ޒާތީ އެތައް ސުވާލަކަށް ރައީސް ދެއްވި ޖަވާބުން ސިފަކޮށްދިނީ ތަފާތު މަންޒަރެއް!

ރައީސް އިބުރާހިމް މުހައްމަދު ސާލިހު ވެރިކަމަށް ވަޑައިގެންނެވީ ކޯލިޝަން ވެރިކަމެއް ކޮށްދެއްވާނޭކަމުގެ ވައުދުތަކާއެކު، ގިނަ ބަޔަކު ގޮވައިގެން ވެރިކަން ކޮށްދެއްވުމަށް އަހުދު ކަށަވަރުވެސް ހިތްޕަވައިގެންނެވެ. އެހެންނަމަވެސް ކުރިން ހީކުރެވިފައިވާ ހީކުރެވުންތަކާއި ޚިލާފަށް، ދައުރުގެ މެދަކާއި ހަމައަށް ދަތުރު ކުރެއްވުނުތަނާ ކަހަލަ ގޮތަކަށް، އެންމެ ބޮޑެތި ގޮންޖެހުންތަކާއި އެމަނިކްފާނަށް ކުރިމަތި ލައްވަން ޖެހިވަަޑައިގެންނެނީ އަމިއްލަފުޅު ޕާޓީގެ ތެރެއިންވެސް، ޒަމާނުއްސުރެ އެންމެ ގާތް އެކުވެރިންގެ ގޮތުގައި ތިއްވި ބޭފުޅުންގެ ކިބައިންނެވެ.

އެހެންނަމަވެސް، ސިޔާސީ ގޮތުންނާއި އަދި އާއިލީގޮތުންވެސް ކުރިމަތިލައްވަން ޖެހިވަަޑައިގެންނެވި މި ގޮންޖެހުންތަކާއެކުވެސް، ކޯލިޝަން ދަމަހައްޓަވާ، ގިނަ ބަޔަކާއެކު ވެރިކަން ކުރެއްވުމަށް ވެވަޑައިގެންނެވި ވައުދުތަކުގެ މަތީ ދެމިހުންނަވާ، އާ ގާނޫނުއަސާސީއަށްފަހު ކޯލިޝަން ވެރިކަމެއް އެންމެ ދިގު މުއްދަތަކަށް ދެމެހެއްޓެވި ފުރަތަމަ ރައީސްކަމުގައި ރައީސް ސާލިހުވަނީ ވެވަޑައިގެންފައެވެ.

ހަމައެއާއެކު ފާހަގަ ކޮށްލާންޖެހޭ އަނެއް ނުކުތާއަކީ، ފާއިތުވެދިޔަ ވެރިކަންތަކުގައި ހިގައިގެން ގޮސްފައިވާ ކަރަޕްޝަނާއި މަރުގެ ހާދިސާތައް ތަހުގީގުކޮށް ފިޔަވަޅު އަޅުއްވާނެކަމަށް ވިދާޅުވެ އެ ވައުދުތަކުގެ މަތީގައި 4 އަހަރު ފާއިތުވެގެން ދިއުމަށްފަހު، އެ ހުރިހާ ވައުދުތަކަށް ޖަވާބުދާރީވެ ވަޑައިގަންނަވަން ޖެހިވަޑައިގެން، ވެރިކަމުގެ ފުރަތަމަ ދައުރު ނިމުމަކާއި ހަމައަށް ދަތުރު ކުރަމުންދާއިރު، އިސްވެ ދެންނެވުނު ކަންކަމާއި ގުޅޭގޮތުން ނޫސްވެރިންގެ ފަރާތުން ރައީސް ސާލިހާއި ކުރިމަތިވެ ވަޑައިގަންނަވަމުންދާ ސުވާލުތަކެވެ.

