ކުރީގެ ރައީސް އަދި އިދިކޮޅު ރިޔާސީ ކެންޑިޑޭޓު ޢަބްދުﷲ ޔާމީން ޢަބްދުލްޤައްޔޫމުގެ މައްޗަށް ދަޢުލަތުން ކުރި ޚިޔާނާތުގެ 2 ދަޢުވާ ސާބިތުވެ، އޭގެ ތެރެއިން އެއް ދައުވާކަމުގައިވާ މަނީ ލޯންޑަރ ކުރުމުގެ ދައުވާ ސާބިތުވެ، އޭގެ ކުށުގައި 7 އަހަރަށް ޖަލަށް ލާން ޙުކުމްކޮށްފިއެވެ. އަދި މީގެ އިތުރުން 5 މިލިއަން ޑޮލަރުން ޖޫރިމަނާކޮށް މި ފައިސާ ކުރިޔަށް 6 މަސްދުވަހުގެ ތެރޭގައި ދައުލަތަށް ދެއްކުމަށްވެސް ކުރިމިނަލް ކޯޓުން ކުރި ހުމުގައި ބުނެފައި ވެއެވެ.
ވ.އާރަށް މައްސަލާގައި ރައީސް ޔާމީނަށް ދައުވާކުރީ އެރަށް ކުއްޔަށް ދޫކޮށްގެން ރިޝްވަތުގެ ގޮތުގައި އެއް މިލިއަން ޑޮލަރު ގަބޫލު ކުރެއްވިކަމަށް ތުހުމަތުކޮށާއި ރިޝްވަތުގެ ގޮތުގައި ލިބުނު ފައިސާ ލޯންޑާ ކުރެއްވިކަމަށްވެސް ތުހުމަތުކޮށެވެ.
އަދަބު ކަނޑައެޅުމާއި ގުޅޭގޮތުން މިއަދުގެ ދެވަނަ ދަންފަޅީގައި ޔާމިންގެ ދިފާއީ ވަކީލުންވަނީ އަދަބާއި ގުޅޭގޮތުން ވާހަކަ ދައްކާނެ އެކަށީގެންވާ ފުރުސަތު ދީފައި ނުވާކަމަށް ވިދާޅުވެ، އަދަބާއި ގުޅޭގޮތުން އިތުރަށް ވާހަކަ ދައްކަންވަނީ އިއުތިރާޒް ކޮށްފައެވެ. ޔާމިންގެ ވަކީލުން އަދަބާއި ގުޅޭގޮތުން އިތުރަށް ވާހަކަ ދައްކަން ބޭނުން ނުވާކަމަށް ވިދާޅުވުމުން ގާޒީ ވިދާޅުވެފައިވަނީ ޔާމިންގެ ވަކީލުންގެ ފަރާތުން އަދަބާއި ގުޅޭގޮތުން ވާހަކަދެއްކުމުގެ ފުސަތު ފުރިހަމަ ވީކަމަށް ވިދާޅުވެފައެވެ. މި ފުރަތުގައި ޔޫސުފް ނައީމްގެ ވަކީލުންވަނީ، ޔޫސުފް ނައީމުގެ ކުށުގެ ރެކޯޑެއް ނެތުމާއި، އަދި އޭނާ ސިއްޙީ ހާލަތަށް ރިއާޔަތްކޮށް އަދަބުގެ މިންވަރު ދަށްކޮށްދިނުމަށް ނުވަތަ ލުއި ކޮށްދިނުމަށް އެދިފައެވެ.
މިއަދުގެ ދެވަނަ ދަންފަޅީގައި ޔޫސުފް ނައީމްގެ ފަރާތުންވެސް ދިފާއީ ވަކީލުން ވިދާޅުވެފައިވަނީ، ދޮޅު ގަޑިއިރަކީ އަދަބާއި ގުޅޭގޮތުން ވާހަކަދައްކަން އެކަށީގެންވާ ފުރުސަތެއް ނޫންކަމަށެވެ.
އެހެންނަމަވެސް، ލިބިފައިވާ ފުރުސަތު އެކަށީގެން ނުވާކަމަށް ވިދާޅުވެ އިހުތިޖާޖް ކުރެއްވުމަށްފަހުވެސް، ލިބިފައިވާ ދޮޅުގަޑިއިރުގެ ތެރޭގައި އަދަބާއި ގުޅޭގޮތުން ވާހަކަ ދެއްކުމަށް ބޭނުންވާކަމަށް ޔޫސުފް ނައީމުގެ ވަކީލުން ވިދާޅުވުމުން ގާޒީވަނީ އެ ފުރުސަތު ޔޫސުފް ނައީމްގެ ވަކީލުންނަށް ދެއްވާފައެވެ.
