ރައީސް ޔާމީންގެ ސަލާމަތާއި ރައްކާތެރިކަން ކަށަވަރުކޮށްދިނުމަށް އެދި ޕީޕީއެމްގެ ލީޑަޝިޕްގެ ބޭފުޅުން ކަރެކްޝަނަށް ގޮސްފިއެވެ.
ވ. އާރަށް ކުށްޔަށް ދިން މައްސަލާގައި ކުރީގެ ރައީސް ޔާމީން ޢަބްދުލްޤައްޔޫމުގެ މައްޗަށް އުފުލި ދެ ދަޢުވާވެސް ސާބިތުވެ 11 އަހަރަށް ޖަލަށް ލުމަށް ކްރިމިނަލް ކޯޓުން ވަނީ ހުކުމްކޮށްފައެވެ. މިކުމާއި ގުޅިގެން ގިނަ ކަންބޮޑުވުންތަކެއް ޕީޕީއެމް، ޕީއެންސީން ފާޅު ކުރަމުންދާއިރު، އެކޯލިޝަނުން ވަނީ މިއީ ބާތިލް ހުކުމެއް ކަމަށް ބުނަމުންނެވެ.
ރައީސް ޔާމީން ވަނީ ހުކުމަށްފަހު މާފުށީ ޖަލަށް ގެންގޮސްފައެވެ. މިއަދު ޕީޕީއެމް، ޕީއެންސީގެ ބޭފުޅުން ވަނީ ކޯޓުގެ ހުކުމް ނުލިބި ކޯޓު ކައިރީގައިވެސް އިހުތިޖާޖު ކޮށްފައެވެ. އަދި މިހާރު ތިބީ ރައީސް ޔާމީން ޖަލު ބަންދުގައި ހުންނަވާއިރު އެމަނިކުފާނުގެ ސަލާމަތާއި ރައްކާތެރިކަން ކަށަވަރު ކުރުމަށް ކުރަންޖެހޭ ކަންކަމުގެ ޔަގީންކަން ހޯދުމަށް ކަރެކްޝަނަށް ވަޑައިގެންފައެވެ.
Raees Yameen ge salaamathaai rakkatherikan kashavaru koh dhinumah edhi, adhi baeh inthizaam thakaa behey gothun mashvaraa kurumah PPM PNC ge Leaders Corrections ga. #FreePresidentYameen #HaraanHukum pic.twitter.com/Rp0kXpPeTj
— Progressive Party of Maldives (@ProgressPartyMV) December 26, 2022
ކުރީގެ ރައީސް ޔާމީންގެ މައްޗަށް ދަޢުލަތުން އުފުލާފައިވާ ދެ ދަޢުވާގެ ތެރެއިން މަނީ ލޯންޑަރިންގެ ކުށުގެ ދަޢުވާ އެމަނިކުފާނުގެ މައްޗަށް ސާބިތުވުމާގުޅިގެން 7 އަހަރު ދުވަހަށް ޖަލަށް ލުމަށާއި، 5 މިލިއަން އެމެރިކާ ޑޮލަރުން ޖޫރިމަނާކުރުމަށް ވަނީ ހުކުމްކޮށްފައެވެ. އަދި ޖޫރިމަނާ ފައިސާ 6 މަސް ދުވަހުގެ ތެރޭގައި މީރާއަށް ދެއްކުމަށްވެސް ހުކުމްކޮށްފައިވެއެވެ.
މި މައްސަލައިގެ ހުކުމް އިއްވަވަމުން ގާޟީ ވިދާޅުވީ، މިކުށުގެ އަދަބަކީ 1 ލައްކަ ރުފިޔާއާއި، 1 މިލިއަން ރުފިޔާއާއި ދެމެދުގެ އަދަދަކުން ޖޫރިމަނާކުރުމާއެކު 5 އަހަރާއި 15 އަހަރާއި ދެމެދުގެ މުއްދަތަކަށް ޖަލަށްލުން ނުވަތަ ކުށުގެ ޢަމަލު ހިންގުމަށް ބޭނުންކުރި ފައިސާ ޢަދަދުގެ ލޯންޑަރކުރި ފައިސާގެ ޢަދަދުގެ 5 ގުނައަށްވުރެ އިތުރުނުވާނެ އަދަދަކުން ޖޫރިމަނާކުރުމާއެކު 5 އަހަރާއި 15 އަހަރާއި ދެމެދުގެ މުއްދަކަށް ޖަލަށްލުންކަމަށެވެ.