މިގޮތުން، ދުވަސްތަކަކަށްފަހު އަނެއްކާވެސް ރައީސް އޮފީހުގައި އިއްޔެ ރައީސް ސާލިހު ބޭއްވެވި ނޫސްވެރިންގެ ބައްދަލުވުން ވެގެންދިޔައި ތަފާތު، ނޫސްވެރިންގެ ފަރާތުންވެސް ޒާތީ (ޕާރސަނަލް) ގިނަގުނަ ސުވާލުތަކެއް ރައީސް ސާލިހާއި ކުރިމަތި ކުރުވި ނޫސްވެރިންގެ ބައްދަލުވުމެއް ކަމުގައެވެ. އަދި މި ނޫސްވެރިންގެ ބައްދަލުވުމުގައި ޖަވާބު ދެއްވަން އުދަގޫކަމަށް ގަބޫލުކުރެވޭ ޒާތުގެ ގިނަގުނަ ސުވާލުތަކަކަށް ރައީސް ސާލިހު ދެއްވި ޖަވާބުން މޭރުންކޮށްދޭ ގިނަ ކަންތައްތަކެއް ހުރިކަން ގިނަބަޔަކު ދަނީ ފާހަގަ ކުރަމުންނެވެ.

ނަޝީދުއާއި ޖެހިގެން އުޅޭ މައްސަލަައިގެ ހަގީގަތް ފުތަރަމަ ފަހަރަށް ހާމަ ކުރެއްވުން!

އިއްޔެގެ ނޫސްވެރިންގެ ބައްދަލުވުން ފާހަގަވެގެން ދިޔައީ، އެމްޑީޕީގެ ކުރިޔަށް އޮތް ރިޔަސީ ޕްރައިމަރީގައި ރައީސް ސާލިހުއާއި ނަޝީދުއާ ދެބެފުޅުން ވާދަ ކުރައްވާނޭކަން އިއުލާންކޮށް، ދެބޭފުޅުންވެސް ކެމްޕޭން ފައްޓަވާފަވަނިކޮށް، ރައީސް ސާލިހު ބޭއްވެވި ފުރަތަމަ ނޫސްވެރިންގެ ބައްދަލުވުން ކަމުގައެވެ. ނަތޫޖާއެއްގެ ގޮތުން، މި ނޫސްވެރިންގެ ބައްދަލުވުން ވެގެން ދިޔައީ، ދެބޭފުޅުންގެ ސިޔާސީ ވާދަވެރިކަމާއި ގުޅުން ހުރި ގިނަ ސުވާލުތަކެއްވެސް ރައީސް ސާލިހަށް އަމާޒުވެގެން ދިޔަ ނޫސްވެރިންގެ ބައްދަލުވުމަކަށެވެ.

މިގޮތުން ނޫސްވެރިޔަކު ރައީސް ސާލިހަށް އަމާޒު ކުރި އެއް ސުވާލަކަށް ވެގެން ދިޔައީ، އެމްޑީޕީގެ ރައީސް މުހައްމަދު ނަޝީދުއާއި ދެބޭފުޅުންގެ މެދުގައި ޖެހިގެން އުޅޭ ހަގީގީ މައްސަލާގެ އަސްލަކީ ކޮބައިތޯއެވެ. އަދި މިއީ ފާއިތުވެދިޔަ ތަނުގައިވެސް މިސުވާލަށް ސީދާގޮތުން ރައީސް ސާލިހު ޖަވާބު ދެއްވާފައިނުވާ ސުވާލެއްކަންވެސް މި ފުރުސަތުގައި ފާހަގަ ކޮށްލާން ޖެހެއެވެ.

ކުރީގެ ނޫސްވެރިންގެ ބައްދަލުވުންތަކުގައި މިގޮތުން އަމާޒު ކުރެވުނު ސުވާލުތަކުގެ ޖަވާބުގައި ރައީސް ސާލިހު ވިދާޅުވެފައިވަނީ، ދެބޭފުޅުންގެ މެދުގައި ޚިޔާލުތަފާތުވުންތައް ހުރިކަމަށާއި، އެހެންނަމަވެސް ހައްލު ނުކުރެވޭވަރުގެ މައްސަލައެއް އޮތްކަމަށް ދެކެވަޑައިނުގަންނަވާ ކަމަށެވެ.

އެހެންނަވަމަވެެސް، އިއްޔެގެ ނޫސްވެރިންގެ ބައްދަލުވުމުގައި، ރައީސް ނަޝީދާއި ރައީސް ޞާލިހާއި ދެބޭފުޅުންގެ މެދުގައި ޚިޔާލު ތަފާތުވުން އޮތީ ކޮންކަމާއި ގުޅޭގޮތުންތޯ ނޫސްވެރިއަކު ކުރި ސުވާލެއްގެ ޖަވާބުގައި ރައީސް ޞާލިހު ވިދާޅުވީ ރައީސް ނަޝީދާއި ޚިޔާލު ތަފާތުވުން އޮތީ އެމަނިކުފާނު ވެރިކަމުގައި ހުންނެވުމުން ރައީސް ނަޝީދު ހިތްހަމަ ނުޖެހޭތީކަމުގައެވެ.

