ހަކަތައަކީ އެއާ ނުލާ އިންސާނުންގެ ދިރިއުޅުން އާރާސްތު ނުކުރެވޭނެ ވަސީލަތެކެވެ. އަދި ވަކީން ޚާއްސަކޮށް، ފާއިތުވެދިޔަ 100 ވަރަކަށް އަހަރުގެ މުއްދަތުގައި ދުނިޔެއަށް އައިސްފައިވާ ސިނާއީ އިންގިލާބުގެ ނަތިޖާއެއްގެ ގޮތުން އީޖާދުވެގެން ގޮސްފައިވަ ދަތުރުފަތުރުވެ ވަސީލަތްތައް އެކި ބާވަތްބާވަތުގެ ހަކަތައަށް ބަރޯސާ ވަމުންދާ މިންވަރު ވަނީ އެތައް ގުނައަކުން މަތިވެގެން ގޮސްފައެވެ.

އޭގެ ނަތީޖާއަކަށް ވެގެން ދިޔައީ، ސިނާއީ އިންގިލާބުގެ ކުރިން ހަކަތަ އުފެއްދުމަށް ބޭނުން ކުރަމުންއައި އިންސާނީ ވަސީތަލަތްތަކާއި އަދި ދިރޭ ޖަވަނާރުގެ ވަސީލަތުން ބޭނުން ކުރަމުންއައި ހަކަތައިގެ ބާވަތްތައް ދޫކޮށް، މިއަދު ދުނިޔޭގައި އެންމެ ފުޅާ ދާއިރާއެއްގައި ބޭނުން ކުރަމުން އަންނަށް ހަކަތައިގެ ވަސީލަތްކަމުގައި ތެލާއި ގޭހާއި ބޯޓު ދެލި ވެގެން ދިއުމެވެ.

އެހެންނަމަވެސް، މިއީ ބިމު އަޑިންނަގާ ހަކަތައިގެ ބާވްތަތަކަށް ވެފައި، އިންސާނުންގެ ބޭނުންތަކަށް ހަކަތަ ބޭނުންކުރެވޭ މިންވަރު ފަހުގެ ޒަމާންތަކުގައި އެތައް ގުނައެއް މަތިވެގެން ދިއުމާއެކު، މިވަސީލަތްތަކަކީ ދެމެހެއްޓެނިވި، އަދި ހައްދެއް ނެތް މިންވަރަށް ލިބެން ނެތް ވަސީލަތްތެއްކަން މިއަދު މިވަނީ ކަށަވަރުވެ ޔަގީން ކުރެވިފައެވެ.

ހަމައެއާއެކު 20 ވަނަ ގަރުނުގެ މެދުތެރޭގައި އިންސާނުން އިޖާދުކުރި ނިއުކުލިއަރ ހަކަތައިގެ ވަސީލަތަކީ ފުޅާ ދާއިރާއެއްގައި އިންސާނުންނަށް ބޭނުންވާ ހަކަތައް އުފެއްދޭ، ދުނިޔެ ހޯދި ސައިންސާއި ޓެކްނިލޮޖީގެ ކުރިއެރުންތަކާއި ގުޅިފައިވާ ހަކަތައިގެ ވަސީލަތަކަށް ވެގެންދިޔަ ނަމަވެސް، ނިއުކުލިއަރ ހަކަތައިގެ ބޭނުން އިންސާނުން ނުހަމަގޮތުގައި ކޮށް، އެއީ ގެއްލުންދެނިވި ނުރައްކާތެރި ހަތިޔާރަކަށް ބަދަލު ކުރުމާއެކު، ނިއުކުލިއަރ ހަކަތަައިގެ ވާދަވެރިކަން ވެގެންދިޔައީ ދުނިޔޭގެ ގައުމުތަކުގެ މެދުގައި މިއަދު އުފެދިގެން ގޮސްފައިވާ ބޮޑެތި ޚިޔާލުތަފާތުވުންތަކާއި ހަމަނުޖެހުންތަކުގެ އެއް އަސްލު ކަމުގައެވެ.

މީގެ އިތުރުން، ދުނިޔޭގައި މިހާރު ބޭނުން ކުރެވޭ ނިއުކުލިއަރ ހަކަތައަކީ އެހަކަ އުފެއްދުމަށް ކުރިޔަށް ގެންދާ ރިއެކްޝަންތަކުން ނުރައްކާތެރި ނިއުކުލިއަރ ކުނި އުފައްދާ ވަސީލަތަކަށް ވުމާއެކު، ނިއުކުލިއަރ ހަކަތަ އާންމު ބޭނުންތަކަށް އުފައްދަމުން ދިއުން ވެގެން ގޮސްފައިވަނީ އަގުބޮޑު، އަދި ސިއްޙީ އެތައް ރިސްކުތަކެއް އޭގައި އެކުލެވިގެންދާ ނުރައްކާތެރި ޕްރޮސެސްއަކަށެވެ.

