ރާއްޖޭގެ ވެރިކަން އިދިކޮޅު ޕީޕީއެމްއަށް ލިބިއްޖެ ކަމުގައިވާނަމަ ދެން ދުވަހަކުވެސް ސަލާމަތެއް ނުވާނެކަމަށް އެމްޑީޕީގެ ފޭދޫ ދާއިރާގެ މެމްބަރު މުހައްމަދު ނިހާދު ވިދާޅުވެއްޖެއެވެ.

ނިހާދު މިހެން ވިދާޅުވީ އެމްޑީޕީގެ ތެރޭގައި އުފެދިފައިވާ ޚިޔާލުތަފާތު ވުންތަކާއިއެކު ރައީސް ނަޝީދާއި ރައީސް ޞާލިހުގެ ފެކްޝަންގެ ވާދަވެރިކަން ބޮޑުވެފައިވާ ދަނޑިވަޅެއްގައެވެ. އަންނަ އަހަރު ބާއްވާ ރިޔާސީ އިންތިޚާބަށްވެސް އެމްޑީޕީއަށް ކެނޑިޑޭޓެއް ނުދެއްކިގެން އުޅޭ މައިގަނޑު ސަބަބަކީވެސް ދެރައީސުންގެ ތެރޭގައި އޮތް ޚިޔާލު ތަފާތުވުމެވެ.

މެމްބަރު ނިހާދު ވިދާޅުވީ އެމްޑީޕީގެ އާންމު މެމްބަރުން ޕީޕީއެމްއަށް ވެރިކަން ލިބެން ނޭދޭކަމަށެވެ. ޕީޕީއެމްއަށް ވެރިކަން ލިބިއްޖެނަމަ ކަންކަން ވެގެންދާނެ ގޮތް އެމްޑީޕީގެ އާންމު މެމްބަރުންނަށް ސާފުވާކަމަށް ނިހާދު ވިދާޅުވިއެވެ. ކޯލިޝަން ވެރިކަމެއް ކަމުގައި ވީނަމަވެސް އެމްޑީޕީން ދަމަހައްޓަން ބޭނުންވާ ކަމަކީ ޕީޕީއެމްއަށް ވެރިކަން ނުލިބޭނެ ގޮތެއް ހޯދުންކަމަށާއި، ޕީޕީެމްއަށް ވެރިކަން ލިބިއްޖެނަމަ ސަލާމަތެއް ނުވާނެކަމަށް ނިހާދު ވިދާޅުވިއެވެ.

އެމްޑީޕީ މެމްބަރުން އެދެނީ އެމްޑީޕީ ވެރިކަމެއް އޮންނަން. އެމްޑީޕީ އިސްވެ އޮވެ އުފައްދާ ވެރިކަމެއް ވިޔަސް އަނިޔާވެރި ބައެއްގެ އަތްމައްޗަށް ޤައުމުގެ ވެރިކަން ދީއްލާލަން ބޭނުމެއްނުވޭ! އެމްޑީޕީ މެމްބަރުންނަށް ސާފުވާ ކަމަކީ ޕީޕީއެމްގެ ބާރު އޮތް ވެރިކަމެއް އަތުވެއްޖެނަމަ ދެން ދުވަހަކުވެސް ސަލާމަތް ނުވާނެކަން.

– ނިހާދު ވިދާޅުވިއެވެ.

އެމްޑީޕީގެ ޕްރައިމަރީ ބާއްވާނެ ތާރީހެއް މިހާތަނަށްވެސް ދެއްކިފައި ނުވާއިރު، އިިދިކޮޅު ޕީޕީއެމްއިން ރިޔާސީ އިންތިޚާބުގައި ނެރުމަށް ހަމަޖެހިފައިވާ ކެނޑިޑޭޓަކީ ކުރީގެ ރައީސް ޔާމީންކަމަށް ވަނީ ނިންމާފައެވެ. އަދި ޕީޕީއެމްއިން ވަނީ މިނިންމުން ނިންމުމަށްފަހު ރައީސް ޔާމީނާއިއެކީ ރިޔާސީ ކެމްޕެއިންވެސް ކުރަމުންނެވެ.

އެމްޑީޕީގެ ތެރޭގައި އޮތް ޚިޔާލު ތަފާތުވުންތަކާއިއެކު އެޕާޓީއަށް ވެރިކަން ލިބިދާނެކަމާއިމެދު އެމްޑީޕީގެ ބައެއް މެމްބަރުންގެ ހިތުގައިވެސް ވަނީ ސުވާލު އުފެދިފައެވެ.