ރައީސް ސާލިހު އިތުރަށް ވިދާޅުވީ، ރައީސް ނަޝީދަކީ އަބަދުވެސް ވެރިކަމުގެ ހުވަފެން ދެކޭ، ވެރިކަމަށް އައުމަށް މަސައްކަތް ކުރައްވަމުންދާ ބޭފުޅެއްކަމަށާއި، ވެރިކަމުގައި އެމަނިކުފާނު ނޫން އެހެން ކޮންމެ މީހަކު ހުރިނަމަވެސް ނަޝީދުގެ އެހިތްހަމަ ނުޖެހުން އެމީހަކާއި އޮންނާނެކަމަށެވެ. އަދ އެއާއެކު ރައީސް ޞާލިހު ވަނީ ރައީސްނަޝީދު ވެރިކަން ހޯދުމަށް ކުރައްވާ މަސައްކަތުގައި އަމަލުކުރާ ބައެއް ކަންކަމާމެދު ހިތްހަމަނުޖެހުން ފާޅު ކުރައްވާފައެވެ.

ރައީސް ސާލިހު އިތުރަށް ވިދާޅުވީ ނަޝީދުގެ ވެރިކަމުގައިވެސް އަދި ސިޔާސީ އެކި ކަންކަމުގައިވެސް ދެބޭފުޅުންގެ މެދުގައި ޚިޔާލު ތަފާތުވުން އޮންނަ ކަމަށެވެ. ނަމަވެސް ވެރިކަމުގައި ހުންނަ މީހާއަށް ދެވޭ ޚިޔާލަކީ ވަކި މީހެއްގެ ހިޔާލެއްގެ މައްޗަށް އެކަނި ނިންމޭ ކަމަކަށް ނުވުމުން ދެވޭ ޚިޔާލުތަކަށްފަހު ނަޝީދު ނިންމަވާ ނިންމެވުމަށް އިހުތިރާމް ކުރައްވާކަމަށެވެ.

ނަމަވެސް މިއަދު ކަންކަން ވަމުންދާ ގޮތުން، ނަޝީދު ހުށަހަޅުއްވާ ކަންކަންވެސް ނިންމަނީ ގިނަ ބައެއްގެ މަޝްވަރާއާއިއެކު ގިނަ ބަޔަކު އެކަމުގައި ދެކޭ ގޮތަށް ބެލުމަށްފަހު ރައީސް ވިދާޅުވިއެވެ. މިހާރު އޮތީ ކޯލިޝަން ސަރުކާރަކަށް ވުމުން އަބަދުވެސް ކަންކަން ނިންމުމުގައި މަޝްވަރާ އިސްކުރައްވާކަމަށްވެސް ރައީސް ވިދާޅުވިއެވެ.

މީގެ އިތުރުންވެސް ނޫސްވެރިންވަނީ، 2018 ވަނަ އަހަރު އެމްޑީޕީގެ ރިޔާސީ ޓިކެޓް ލިބިވަޑައިގެންނެވިއިރު، ރައީސް ނަޝީދު ރާއްޖޭގެ ރައީސްކަން އަލުން ކުރައްވާތަން ދެކެވަޑައިގަންނަވަން ބޭނުންފުޅުވާކަމަށް ވިދާޅުވެ ރައީސް ސާލިހު އޭރު ދައްކަވާފައިވާ ވާހަކަފުޅާއި ގުޅޭގޮތުންވެސް ސުވާލު ކުރައްވާފައެވެ.

މި ސުވާލުގެ ޖަވާބުގައި ރައީސް ސާލިހު ވިދާޅުވެފައިވަނީ އޭގެ ފަހުން ނަޝީދުގެ ވިސްނުންފުޅު ބަދަލު ކުރައްވާ، ރާއްޖޭގެ ރައީސްކަން ކުރައްވަން ބޭނުންފުޅު ނުވާކަމަށާއި، މިހާރު ބޭނުންވަނީ ބޮޑުވަޒީރުކަން ކަމަށް ވިދާޅުވެފައިވާކަމަށް ވިދާޅުވެފައެވެ. އެހެންނަމަވެސް އެބަދަލު ގެނެވޭނީ ރައްޔިތުންގެ މަޖިލީހުން ފާސްކޮށްގެން ރައްޔިތުންގެ ރުހުން ހޯއްދަވައިގެންކަމަށްވެސް ރައީސް ސާލިހު ވިދާޅުވެފައި ވެއެވެ.

