ހާސްކަމާއި ގޮންޖެހުންތަކާއި ނުތަނަވަސްކަމުން ފުރިގެންވާ އަހަރެއް ފާއިތުވެގެން ދިއުމަށްފަހު، މުޅި ދުނިޔެ މިއަދު މިވަނީ، އުއްމީދީ އާއަހަރަކަށް އަނެއްކާވެސް މަރުހަބާ ކިޔާފައެވެ.

މިގޮތުން ދުނިޔޭގެ އެކި ކަންކޮޅުތަކުން ރެއާއި މިއަދު 2023 ވަނަ އަހަރަށް، ބަޑިބޭހާއި މުއިޒިކާއި އަދި އެނޫންވެސް ތަފާތު އެތައް ހަރަކާތަކާއެކު މަރުހަބާ ކިޔާފައިވާއިރު، ރާއްޖޭގައިވެސް ފުރަ މާލޭގެ އިތުރުން ރިސޯޓުތަކާއި ރާއްޖޭގެ އެކި ކަންކޮޅުތަކުގައިވެސް ވަނީ އާ އަހަރަށް މަރުހަބާ ކިޔުމުގެ ގޮތުން ބަޑިބޭހުގެ ކުޅިވަރުތައް ބާއްވާފައެވެ.

ދުނިޔެއަށް އިގްތިސަދީ ގޮތުންނާއި އަދި ހަގުރާމާއިގެ ބިރުވެރިކަމުން އެތައް އުދާސްތަކެއް ގެނުވި 2022 ވަނަ އަހަރަށް ދުނިޔެ އަލްވަދާއި ކިޔުމަށްފަހު، އާއަހަރަށް މަރުހަބާ ކިޔުމުގެ ގޮތުން ގިނަބަޔަކު އާއަހަރުގެ ތަހުނިޔާ ބަދަލުކޮށް، ފެށިގެންދިޔަ 2023 ވަނަ އަހަރަކީ އުއްމީދީ އަހަރރެއްގެ ގޮތުގައި ސިފަކޮށް، އާއަހަރަށް ދެކޭ ހުވަފެންތަކުގައި ހަގީގީ ކުލަ ޖެއްސުމަށް ގިނަ ބަޔަކު ކަމަރު ބަނދެފައިވާއި، ކުރިޔަށް އަހަރުވެސް ވެގެންދާނީ އިގްތިސާދީ ގޮތުންނާއި އަދި ދޭދޭ ގައުމުތަކުގެ މެދުގައި ހުރި ބޮޑެތި މައްސަލަތަކުން ދުނިޔޭގެ ސަލާމަތަށް އެތައް ނުރައްކަލެއް ކުރިމަތި ކުރުވާނެ އަހަރެއްގެ ގޮތުގައި ގިނަ ބަޔަކު ދަނީ ސިފަކުރަމުންނެވެ.

ހަމަ އެއާއެކު، ފާހަގަ ވާން އޮތްކަމަކީ މީލާދީ އާއަހަރަށް ދިވެހިރާއްޖެއިންވެސް މަރުހަބާ ކިޔާފައިވާއިރު، މިފެށޭ އަހަރަކީ ދިވެހިރާއްޖެއަށް ހުރިހާ ގޮތަކުންވެސް މުހިންމު އަހަރަކަށް ވެގެންދާނޭ ކަމެވެ.

ކުރިޔަށް އޮތީ ރިޔާސީ އިންތިޚާބުގެ އަހަރު!

މުޅި ދުނިޔެވެސް އާ އަހަރަކަށް މަރުހަބާ ކިޔާފައިވާއިރު، ކުރިޔަށް މިއޮތް 2023 ވެގެންދާނީ ދިވެހިރާއްޖެއަށް ހުރިހާ ގޮތަކުންވެސް ޚާއްސަ އަހަރެއް ކަމުގައެވެ. އޭގެ އެންމެ ބޮޑު އެއް ސަބަބަކީ މިއަހަރަކީ އެތައް ބައެއްގެ އުއްމީދާއި ގުޅިފައިވާ ރިޔާސީ އިންތިޚާބު ބޭއްވިގެންދާނެ އަހަރު ކަމުގައި ވެގެންދާނެތީއެވެ.

