އާއަހަރުގެ ބަންދާ ދިމާކޮށް، 250 އަށްވުރެ ގިނަ ފަތުރު ވެރިންނާއެކު މާލެ އައި ޖަޕާނުގެ "ނިޕޮންމާރު" ކުރޫޒު ލައިނަރއަށް ޓޫރިޒަމް މިނިސްޓްރީން ހޫނު މަރުހަބާއެއް ކިޔައިފިއެވެ.
މި ކުރޫޒު ލައިނަރއަކީ މިމަހުގެ 30 އަދި 31 ވަނަ ދުވަހު މާލޭ ބަދަރުގައި މަޑު ކޮށްގެން އޮތުމަށްފަަހު އަނެއްކާވެސް ދަތުރަށް ފަށާގޮތަށް، އާއަހަރުގެ ބަންދާއި ދިމާކޮށް ރާއްޖެއަށް ބަނދަރުކުރި ކުރޫޒު ލައިނަރއެކެވެ.
މިގޮތުން "ނިޕޮންމާރު" ރާއްޖެއަށް ބަނދަރު ކުރުމާއެކު ކުރޫޒު ލައިނަރއިން އައި ފަތުރުވެރިންނަށް މަރުހަބާ ވިދާޅުވެފައިވަނީ ފަތުރުވެރުކަމާބެހޭ ވަޒީރު ޑރ. އަބުދުﷲ މައުސޫމްއެވެ. އަދި ޑރ. މައުސޫމްވަނީ ކުރޫޒް ލައިނަރއަށް ޚާއްސަ ހަދިޔާއެއްވެސް އަރުވާފައެވެ.
ޓުއަރިޒަމް މިނިސްޓްރީން ކުރި ޓޫވީޓެއްގައި ބުނެފައިވަނީ، މިއީ 2019ވަނަ އަހަރަށްފަހު ރާއްޖެއަށް ޒިޔާރަތް ކޮށްފައިވާ، ޖަޕާނުގެ ފަތުރުވެރިންގެ އެންމެ ބޮޑު ގުރޫޕު ކަމުގައެވެ. އަދި މި ކުރޫޒް ލައިނަރއަށް މަރުހަބާ ކިޔާފައިވަނީ ޓުއަރިޒަމް މިނިސްޓްރީގެ އިތުރުން، ނޭޝަނަލް ބޯޓިންގ އެސޯސިއޭޝަންއާއި، އެމްއެމްޕީއާރުސީއާއި، ނަންޓޯ ޓުއާސްގެ އިތުރުން ޖަޕާނުގައި ހުންނަ ދިވެހިރާއްޖޭގެ އެމްބަސީން ގުޅިގެން ކަމަށްވެސް މި ޓުވީޓުގައި ވިދާޅުވެފައި ވެއެވެ.
@MoTMv in association with #Maldives Embassy in Japan @boating_mv @visitmaldives & Nanto Tours welcomed tourists from Cruiseship #NipponMaru to Male'. This is the largest group of Japanese tourists to arrive in #Maldives since 2019. pic.twitter.com/CRadq6l1v1
— Ministry of Tourism (@MoTmv) December 30, 2022
އާއަހަރު ޗުއްޓީއާއި ދިމާކޮށް ރާއްޖެއަށް ދަނީ ގިނަ އަދަދެއްގެ ފަތުރުވެރިން ޒިޔާރަތް ކުރަމުންނެވެ. މީގެ އެއް ހަފްތާކުރިން މިއަހަރު ރާއްޖެއަށް ފަތުރުވެރިން ގެނައުމަށް ސަރުކާރުން ހިފި އަމާޒަށްވެސް ވަނީ ވާޞިލްވެފައެވެ. މިގޮތުން މިއަހަރު މިހާތަނަށް 1.6 މިލިއަނަށްވުރެ ގިނަ ފަތުރުވެރިން ވަނީ ރާއްޖެއަށް ޒިޔާރަތް ކޮށްފައެވެ.
ކޮމެންޓު ފޮނުވާ