ޒާތީ ގިނަ ސުވާލުތަކެއް! އެއް ސުވާލަކަށް ޖަވާބެއް ނުދެއްވި!

ގިނަ ފަހަރަށް ރައީސުލްޖުމްހޫރިއްޔާކަން ކުރައްވާ ބޭފުޅުން ބާއްވަވާ ނޫސްވެރިންގެ ބައްދަލުވުންތަކަކީ، ވަރަށް ބޮޑަށް ރެގިއުލޭޓް ކުރެވިގެން، ވަކި އަމާޒަކަށް އިންތިޒާމްތައް ބެހެއްޓިގެން ބާއްވަވާ ނޫސްވެރިންގެ ބައްދަލުވުންތައް ކަމުގައިވި ނަމަވެސް، ރައީސް ސާލިހުގެ ނޫސްވެރިންގެ ބައްދަލުވުންތައް ފާހަގަ ކުރެވިފައިވަނީ، ނޫސްވެރިންނަށް ހުރިހާ ބާވަތެއްގެ ސުވާލުތަކެއްވެސް ކުރުމަށް ޖާގަ ދެއްވައިގެން ކުރިޔަށް ގެންދަވާ ނޫސްވެރިންގެ ބައްދަލުވުންތަކެއްގެ ގޮތުގައެވެ.

މިގޮތުން އިއްޔެގެ ނޫސްވެރިންގެ ބައްދަލުވުމުން ފާހަގަ ކުރެވިގެން ދިޔައީ، ޒާތީ ގޮތުންވެސް، އެންމެ އެކަށީގެންވާ ނުވާ ޒާތުގެ ބައެއް ސުވާލުތައް ރައީސް ސާލިހާއި އަމާޒު ކުރި ނޫސްވެރިންގެ ބައްދަލުވުމެއްގެ ގޮތުގައެވެ. މިގޮތުން ރައީސް ނަޝީދު ކުރައްވާ ތުހުމަތެއް ކަމަށް ވިދާޅުވެ، ނޫސްވެރިޔަކުވަނީ ރައީސް ސާލިހު "ޒިނޭ" ކުރެއްވިތޯވެސް ސުވާލު ކުރައްވާފައެވެ.

އެހެންނަމަވެސް، މި ސުވާލުވެސް "ހަޖަމް ކުރައްވާ" ޖަވާބުގައި ރައީސް ސާލިހު ވިދާޅުވެފައިވަނީ އެފައްކަމެއް ނުކުރައްވާ ކަމަށާއި އެފަދަ ފޮޓޯއެއްވެސް ނުހުންނާނޭކަމުގައެވެ.

ހަމަ އެއާއެކު ފާހަގަވެގެން ދިޔަ އަނެއްކަމަކީ، މި ސުވާލާ ވިދިގެން، މިތުހުމަތު ނަޝީދު ރައީސް ސާލިހުގެ މައްޗަށް ކުރައްވަމުން ގެންދަވާކަމަށް ބުނެ، ނަޝީދުގެ މައްސަލަ ދައުލަތުގެ ކަމާއި ގުޅުންހުރި އިދާރާތަކަށް ހުށަ ނާޅުއްވަނީ ކީއްވެތޯ، ދެފަހަރެއްގެ މަތިން ނޫސްވެރިން ކުރި ސުވާލުތަކަށް ރައީސް ސާލިހު އެއްވެސް ޖަވާބެއް ދެއްވާފައި ނުވާކަމެވެ.

މިގޮތުން، ޒާތީ ގޮތުން ކުރެވުނު މިބާވަތުގެ ސުވާލަކަށް ޖަވާބު ދެއްވުމާއެކުވެސް، ނަޝީދުގެ މައްޗަށް ޖިނާއީ އަދަބެއް އަތުވެދާނޭ ޒާތުގެ މައްސަލައަކާއި ގުޅުވައިގެން ނޫސްވެރިން ތަކުރާރުކޮށް ކުރިމަތިކުރުވި ސުވާލުތަކަށް ރައީސް ސާލިހު އެއްވެސް ޖަވާބެއް ނުދެއްވުން، ބައެއް ފަރާތްތަކުން ރައީސް ސާލިހުގެ މި ހިމޭންކަން ސިފަ ކޮށްފައިވަނީ، އެމަނިކްފާނުގެ ހިތްޕުޅުގައި ޒާތީ ހަސަދަައެއް ނެތުމާއި، ނުވަތަ އެމަނިކްފާނުގެ ހިތްތިރިކަމުގެ ފުރިހަމަ މިސާލެއްގެ ގޮތުގައެވެ.