މިގޮތުން، 2023 ވަނަ އަހަރުގެ ރިޔާސީ އިންތިޚާބު މިއަހަރުގެ ސެޕްޓެމްބަރު ބޭއްވުމަށް ހަމަޖެހިފައިވާއިރު، އިލެކްޝަންސް ކޮމިޝަނުން މިހާރު ވަނީ މި އިންތިޚާބަށް 90 މިލިއަން ރުފިޔާގެ ބަޖެޓެއް ކަނޑައަޅާފައެވެ. އަދި އެ ކޮމިޝަނުން އިންތިޚާބަށް ގިނަގުނަ ތައްޔާރީތަކެއް ވާން ފަށާފައިވާއިރު، ސިޔާސީ ބައެއް ޕާޓީތަކުންވެސް މިހާރުވަނީ އެޕާޓީތަކުގެ ޓިކެޓް ޕާޓީތަކުގެ ކެނޑިޑޭޓުންނާ ހަވާލު ކޮށްފައެވެ. މިގޮތުން އިދިކޮޅު ޕީޕީއެންމްގެ ރިޔާސީ ޓިކެޓް، ޖަލަށް ލާފައިވާ އެޕާޓީގެ ރައީސް ޔާމިންއާއި ހަވާލު ކޮށްފައިވާއިރު، އެންމެ ފަހުން އުފެއްދި އެމްއެންޕީން ކުރިޔަށް އޮތް ރިޔާސީ އިންތިޚާބުގައި ވާދަކުރާނެ ކެނޑިޑޭޓެއްގެ ގޮތުގައި އެޕާޓީގެ ރައީސް ކާނަލް ނާޒިމް މިހާރުވަނީ ކަނޑައަޅާފައެވެ.

ހަމަ އެއާއެކު، ސަރުކާރު ހިންގާ ކޯލިޝަންގައި ހިމެނޭ އެންމެ ބޮޑު ޕާޓީ ކަމުގައިވާ އެމްޑީޕީގެ ފަރާތުން ރިޔާސީ އިންތިޚާބުގައި ވާދަކުރާނޭ ކެނޑިޑޭޓަކު އައްޔަން ކުރުމަށްޓަކާ އެޕާޓީގެ ރިޔާސީ ޕްރައިމަރީ މިމަހުގެ 28ވަނަ ދުވަހު ބޭއްވުމަށް ދަނީ ތައްޔާރު ވަމުންނެވެ. މި ޕްރައިމަރީގައި ވާދަ ކުރެއްވުމަށްޓަކާ ޕާޓީގެ އެންމެ އިސް ދެ ލީޑަރުކަމުގައި ރައީސް ސާލިހުއާއި ރައްޔިތުންގެ މަޖިލިހުގެ ރައީސް މުހައްމަދު ނަޝީދު މިހާރު ގެންދަވަނީ ކެމްޕޭން ކުރައްވަމުންނެވެ.

އެހެންކަމުން މިހިނގާ ޖެނުއަރީމަސް ނިމިގެންދާއިރު، އެމްޑީޕީގެ ފަރާތުން ރިޔާސީ އިންތިޚާބުގައި ވާދަކުރާނޭ ކެނޑިޑޭޓަކީ ކޮންފަރާތެއްކަން ކަނޑައެޅި، ގަބޫލު ކުރެވޭ ގޮތުގައި ކުރިޔަށް އޮތް ރޯދަމަސް ނިމުމާއެކު، ރިޔާސީ އިންތިޚާބުގެ ކެމްޕޭން ރާއްޖޭގެ އެކި ކަންކޮޅުތަކުގައި އަމަލީ ގޮތުން ފެށިގެން ދާނެއެވެ.

އަދި 2023 ވަނަ އަހަރު ނިމުމުގެ ކުރިން، ގައުމުގެ ތަރައްގީއާއި އަދި ކުރިމަގާއި ގުޅޭގޮތުން ގޮތް ނިންމުމަށް ރައްޔިތުންނަށް އަބަދުވެސް ލިބިގެންދާ މިފުރުސަތުގައި، ކުރިޔަށް އޮތް 5 އަހަރަށް ގައުމުގެ ހުންގާނުގައި ހުންނަވާނޭ މާލިމީއަކާއި ގުޅޭގޮތުން ރައްޔިތުން ގޮތް ނިންމާނެއެވެ.

އިގްތިސާދީ ގޮތުން ދަތި އަހަރަކަށް ވެގެންދާނެ!

