ރައީސް އިބްރާހިމް މުހައްމަދު ސޯލިހު ބައިވެރިވެވަޑައިގަންނަވާ ރިޔާސީ ޕްރައިމަރީގެ ކެމްޕެއިންގެ ފުރަތަމަ ޖަލްސާ މިރޭ އެމްޑީޕީގެ މައި ހަރުގޭގައި ބާއްވާއިރު އެތަނުގެ ކުރިމަތީގައި، އާޓިފިޝަލް ބީޗުގައި އިދިކޮޅުން މުޒާހަރާކުރަން ނިންމައިފިއެވެ.

ރައީސް ޔާމީން ޖަލަށްލީ ދުވަހުން ފެށިގެން ކޮންމެ ރެއަކުވެސް އިދިކޮޅު ޕީޕީއެމްއާއި ޕީއެންސީ އިން ގެންދަނީ މާލޭގައި މުޒާހަރާ ކުރަމުންނެވެ. އެގޮތުން މިރޭވެސް ސިލްސިލާ މުޒާހަރާގެ ތެރެއިން އަޑު އުފުލުން އޮތީ އާޓްފިޝަލް ބީޗު އެމްޑީޕީ އޮފީސް ކުރިމަތީގައިކަމަށް ޕީޕީއެމްއިން ވަނީ ބުނެފައެވެ. ޕީޕީއެމްގެ ހަރަކާތް ފަށާ ގަޑިއަކީ މިރޭ 8:45 އެވެ.

ޕީޕީއެމްއިން މިރޭ މުޒާހަރާ ކުރަން ނިންމާފައިވަނީ އެމްޑީޕީގެ ޖަގަހަވެސް ހިމެނޭ ސަރަހައްދުގައެވެ. މިރޭ 9 ޖަހާއިރު ރައީސް ޞާލިހު ބައިވެރިވާ ޕްރައިމަރީގެ ކެމްޕެއިން ޖަލްސާއެއްވެސް ބޭއްްވުމަށް ވަނީ ހަމަޖެހިފައެވެ.

ޕީޕީއެމްގެ ތަރުޖަމާން ހީނާ ވަލީދު ވިދާޅުވީ މި ހަރަކާތް އާޓިފިޝަލް ބީޗުގައި ކުރިއަށް ގެންދިއުމަށް އިއްޔެގެ ވަގުތެއްގައި މާލެ ސިޓި ކައުންސިލުން ހުއްދަ ދީފައިވާ ކަމަށެވެ. އަދި މި ހަރަކާތުގެ ސަލާމަތީ ކަންކަން ބަލައިދިނުމަށް ފުލުހުންގެ ކިބައިން އެދިފައިވާ ކަމަށެވެ.

މި މަހުގެ 28 ވަނަ ދުވަހު ބާއްވާ އެމްޑީޕީގެ ޕްރައިމަރީގެ ކެމްޕެއިންގައި ރައީސްގެ ޝިއާރަކީ އެމްޑީޕީ "ކުރިއަށް" އެވެ. އެމަނިކުފާނާ ވާދަކުރައްވާ އެމްޑީޕީގެ ރައީސް އަދި މަޖިލީހުގެ ރައީސް މުހައްމަދު ނަޝީދު ގެންދަވަނީ ފޯރީގައި ކެމްޕެއިން ހަރަކާތްތައް ހިންގަމުންނެވެ. މާލޭގައި ޑޯޓުޑޯ ކެމްޕެއިންތަކާއި އެކި ސަރަހައްދުތަކުގައި ނަޝީދުގެ ކެމްޕެއިން ޖަލްސާތައް އަންނަނީ ބާއްވަމުންނެވެ. އަދި މިއަދު ހިޔާ ފްލެޓް ސަރަހައްދަށް ވަޑައިގެން، ހާއްސަ ސައެއް ބާއްވަން ވެސް ނިންމާފައިވެއެވެ.