އިނގިރޭސިބަހުން ކުރެވުނު ސުވާލު!

އިއްޔެ ބޭއްވުނު ނޫސްވެރިންގެ ބައްދަލުވުމުގައި ބައެއް ނޫސްވެރިން ކުރި ސުވާލުތަކަށް ބަލާއިރު، ބައެއް ސުވާލުތަކުން ރައީސް ސާލިހު "ބޭޒާރު" ކުރެވިދާނެކަމަށް ދެކި، އެ އުސޫލުން ބައެއް ސުވާލުތައް ބައްޓަންކޮށް، އަމާޒު ކުރިތަންވެސް ފެނިގެން ދިޔައެވެ.

މީގެ ތެރޭގައި ފާހަގަ ކުރެވިގެންދިޔަ އެއް ސުވާލަކީ، ދިވެހި ނޫސްވެރިޔަކު، އިނގިރޭސިބަހުން ރައިސަށް އަމާޒުކުރި ސުވާލެކެވެ. މި ސުވާލަކީ އެނޫސްވެރިންގެ ބައްދަލުވުމުގައި އެތައްފަހަރު ޖަވާބު ދެއްވާފައިވާ ސުވާކަލަށް ވާއިރު، ނޫސްވެރިޔާ ސުވާލުކުރަމުން އެދިފައިވަނީ އިނގިރޭސިބަހުން ސުވާލުގެ ޖަވާބު ދެއްވުމަށެވެ.

އެހެންނަމަވެސް، ރާއްޖޭގެ ބައެއް ނޫސްވެރިންނަށް ސާފުވެގެން ގޮސްފައިނުވާ އެއްކަމަކީ، އަދުގެ ދުނިޔޭގައި، ގައުމުތަކުގެ ރައީސުން ބާއްވާ ނޫސްވެރިންގެ ބައްދަލުވުންތަކުގައި އިނގިރޭސިބަހުން ކުރެވޭ ސުވާލުތަކަށްވެސް، ގައުމުތަކުގެ ރައީސުން ޖަވާބު ދެއްވަނީ އެގައުމެއްގެ މާދަރީ ބަހުންކަމެވެ. އަދި އެއީ ރައީސުން އެބޭފުޅުންގެ ފަޚުރެއްކަމުގައި ދެކެމުންދާއިރު، އިނގިރޭސިބަސް ރަގަޅަށް ދެނެވަަޑައިގަންނަވާ ރައީސުންވެސް އަދުގެ ދުނިޔޭގައި އަމަލު ކުރައްވަނީ މިއުސޫލުންކަން މިއީ ގިނަބަޔަކު ދަންނަ ވަރަށްވެސް ބޮޑު ހަގީގަތެކެވެ.

އެހެންކަމުން، ނޫސްވެރިޔަކު މުޅިން ތަފާތު މަގުސަދެއްގައި ރައީސް ސާލިހާއި އިނގިރޭސިބަހުން ސުވާލު އަމާޒު ކުރިނަމަވެސް، އިނގިރޭސިބަހުން ކުރެވުނު ސުވާލަކަށް ދިވެހި ބަހުން ރައީސް ސާލިހު ޖަވާބު ދެއްވި ދެއްވުން އެއީ، ރައީސުލްޖުމުހޫރިއްޔާގެ ނޫސްވެރިންގެ ބައްދަލުވުންތަކުގައި، އެހެނިހެން ގައުމުތަކެކޭވެސް އެއްފަދައިން ރާއްޖޭގައިވެސް އެކަން އޮންނާންޖެހޭ އުސޫލުކަމުގައި ގަބޫލުކުރާން ޖެހެއެވެ.