ނިމިދިޔަ 2022 ވަނަ އަހަރަކީ، ކޯވިޑް ކާރިސާއަށްފަހު އެ އާލަމީ ވަބާގެ ގޮންޖެހުންތަކުން އަރައިގަނެވޭނެ އަހަރުގެ ގޮތުގައި ގިނަ ބަޔަކު އުއްމީދު ކުރިނަމަވެސް، ކަންވެގެން ދިޔައި އެބީދައަކުން ނޫނެވެ.

އަހަރު ފެށުމާއެކު ކަހަލަ ގޮތަކަށް ޔޫރަޕްގައި ފެށިގެންދިޔަ ގެއްލުން ބޮޑު، ރަޝިއާ ޔޫކުރެއިން ހަނގުރާމައިގެ ނަތީޖާއެއްގެ ގޮތުން، މުޅި ދުނިޔެ 2022 ވަނަ އަހަރު ތަޖުރިބާ ކުރާން ޖެހުނީ އިގްތިސާދީ ގޮތުން ދަތިކަން ބޮޑު އަހަރެއްގެ ގޮތުގައެވެ. ކާބޯތަކެއްޗާއި ހަކަތައިގެ ވަސީލަތްތަކުގެ އަގު އިންތިހާއަށް އުފުލިގެންދިޔަ އަހަރެއްގެ ގޮތުގައެވެ.

މިގޮތުން 2022 ވަނަ އަހަރުވެގެން ދިޔައީ ފާއިތުވެދިޔަ 40 އަހަރުގެ ތެރޭގައިވެސް ދުނިޔޭގެ އިންފްލޭޝަން އެންމެ ބޮޑަށް އުފުލިގެންދިޔަ އަހަރު ކަމުގައެވެ.

ދުނިޔޭގެ މާލީ އިދާރާތަކުން މިހާރު އަންދާޒާ ކުރާ ގޮތުގައި އަންނަ އަހަރު ދުނިޔޭގެ ޖީޑީޕީ (ދުނިޔޭގެ އުފެއްދުންތެރިކަން) ކުރިއަރާނީ 1.7 އިންސައްތައިންނެވެ. މިއީ ފާއިތުވެދިޔަ 40 އަހަރު ދުވަހުގެ ތެރޭގައިވެސް ދުނިޔޭގެ އުފެއްދުންތެރިކަން އެންމެ ދަށްކޮށް ކުރިއަރާނެކަމަށް ކުރެވިފައިވާ އަންދާޒާއެވެ.

މީގެ އެންމެ ބޮޑު އެއް ސަބަބަކީ ހިގަމުންދާ ރަޝިއާ ޔޫކުރެއިން ހަނގުރާމައަށް އަދިވެސް އަލިމަގެއް ނުފެނި، މިހަނގުރާމައި އަސަރު ދުނިޔޭގެ އިގްތިސާދުތަކަށް އޭގެ އިންތިހާއަށް ކުރަމުން ދިއުމެވެ.

އެހެންނަމަވެސް ފާއިތުވެދިޔަ 2022 ވަނަ އަހަރަކީ، ކޯވިޑް ކާރިސާއަށްފަހު، ރާއްޖޭގެ އިގްތިސާދަސް ބޮޑެތި ކުރިއެރުންތަކެއް ލިބިގެންދިޔަ އަހަރެންކަން މިފުރުސަތުގައި ފާހަގަ ކޮށްލާން ޖެހެއެވެ. މިގޮތުން، ރައްޖެއަށް ނިމިދިޔަ އަހަރު 1.6 މިލިއަން ފަތުރުވެރިން ޒިޔާރަތްކޮށް، ފަތުރުވެރިކަމުގެ ސިނާއަތުން އިގްތިސާދަށް ގެނައި ކުރިއެރުމާއެކު، ކޯވިޑް ކާރިސާގެ ކުރީގެ ހާލަަތަށް ރާއްޖޭގެ އިގްތިސާދު ދަތުރު ކޮށްފައިވި ނަމަވެސް، 2022 ވަނަ އަހަރު ނިމި، އާއަހަރަކާއި އާންމު ރައްޔިތުން ކުރިމަތި ލީ، އާންމު ފަރުދުންގެ ޖީބުތަކަށް އިތުރު ތަނަވަސްކަމެއް ނުލިބިއެވެ.

