އަންނަ އަހަރު ބާއްވާ ރިޔާސީ އިންތިޚާބުގައި ވާދަކުރުމުގެ ފުރުސަތު ރައީސް ޔާމީނަށް ހޯދައި އެމަނިކުފާނު މިނިވަންކޮށް ޕީޕީއެމްއިން ރިޔާސީ އިންތިޚާބު ކާމިޔާބު ކުރާނޭކަމަށް އިދިކޮޅު ޕީއެންސީގެ ރައީސް އަބްދުއްރަހީމް ވިދާޅުވެއްޖެއެވެ.
އިދިކޮޅު ކޯލިޝަނުން ރައީސް ޔާމީން މިނިވަން ކުރުމަށް ގޮވާލައި މާލޭގައި ކުރިއަށް ގެންދާ ހިނގާލުމުގައި ވާހަކަ ދައްކަވަމުން އަދުރޭ ވިދާޅުވީ ރައީސް ޔާމީނަކީ މިސަރުކާރުން އެންމެ ޖެހިލުންވާ ސިޔާސީ ލީޑަރުކަމަށެވެ. ސިޔާސީ މަގްސަދުތަކެއް ހާސިލް ކުރުމަށް ރައީސް ޔާމީނަށް މިސަރުކާރުން އެކި ފަހަރު މަތީން އަނިޔާ ދެމުންދާކަމަށް އަދުރޭ ވިދާޅުވިއެވެ.
ސިޔާސީ ހަގީގަތަކީ މިއަދު ރާއްޖޭގެ އެންމެ ތާއީދު ބޮޑު ލީޑަރަކީ ރައީސް ޔާމީން ކަމަށާއި، ރިޔާސީ އިންތިޚާބުގައި ރައީސް ޔާމީނާއި ވާދަކުރުމަކީ މިސަރުކާރަށް ހަޖަމް ކުރެވޭނެ ކަމެއް ނޫންކަމަށް އަދުރޭ ވިދާޅުވިއެވެ. އޭނާ ވިދާޅުވީ މިއަދު މުޅި ރާއްޖޭގައި ރައްޔިތުން އުފުލާ އަޑަކީ ރައީސް ޔާމީން މިނިވަންކޮށް ރިޔާސީ އިންތިޚާބުގައި ވާދަކުރެވޭނެ މަގު އެމަނިކުފާނަށް ތަނަވަސް ކޮށް ދެއްވުންކަމަށެވެ.
ރައްޔިތުން ބޭނުންވަނީ ޤައުމަށް ޚިދުމަތް ކުރެވޭ، އިހުލާސްތެރި ވެރިއެއް ކަމަށާއި، ވަކި ޤައުމެއްގެ އަޅުވެތިކަމަށް ގޮސް ވެއްޓޭ ވެރިއަކަށް ދެވަނަ ދައުރެއް ދިނުމަކީ ރައްޔިތުން އެދޭނެ ގޮތެއް ނޫންކަމަށެވެ. ގިނަ އަދަދެއްގެ ބަޔަކު ބައިވެރިވި މިހިނގާލުމުގައި އަދުރޭ ވިދާޅުވީ ރައީސް ޔާމީނަށް ނުހައްގުން ކޮށްފައިވާ ހުކުމް ބާތިލްކޮށް އެމަނިކުފާނާއިއެކު ކުރިއަށް އޮތް ރިޔާސީ އިންތިޚާބު ބޮޑުތަނުން ކާމިޔާބު ކުރެވޭތަން ފެންނަ ކަމަށެވެ. އަދި ރައްޔިތުން ތިބީ ރައީސް ޔާމީންގެ ނަންފުޅު ނެތް އިންތިޚާބަކަށް ޖާގަދޭ ގޮތަކަށް ނޫންކަމަށްވެސް އަދުރޭ ވިދާޅުވިއެވެ.
އަދުރޭ ވަނީ އޭނާގެ ވާހަކައިގައި ފަނޑިޔާރުންނަށްވެސް އިލްތިމާސެއްކޮށްފައެވެ. އެގޮތުން ކޮންމެ ފަނޑިޔާރަކުވެސް ހުކުމް ކުރެއްވުމުގައި އަދުލުވެރިކަމާއިއެކު ހުކުމް ކުރެއްވުމުގައި ދެމިހުންނެވުމަށް ވަނީ އިލްތިމާސް ކުރައްވާފައެވެ.
Progressive Congress Coalition's nationwide rally calling to free our Presidential candidate President Yameen.#HaraamHukun#FreePresidentYameen pic.twitter.com/rZK5GQNloT
— Progressive Party of Maldives (@ProgressPartyMV) December 30, 2022
ކުރިއަށް އޮތް ރިޔާސީ އިންތިޚާބު ކާމިޔާބު ކުރުމަށްފަހު މިހާރުގެ ސަރުކާރުގައި ތިބި އަނިޔާވެރިންނަށް ހައްގު އަދަބު ދެވިގެންދާނެކަމަށް އަދުރޭ ވިދާޅުވިއެވެ. އެގޮތުން ރައްޔިތުންގެ ހައްގުތަކަށް އަރައި ގަންނަ ބޭފުޅުންނާއި، ރައްޔިތުންނަށް ދެކޮޅަށް މަސައްކަތް ކުރައްވާ ސިޔާސީ ފަރާތްތަކަށް ޤާނޫނުގެ ކުރިމަތީގައި އަޅަންޖެހޭ ފިޔަވަޅު އަޅަމުންދާނެކަމަށް އަދުރޭ ވިދާޅުވިއެވެ.
ރާއްޖޭގެ ހުރިހާ ރަށެއްގައި ކުރިއަށްދާ މި ހިނގާލުންތަކުގައި ގިނަ އަދަދެއްގެ ބަޔަކު ދަނީ ބައިވެރި ވަމުންނެވެ. މާލޭގެ ހިނގާލުމުގައި ޕީޕީއެމް، ޕީއެންސީގެ ލީޑާޝިޕްގެ ގިނަ އަދަދެއްގެ ބަޔަކު ދަނީ ބައިވެރިވަމުންނެވެ. ހިނގާލުމުގައި މިހާތަނަށް އެއްވެސް ހަމަނުޖެހުމެއް ހިނގާފައި ނުވާއިރު، ހިނގާލުން ނިންމާލުމަށް ހަމަޖެހިފައިވަނީވެސް ޕީޕީއެމް އޮފީސް ކައިރިއަށެވެ.