މިއަދުގެ ހެނދުނު ދަންފަޅީގައި އަދަބާއި ގުޅޭގޮތުން ވާހަކަ ދައްކަން ދިން ފުރުސަތުގައި ރައީސް ޔާމިންގެ ފަރާތުންވެސް އަދި ޔޫސުފް ނައީމްގެ ފަރާތުންވެސް އެދިފައިވަނީ ގާނޫނުގައި ކަނޑައަޅާފައިވާ އެންނެ ދިގު މުއްދަތު ކަމުގައިވާ 10 ދުވަހުގެ މުއްދަތެއް ދިނުމަށެވެ. ނަމަވެސް ގާޒީ ޝަކީލް ޝަރީއަތުގެ ހެނދުނު ދަންފަޅި ނިންމަވާ ލައްވަމުން ވިދާޅުވެފައިވަނީ މެންދުރުފަހު 2:00 ގައި ޝަރީއަތުގެ ދެވަނަ މަރުހަލާގައި އަލުން އަދަބާއި ގުޅެގޮތުން ވާހަކަ ދެއްކުމުގެ ފުރުސަތު ދެއްވުމަށްފަހު މިއަދު އަދަބު ކަނޑައަޅާ ހުކުމް އިއްވަވާނެ ކަމަށެވެ.
ކްރިމިނަލް ކޯޓުން މިއަދު ޔާމީންގެ މައްޗަށް ކުށް ސާބިތުވާކަމަށް ނިންމައި ކުރި ޙުކުމުގައި ބުނަޖީ މިމައްސަލާގައި ޔާމީނާއެކު ދައުލަތުން ދެން ދަޢުވާކުރި ޔޫސުފް ނައީމްގެ އެކައުންޓަކުން ދޫކުރި ޗެކެއް ޔާމީންގެ އެކައުންޓަށް ޖަމާވިކަން ލިޔުންތަކުން އެނގޭކަމަށެވެ. އަދި ރާއްޖޭގެ ރައީސުލްޖުމްހޫރިއްޔާގެ މަޤާމުގައި ހުންނެވި ބޭފުޅެއްގެ އެކައުންޓަށް އެވަރުގެ ބޮޑު ޢަދަދެއްގެ ފައިސާ މީހަކު ޖަމާކުރުމަކީ ސުވާލު އުފެދޭކަމެއްކަމަށްވެސް ޝަރިޢަތުން ބުނެފައިވެއެވެ. އަދި މިއީ ރައީސުލްޖުމްހޫރިއްޔާގެ މަޤާމުގައި ހުންނަވާ ބޭފުޅަކަށް ވިޔަފާރި ކުރުމާއި އެފަދަ ކަމެއްގައި ބައިވެރިނުވެވޭނެކަމަށް ޤާނޫނު އަސާސީގައި ބުނާ ބުނުމާ ޚިލާފު ކަމެއްކަމަށްވެސް ޝަރީޢަތުން ފާހަގަކޮށްފައިވެއެވެ. އަދި އެކައުންޓަށް ޖަމާވި ފައިސާއާ އެހެން ފައިސާ އެއްކޮށް އެފައިސާ ރައީސް ޔާމީން އިންވެސްޓްކުރައްވާފައިވާކަމަށް ހިކިންގެ ހެކިބަހުން ސާބިތުވާކަމަށްވެސް ދަށުކޯޓުގެ ޙުކުމުގައި ވެއެވެ.
އެހެންކަމުން ވ.އާރަށް ކުއްޔަށްދިނުމުގެ މުޢާމަލާތުގައި ރައީސް ޔާމީން ރިޝްވަތު ހޯއްދަވަން މަސައްކަތް ކުރެއްވިކަމާއި ރިޝްވަތުގެ ގޮތުގައި ލިބުނު ފައިސާ ލޯންޑަރކުރެއްވިކަން ސަބަބުވެރި އިންސާނެއްގެ ވިސްނުމުން ބަލާއިރު އެނގޭކަމަށްވެސް މިއަދު ދަށުކޯޓުން އިއްވި ޙުކުމުގައި ވެއެވެ.
މިމައްސަލާގައި ރައީސް ޔާމީންގެ މައްޗަށް ދަޢުވާކުރުމަށް ޕީޖީ އޮފީހުން ކޯޓަށް ފޮނުވީ 2021ވަނަ އަހަރުގެ ނޮވެމްބަރުމަހުގެ 24ވަނަ ދުވަހުއެވެ. މައްސަލައިގެ އަޑުއެހުންތައް ކޯޓުގައި ފެށީ މިއަހަރުގެ ހެނުއަރީމަހުގެ ދެވަނަ ދުވަހުއެވެ. އަޑުއެހުންތައް ނިންމާލީ މިއަހަރުގެ ނޮވެމްބަރު މަހުގެ 30ވަނަ ދުވަހުއެވެ.
