޖެއްސެވީ، އެމްޑީޕީގެ ކެމްޕޭން ޖަގަހަ ކުރިމަތީގައި އޮތް އާރޓިފިޝަލް ބީޗް ސަރަހައްދުގައި އެވަގުތު ހިނގަމުންދިޔަ އިދިކޮޅު ޕީޕީއެމްގެ އެއްވުމަށް އިޝާރާތް ކުރައްވަމުންނެވެ.
ޚިޔާލު ފާޅުކުމުގެ މިނިވަންކަމާއި އެއްވެ އުޅުމުގެ މިނިވަންކަން މިއޮތީ ތަންމިނަށް ހުޅުވާލާފަ. ޖެހިގެން މިއޮތީ، ކުރިޔަށް ގެންދަނީ އެއޮށް. ކުރިޔަށް ގެންދަނީ އެއޮށް. އެއްވެސް މީހަކު ބަންދު ކުރޭތޯ އެބަ؟ އެއްވެސް މީހަކު ކުރޭތޯ އެބަ؟ މިތާ އަޅުގަޑުމެންނަށް ޖަލްސާ ނުބޭއްވިގެން މިދަނީ. އެހެންވިޔަސް އެ މިނިވަންކަމާ އެކީގާ އެބޭފުޅުންގެ ޚިޔާލު ފާޅުކުރުމަށް އަޅުގަޑުމެން މިއޮތީ ޖާގަ ދީފަ. ހައްޔަރު ނުކުރިޔަސް، ބަންދު ނުކުރިޔަސް ވެރިކަން ކުރެވޭނެކަން އަޅުގަޑުމެން މިދަނީ ދައްކަމުން.
– ރައީސް ވިދާޅުވިއެވެ.
ރޭ ރައީސް ސާލިހު ފެކްޝަނުން ކުރިޔަށް ގެންދިޔަ ޕްރައިރީ ކެމްޕޭން ޖަލްސާ ހިނގަމުންދިޔަ ވަގުތާއި ދިމާކޮށް އިދިކޮޅު ފަރާތްތަކުން ބީޗް ސަރަހައްދުގައި ކުރިޔަށް ގެންދިޔަ އެއްވުމަށް އިޝާރާތް ކުރައްވަމުން ރައީސް ސާލިހު ވިދާޅުވިއެވެ.
