ޕަބްލިކް ސަރވިސް މީޑިއާ ޕީއެސްއެމްގެ ދިވެހި އެފް.އެމްއިން އެންމެ މަޤުބޫލު މިއުޒިކީ ފަންނާނުންނަށް އެވޯޑު ދީފިއެވެ.
މިއީ މިދިޔަ އަހަރު އެ އެފްއެމްގެ ޕްރޮގްރާމްތަކުން އެހުންތެރިންގެ މެދުގައި އެންމެ މަޤުބޫލު ދިވެހި ފަންނާނުންނަށް ދިން ޚާއްސަ އެވޯޑެކެވެ. "ދިވެހި އެފް.އެމް އެވޯޑްސް 2021″ މި ނަމުގައި ދިން މިއެވޯޑް ދިނުމަށް ބޭއްވި ޚާއްސަ ޙަފްލާ އޮތީ ރޭ ޕީއެސްއެމްގެ ޓީވީ މޯލްޑިވްސްގެ މަލްޓިޕަރޕަސް ސްޓޫޑިއޯގައެވެ.
ރޭގެ އެވޮޑު ޙަފްލާގައި ވަނީ 4 ކެޓެގަރީއަކުން އެވޯޑް ދީފައެވެ. އެންމެ ގިނައިން އެހުންތެރިން ރިކުއެސްޓްކުރި ލަވަ (އަންހެން)، އެންމެ ގިނައިން އެހުންތެރިން ރިކުއެސްޓްކުރި ލަވަ (ފިރިހެން)، އެހުންތެރިންގެ އެންމެ މަޤްބޫލު ބޭންޑް އަދި އެހުންތެރިންގެ އެންމެ މަޤްބޫލު ލަވައެވެ. މި 4 ދާއިރާއިންވެސް އެވޯޑް ލިބިފައިވަނީ ދިވެހި އަމިއްލަ ރާގުގެ އުފެއްދުންތަކަށެވެ.
އެހުންތެރިން އެންމެ ގިނައިން ރިކުއެސްޓުކުރި އަންހެން ލަވައިގެ އެވޯޑު ލިބުނީ މަރިޔަމް އަޝްފާގެ "ކަސަބުން ބޯވަޅު ކުރި ޖަރީ" މިލަވައަށެވެ. މި ކެޓެގަރީން 3 ލަވައެއް ނޮމިނޭޓްވިއެވެ. އެއީ، ކަސަބުން ބޯވަޅު / މަރިޔަމް އަޝްފާ، ސަމުގާ / މީރާ މުޙައްމަދު މާޖިދު، ޖޯޑެއްގެ ސާފު ލޯބި / އަންދަލާ ޙަލީމް އެވެ.
އެހުންތެރިން އެންމެ ގިނައިން ރިކުއެސްޓުކުރި ފިރިހެން ލަވައިގެ އެވޯޑް ލިބުނީ ޝަލަބީ އިބްރާހީމްގެ "އާދޭސް" މިލަވައަށެވެ. މި ކެޓެގަރީންވެސް 3 ލަވަ ނޮމިނޭޓްވިއެވެ. އެއީ މި ވާވަރު / އިބްރާހީމް ޒައިދު ޢަލީ، އާދޭސް / ޝަލަބީ އިބްރާހީމް، އޮޑި ދީލާ / ޝަމްވީލް މުޙައްމަދު އެވެ.
މިދިޔަ އަހަރުގެ އެންމެ މަޤުބޫލު ލަވައަކަށް ހޮވިފައިވަނީ ޝަމްވީލް މުޙައްމަދު ކިޔާފައިވާ "އޮޑި ދީލާ" މި ލަވައެވެ. މިބައިން ކަސަބުން ބޯވަޅު / މަރިޔަމް އަޝްފާ، އޮޑި ދީލާ / ޝަމްވީލް މުޙައްމަދު، އާދޭސް / ޝަލަބީ އިބްރާހީމް ނޮމިނޭޓު ވިއެވެ.
މިދިޔަ އަހަރުގެ އެންމެ މަޤުބޫލު ބޭންޑަކަށް ހޮވިފައިވަނީ މަޝްހޫރު ރެޕް ބޭންޑް ސިމްބަލިކް ރެކޯޑްސްއެވެ. މަޤުބޫލު ބޭންޑަށް ނޮމިނޭޓުވީ، ދި ޓިއުންސް، ސިމްބަލިކް ރިކޯޑްސް، ހަބޭސް އެވެ.
މި އެވޯޑް ޙަފްލާގައި ވާހަކަދައްކަވަމުން ޕީ.އެސް.އެމްގެ މެނޭޖިންގ ޑިރެކްޓަރ ޢަލީ ޚާލިދު ވިދާޅުވީ މިއީ ފެށުމެއްކަމަށާ، މިފަދަ މިއުޒިކް އެވޯޑް ޙަފްލާއެއް ދިވެހި ފަންނުވެރިކަމަށް ބޭނުންޖެހިފައިވާ މިންވަރު ފާހަގަކުރެވިފައިވާކަމަށެވެ. އަދި ކުރިއަށްއޮތްތާނގައި މި އެވޯޑް މިއަށްވުރެއްވެސް ފުރިހަމަކުރެވޭނެ ގޮތްތަކަކީ ކޮބައިތޯ ބަލާ، އެ މަގަށް މަސައްކަތްކުރާނެކަމަށެވެ.
