އިސްލާމިކް މިނިސްޓްރީގެ ކުރީގެ ޕާމަނަންޓް ސެކްރެޓަރީ (ޕީއެސް)މުސްއަބު އަބްދުﷲ މަގާމުން ވަކިކުރި މައްސަލާގައި އޭނާއަށް ދޭންޖެހޭ ފައިސާގެ މައްސަލާގައި ސިވިލްސަރވިސް ކޮމިޝަނުން އިސްތިއުނާފުކޮށްފައިވާ މައްސަލަ އަނބުރައި ނަގަން އެކޮމިޝަނުން ނިންމައިފިއެވެ.
މުސްއަބް އަބްދުﷲ، އިސްލާމިކް މިނިސްޓްރީގެ ޕާމަނެންޓް ސެކެޓްރީ ކަމުން ވަކިކުރީ ގާނޫނާ ޚިލާފަށް ކަމަށާއި، މުސާރައާއި އިނާޔަތުގެ ބަދަލުގެ ގޮތުގައި 1.18 މިލިއަން ރުފިޔާ ބަދަލުގެ ދޭން ސިވިލް ސާވިސްގެ މައްޗަށް ސިވިލް ކޯޓުން ހުކުމްކުރީ މިދިޔަ އޮގަސްޓުމަހުއެވެ.
މިމައްސަލަ އިސްތިއުނާފުކޮށް، ސިވިލް ސާވިސް ކޮމިޝަނުން ވަނީ ހައިކޯޓުގައި އެޕީލްކޮށްފައެވެ. އިސްތިއުނާފު މައްސަލަ އަނބުރައި ގެންދަން އެކޮމިޝަނުން ނިންމިކަން ހާމަކުރީ ހައިކޯޓުގައި އާދިއްތަ ދުވަހު އޮތް ޝަރީއަތުގެ މަޖިލީހުގައެވެ. އެ ކޮމިޝަނުން ހައިކޯޓުގައި ބުނެފައިވަނީ މިހާރު ބޭނުންވަނީ މައްސަލަ އަނބުރާ ގެންދިއުމަށް ކަމަށެވެ. އެއީ އެ ކޮމިޝަނަށް ދެއްކޭނެ ގާނޫނީ ހުއްޖަތުތަކެއް މިހާރު ނެތުމުން ކަމަށްވެސް ބުންޏެވެ.
މުސްއަބު 2019ވަނަ އަަހަރުގެ ސެޕްޓެމްބަރުމަހު ޕީއެސްކަމުގެ މަގާމުން ވަކި ކޮށްފައިވަނީ ގިނަ ދުވަސްތަކެއް ވަންދެން ސަސްޕެންޝަންގައި ބެހެއްޓުމަށްފަހުއެވެ.
ވަޒީފާއިން ވަކި ކުރުމާއި ގުޅިގެން މުސްއަބުވަނީ އޭނާ ސްސްޕެންޝަންގައި ހުރި މުއްދަތުގެ މުސާރައާއި އިނާޔަތް ހޯދުމުގެ އިތުރުން އޭނާ ވަޒީފާއިން ވަކިކުރީ ގާނޫނާ ޚިލާފަށް ކަމަށް ކަނޑައަޅާދިނުމަށް ސިވިލް ސާވިސް ކޮމިޝަނާއި ސިވިލް ކޯޓުގައި ދެކޮޅަށް ދައުވާ ކޮށްފައެވެ. އެ ދައުވާގައި ސިވިލް ކޯޓުން މައްސަލަ ނިންމާފައިވަނީ އޭނާއާއި ދެކޮޅަށެވެ.
އެހެންނަމެސް އޭނާގެ ފަރާތުން ފަހުން ވަނީ މައްސަލަ ހައި ކޯޓުގައި އިސްތިއުނާފް ކޮށްފައެވެ. ހައިކޯޓުން ހުކުމް ކޮށްފައިވަނީ އޭނާ ވަޒީފާއިން ވަކިކޮށްފައިވަނީ ގާނޫނާއި ޚިލާފަށް ކަމަށާއި، މުސާރައާއި އިނާޔަތުގެ ގޮތުގައި ލިބެންޖެހޭ 1،187،666.60ރ ކުރިޔަށް އޮތް 14 ދުވަހުގެ ތެރޭގައި އޭނާއަށް ދޭން ޖެހޭނެ ކަމަށެވެ. އެހެންނަމަވެސް ހައި ކޯޓުން ކުރި ހުކުމުގައި އޭނާގެ ވަޒީފާ އަބުރާ އިއާދަ ކޮށްދީަފައި ނުވެއެވެ. ސަބަބެއް ކަމުގައި ހުކުމުގައި ބަޔާން ކޮށްފައިވަނީ، އޭނާ އަދާ ކުރަމުންދިޔަ މަގާމަށް މިހާރު އެހެން މީހަކު އައްޔަން ކޮށްފައި ވުމުގެ ސަބަބުންނެވެ.
ސިވިލް ސާވިސް ކޮމިޝަނުން މުސްއަބު ވަޒީފާއިން ވަކި ކޮށްފައިވަނި، އޭނާ ދައުލަތުގެ ސިއްރު ލިޔުމެއް ސޯޝަލް މީޑިއާގައި އާންމު ކުރުމާއި އަދި އޭގެ އިތުރުން މިނިސްޓްރީގެ މުވައްޒަފެއްގެ ގޮތުގައި ނުހިމެނޭ މީހަކު މުވައްޒަފެއްކަމުގައި ހިމަނާ އޭނާއަށް މުސާރަ ދީފައިވާކަމަށް ބުނާ މައްސަލައެކެވެ.