ސަބަބަކީ ދުނިޔޭގެ އެހެން ގައުމުތަކެކޭ އެއްފަދައިން، ރާއްޖޭގައިވެސް ތަކެތީގެ އަގުތައް އިންތިހާއަށް އުފުލި، އަދި އަހަރު ނިމިގެންދިޔައިރު، ޖީއެސްޓީއާއި ޓީޖީއެސްޓީއަށް ސަރުކާރުން ގެނައި ބަދަލުތަކާއެކު، އިންފލޭޝަނަށް އޭގެ ނޭދެވޭ އަސަރު އިތުރަށް ކުރަމުންދާނެކަމަށް ބެލެވޭތީވެސްމެއެވެ.

އެހެންކަމުން، ރާއްޖޭގެ އިގްތިސާދު އޭގެ ޒާތުގައި ކުރިއަރައިގެން ދިޔަނަމަވެސް، ދުނިޔޭގެ އިގްތިސާދަށް އައިސްފައިވާ ލޮޅުންތަކާއި، އަދި ރާއްޖޭގެ އިގްތިސާދުގައި ދަރަނި ބޮޑުވެ، ގައުމުގެ އިގްތިސާދަށް ޖުމްލަ ގޮތެއްގައި އަންނަމުންދާ ނުރަގަޅު ބަދަލުތަކާއެކު، ކުރިޔަށް އޮތް 2023ވަނަ އަހަރަކީ ހުރިހާ ގޮތަކުންވެސް އިގްތިސާދީ ގޮތުން ގޮންޖެހުން ބޮޑު އަހަރަކަށް ވެގެންދާނޭ ކަމީ ކަށަވަރުވެ ޔަގީންވާ ކަމެކެވެ.

ކުރެވޭ އުއްމީދުތައް!

މިފެށުނު 2023 ވަނަ އަހަރަކީ އިގްތިސާދީ ގޮތުންނާއި އަދި ދުނިޔޭގެ ސަލާމަތާއި ރައްކާތެރިކަމުގެ ގޮތުން ބަނަ އަހަރެއްގެ ގޮތުގައި ގިނަ ބަޔަކު ސިފަ ކުރިނަމަވެސް، އާއަހަރުގެ ފެށުން ގިނަ ބަޔަކު ފާހަގަކޮށްފައިވަނީ 2023ވަނަ އަހަރަކީ އުއްމީދީ އަހަރަކަށް ވެގެންދާނޭކަމުގެ ފޮނު އުއްމީދުތަކާއެކުއެވެ.

ހަމަ އެބީދައިން، ދިވެހިރާއްޖޭގެ އިގްތިސާދަށް އަންނަނަމުންދާ ހެޔޮ ބަދަލުތަކާއި، އަދި ދައުލަތުގެ އާމްދަނީއަށް 2023ވަނަ އަހަރު އަންނާނެ ހެޔޮ ބަދަލުތަކާއެކު، ދައުލަތުގެ މުވައްޒަފުން ތިބީ މުސާރަތަކަށް އޭގެ ހެޔޮ ބަދަލުތަކެއް އަންނާނޭ ކަމުގެ އުއްމީދުގައެވެ. އަދި ކުރިޔަށް އޮތް އަަހަރު ރާއްޖެއަށް 1.8 މިލިއަން ފަތުރުވެރިން ގެނައުމަށް ރާއްޖެއިން ކަނޑައަޅާފައިވަ ލަނޑުދަނޑިއާއެކު، ފަތުރުވެރިކަމުގެ ސިނާއަތަށްވެސް އިތުރު ކުރިއެރުން ލިބި، އޭގެ އެދެވޭ ނަތީޖާ އިގްތިސާދުން ފެންނާނޭކަމުގެ އުއްމީދަކީވެސް 2023ވަނަ އަހަރުގެ އުއްމީދުތަކާއި ގުޅިފައިވާ މުހިންމު އަމާޒެއްކަންވެސް މިފުރުސަތުގައި ފާހަގަ ކޮށްލާން ޖެހެއެވެ.

އޭގެ އިތުުރުން، މިއަހަރަކީ ރިޔާސީ އިންތިޚާބުގެ އަހަރަށް ވެގެން ދިއުމާއެކު، ރިޔާސީ އިންތިޚާބަށްފަހު، ގައުމުގައި އޮތް ސިޔާސީ ހަލަބޮލިކަމަށް ހައްލެއްލިބި، ގިނަބަޔަކު ތިބީ މިފެށިގެންދިޔަ 2023 ވަނަ އަހަރަކީ ގައުމަށް ސިޔާސީ ގޮތުން ހަމަޖެހުމެއް ލިބިގެންދާނޭ އަހަރުކަމުގައި އުއްމީދު ކޮށްގެންނެވެ.