ޤައުމާއި ރައްޔިތުން އިސްލާޙުކޖުރުމަށް މަސައްކަތްކުރާނަމަ، އެމަސައްކަތް އެންމެ ފުރަތަމަ ތިމާގެ އަމިއްލަ ނަފްސާ ހަމައިން ފެށުމަށާ، ނަތީޖާ ފެންނާނީ އޭރުންކަމަށް ހޯމްމިނިސްޓަރ އިމްރާން ޢަބްދުﷲ ވިދާޅުވެއްޖެއެވެ.
މިނިސްޓަރ އިމްރާން ކުރެއްވި ޓްވީޓެއްގައި ވިދާޅުވެފައިވަނީ ޤައުމާއި ރައްޔިތުން އިސްލާޙުކޮށް ހެޔޮ މަގަށް ބަދަލުކުރައްވަން އެދިވަޑައިގަންނަވާ ބޭފުޅުން ފަށްޓަވަން ޖެހޭ ހިސާބަކީ އަމިއްލަ ނަފުސުކަމަށެވެ. އަދި އަމިއްލަ ނަފުސު އިސްލާޙުނުކޮށް ޤައުމަށް ނުވަތަ ރައްޔިތުންނަށް ރަނގަޅުގޮތް ހޯދޭނީ ކިހިނެއްތޯ އިމްރަން ސުވާލުކުރައްވާފައިވެއެވެ.
Qauma,Rayyithun Islaahkoh heyo magah badhalukurahvan edhivadaigannava beyfulhun fattavan jehey hisaabakee Amilla nafseve.amilla nafsu islaah nukoh qauma rayyithunnah rangalhu goiy hoadhaidheynee kihineh hehyeve?
— Imran Abdulla (@ShimranAb) December 31, 2022
މިނިސްޓަރ އިމްރާންގެ މި ޓްވީޓް އަމާޒުކުރެއްވީ ކޮން ބޭފުޅަކަށް ކަމެއް ނޭނގެއެވެ. އެހެންނަމަވެސް އެމަނިކުފާނު ތާޢީދުކުރައްވަނީ ރައީސް އިބްރާހީމް މުޙައްމަދު ޞާލިޙަށް ކަމަށް ބެލެވެއެވެ. އަދި ކުރީގެ ރައީސް ޔާމީނާއި ނަޝީދަށް އިމްރާން ދޭތެރެދޭތެރެއިން ފާޑުވިދާޅުވެއެވެ.
ކުރިއަށް ރިޔާސީ އިންތިޚާބުގެ ފޯރި ގަދަވަމުން އަންނައިރު، އިމްރާނާއި އެމަނިކުފާނުގެ ޢަދާލަތު ޕާޓީން ތާޢީކުރާ ކެންޑިޑޭޓެއް ނުވަތަ ބޭފުޅެއް އަދި ހާމައެއް ނުކުރެއެވެ. އެމްޑީޕީގެ ރިޔާސީ ޕްރައިމެރީގެ ކެމްޕެއިން ފޫރި ގަދަވެފައިވާއިރު، ސަރުކާރުގެ ސިޔާސީ މަޤާމުގައި ތިއްބެވި ބޭފުޅުންނާއި ބައެއް ވަޒީރުން އަންނަނީ ރައީސް ޞާލިޙަށް ތާޢިދުކުރައްވާކަން ހާމަކުރައްވަމުންނެވެ. އެހެންނަމެސް ކޯލިޝަންގައި ހިމެނޭ އެއްވެސް ޕާޓީއަކުން އަދި މިކަމާ އެއްޗެއް ނުބުނެއެވެ. އަދި ރިޔާސީ އިންތިޚާބުގައި ވަކި ބޭފުޅަކަށް ތާޢިދުކުރާނެކަންވެސް ހާމައެއް ނުކުރެއެވެ. ޖޭޕީން ވަނީ އެޕާޓީގެ ނަން ވޯޓު ކަރުދާސްކޮޅުގައި އޮންނާނެކަމަށް ބުނެފައެވެ. ކާނަލް ނާޒިމްގެ އެމްއެންޕީން ވަނީ ވަކިން ވާދަކުރައްވަން ނިންމާފައެވެ.