އަދި މި މައްސަލައިގައި ދައުވާ ލިބޭ ފަރާތުން އަމަލުކޮށްފައިވާ ގޮތަށާއި، އަމަލުކުރިއިރު ދައުވާ ލިބޭ ފަރާތަކީ ދިވެހިރާއްޖޭގެ ރައީސުލްޖުމްހޫރިއްޔާކަމުގެ މަޤާމުގައި ހުރި މީހެއްކަން އެނގެން އޮތުމުން އެންމެހާ ކަންކަމަށް ބަލާ ދައުވާ ލިބޭ ރައީސް ޔާމީނުގެ މައްޗަށް މި މައްސަލައިގައި ކަނޑައެޅޭ އަދަބަކީ 7 އަހަރަށް ޖަލަށް ލުމާއެކު 5 މިލިއަން ޑޮލަރުން ޖޫރިމަނާކުރުންކަމަށް ގާޟީ ވިދާޅުވިއެވެ.
އާރަށް ކުއްޔަށް ދިން މައްސަލައިގައި ރައީސް ޔާމީނުގެ މައްޗަށް ސާބިތުވި އަނެއް ދައުވާއަކީ ރިޝްވަތު ޤަބޫލުކުރިކަމުގެ ކުށުގެ ދައުވާއެވެ. މި ދައުވާ ސާބިތުވުމާގުޅިގެން 4 އަހަރުގެ ޖަލު ހުކުމެއް ކްރިމިނަލް ކޯޓުން ވަނީ އިއްވާފައެވެ.މި މައްސަލައިގެ ހުކުމް އިއްވަވަމުން ގާޟީ ވިދާޅުވީ، މި ކުށަކީ ޖިނާއަތުގެ 3 ވަނަ ދަރަޖައިގެ ކުށެއްކަމާއި، މި ކުށަށް ކަނޑައެޅިފައިވާ އަސާސީ އަދަބެއްގެ ގޮތުގައި ޤާނޫނުލް އުޤޫބާތުގައި ބަޔާންކޮށްފައިވަނީ 3 އަހަރާއި، 2 މަހާއި، 12 ދުވަހުގެ ޖަލު ހުކުމެއްކަމަށެވެ.
އަދި އަދަބު މަތިވާ ޙާލަތެއްއޮތްތޯ ބެލިއިރު ރައީސް ޔާމީން މި ޢަމަލު ހިންގާފައިވަނީ ދިވެހިރާއްޖޭގެ ރައީސުލްޖުމްހޫރިއްޔާގެ މަޤާމުގައި ހުރެކަން އެނގެން އޮތުމުންނާއި، މި ކުށް ކޮށްފައިވަނީ ފައިދާ ހޯދުމުގެ ބޭނުމުގައިކަމާއި، މި ކުށްކުރުމުގެ ސަބަބުން ރައްޔިތުންގެ މަސްލަޙަތު ވަރަށް ބޮޑަށް ގެއްލިފައިވާކަން އެނގެން އޮތުމުން އަދަބު ކަނޑައެޅުމުގައި ބަލާނެ މިންގަނޑަށް އެއް ދަރަޖަ މަތިކުރަން ޝަރީޢަތަށް ޤަބޫލުކުރެވޭކަމަށެވެ.
އެހެންކަމުން ރައީސް ޔާމީނުގެ މައްޗަށް އަދަބު ކަނޑައެޅުމުގެ އަސާސީ މިންގަނޑު އެއް ދަރަޖަ މަތިކުރެވިފައިވާކަމަށާއި، އަދަބު ދަށްކުރެވޭނެ ފަދަ ޙާލަތެއް ޝަރީޢަތަށް ފާހަގަކުރެވިފައިނުވާކަމަށްވެސް ގާޟީ ވިދާޅުވިއެވެ.