އަދި ބައިނަލްއަގުވާމީ މިފަދަ އުސޫލުތަކަށް ބައެއް ދިވެހި ނޫސްވެރިން އަހުލުވެރި ނުވުމުގެ ނަތީޖާއެއްގެ ގޮތުން، ޒާތީ ހަސަދައާއި އުފެދިފައިވާ ދެކޮޅުވެރިކަމުގެ ޖަޒްބާތުގައި ގައުމުގެ ރައީސުލްޖުމްހޫރިއްޔާއާއި މުގާބަލާކުރި ނަމަވެސް، ނޫސްވެރިންގެ ބައްދަލުވުންތަކުގައި ގައުމުގެ އެންމެ މަތީވެރިޔާ އަމިއްލަ މާދަރީ ބަހުން ވާހަކަ ދެއްކުން ބަލައިގަންނަން ޖެހޭނީ ހަގީގަތުގައިވެސް ފަޚުރެއްކަމުގައި ދަންނަވާން ޖެހެއެވެ.

ކެތްތެރިކަމާއި، ޒާތީ ތައްސުބެއް ނެތުން!

އިއްޔެ ރައީސް ސާލިހު ބޭއްވެވި ނޫސްވެރިންގެ ބައްދަލުވުމަކީ އެމަނިކްފާނުގެ މީގެ ކުރީގެ ނޫސްވެރިންގެ ބައްދަލުވުންތަކާއި ޚިލާފަށް، އަމިއްލަފުޅު ޒާތީ ދިރިއުޅުއްވުމާއިވެސް ގުޅިފައިވާ އެތަކެއް ސުވާލުތަކަކަށް ޖަވާބުދެއްވި ނޫސްވެރިންގެ ބައްދަލުވުމަކަށް ވާއިރު، މި ނޫސްވެރިންގެ ބައްދަލުވުމުން މޭރުން ކުރެވިގެންދިޔަ ގިނަގުނަ ކަންތައްތަކެއް ހުރިކަމުގައި މިއަދު ގިނަ ބަޔަކު ގަބޫލުކުރެއެވެ.

އެއީ ގައުމެއްގެ ވެރިކަމުގައި ހުންނަވާ ބޭފުޅަކު އިސްކުރައްވާންޖެހޭ އެތައް މަސްލަހަތަކާއި ގުޅުންހުރި ކަންކަމަށް ވެގެންދާއިރު، މީގެތެރެއިންވެސް ސާފުވެގެން ދިޔަ ބައެއް ކަންކަމަކީ، ރައީސް ސާލިހުގެ ކެތްތެރިކަމާއި، ޒާތީ ތައްސުބެއް ނެތުންކަމުގައި ފާހަގަކުރާންޖެހެއެވެ.

އަދި ރައީސްގެ ޒާތާއި ގުޅުވައިގެން އެންމެ ގާތް އެކުވެރިޔާ ކޮށްފައިވާ، ދީނުގައި ހައްދު ކަނޑައެޅޭ، ހަޑިހުތުރު ބައެއް ތުހުމަތުތަކާއި ގުޅިގެން އިދާރާތަކަށް މައްސަލަ ހުށަހަޅުއްވާ، އެކަންކަމުގެ ބަދަލު ހިތްޕަވަން ބޭނުންފުޅު ނުވާކަންވެސް، މި ކަންކަމާއި ގުޅޭގޮތުން ނޫސްވެރިން ކުރި ސުވާލުތަކަށް ރައީސް ސާލިހު ހަނުހުންނެވި ހުންނެވުމުން މޭރުންވެގެން ދިޔަކަމީވެސް ކަށަވަރުވެ ޔަގީންވާން އޮތް ކަމެއްވެސް މެއެވެ،

އެހެންކަމުން، ބަދަލު ހިތްޕެވުމުގެ ރޫހެއް ނެތުމާއި، ކެތްތެރިކަމާއި، މަޑުމައިތުރިކަމާއި، ކަން އޮތްގޮތް ހާމަ ކުރެއްވުމާއި، އަދި ފޮރުވުމާއި ވަންހަނާ ކުރުމެއްނެތި ނޫސްވެރިންނަށް ކަންކަން ހާމަ ކޮށްްދެވުމުގައި ރައީސް ސާލިހު އިއްޔެގެ ނޫސްވެރިންގެ ބައްދަލުވުމުގައި ދެއްކެވީ ރިވެތި ނަމޫނާއެއްކަމުގައި މިއަދު މިވަނީ ގަބުލުކުރާން މަޖުބޫރު ވެފައެވެ.