އެހެންކަމުން، އިއާދަ ކުރަނިވި، ނުރައްކާތެރިކަމެއް ނެތް، ނިއުކުލިއަރ ހަކަތައިގެ ވަސީލަތެއް އީޖާދުކުރުމަށް ދުނިޔޭގެ ސައިންސްވެރިން މެދު ނުކެނޑި މަސައްކަތް ކުރަމުންދާތާ މިހާރުވަނީ އެތައް އަހަރެއް ފާއިތުވެގެން ގޮސްފައެއެވެ. މިގޮތުން މި ދެންނެވުނު ރިސާޗްތައް ދުނިޔޭގެ ގައުމުތަކުން ގުޅިގެން ހަދަމުންދާތާ އެތައް އަހަރެއް ފާއިތުވެގެން ގޮސްފައިވަނިކޮށް، އެމެރިކާގެ ސައިންސްވެރިން މިވަނީ، ސާފު (ހަކަތައް އުފެއްދުމަށްފަހު ނުރައްކާތެރި ނިއުކުލިއައަރ ވޭސްޓް މެޓީރިއަލް ބާކީނުވާ، އަދި ދުނިޔޭގެ ތިމާވެއްޓަށް ގެއްލުންދޭ ގްރީހައުސް ގޭސް ބޭރު ނުކުރާ) ނިއުކުލިއަރ ހަކަތަ އުފެއްދުމަށް ކުރަމުންދިޔަ މަސައްކަތުގައި ކާމިޔާބީއާއި ހަމައަށް ދަތުރު ކޮށްފައެވެ.

ނިއުކުލިއަރ ހަކަތައާއި ގުޅުންހުރި މުޅިން އާ ހޯދުމެއް!

މިހަފްތާގެ އަންގާރަ ދުވަހު އެމެރިކާގެ ސައިންސްވެރިންވަނީ ނިއުކުލިއަރ ހަކަތައާއި ގުޅުންހުރި ސައިޓިފިކް މުޅިން އާ ހޯދުމަކާއި ހަމައަށް ދަތުރު ކުރެވިފައިވާކަން އިއުލާން ކޮށްފައެވެ. އޭގެ ކުރިން، މިހަފްތާފެ އާދީއްތަ ދުވަހު އެމެރިކާގެ އެނާރޖީ ޑިޕާޓްމަންޓުންވަނީ އެގައުމުގެ ފެޑެރަލް ލެބޯޓުރީގައި ނިއުކުލިއަރ ފިޝަން ރިސާޗުއާއި ގުޅުންހުރި މުހިންމު އާ ހޯދުމެއް އީޖާދު ކޮށްފައިވާކަމަށް ބުނެފައެވެ. އެހެންނަމަވެސް މިހޯދުންތަކާއި ގުޅުންހުރި މައުލޫމާތު އޭރު އެމެރިކާގެ ރަސްމީ އިދާރާތަކުން ހާމަކޮށްފައި ނުވިނަމަވެސް، ބައިނަލްއަގުވާމީ ނޫސްތަކުގައި ވަނީ މިއީ އިއާދަކުރަނިވި، ނުސާފުކަމެއް ނެތް ނިއުކުލިއަ ހަކަތައާއި ގުޅުންހުރި މުޅިން އާ އީޖާދުތަކެއް ކަމުގައި ރިޕޯޓު ކޮށްފައިއެވެ.

މި ހަފްތާގެ އާދީއްތަ ދުވަހު ފައިނޭންޝަލް ޓައިމްސްއިން ރިޕޯޓު ކޮށްފައިވާ ގޮތުގައި، އެމެރިކާގެ ކެލިފޯނިއާގައި ހުންނަ ލޯރެންސް ލިވަރމޯ ނޭޝަނަލް ލެބޯޓްރީ (LLNL)ގެ ފިއުޝަން ރިއެކްޓަރުގައި ކުރި އެކްސްޕެރިމެންޓްތަކުން، ނުސާފުކަމެއް ނެތް އަދި ނިއުކުލިއަރ ކުނިބުނިވެސް އުފެއްދުމަކާއި ނުލާ ނިއުކުލިއަރ ހަކަތަ އުފެއްދުމަށް ހަދަމުން އައި ތަހުލީލުތަކުން ސައިންސްވެރިންވަނީ ކާމިޔާބު ނަތިޖާތަކެއް ނެރެފައެވެ.

މިގޮތުން، ކާމިޔާބުކަމާއެކު، ފިއުޝަން ރިއެކްޝަންއަކުން ސައިންސްވެރިން މުޅިން އަލަށް ނިއުކުލިއަ ހަކަތަ އުފައްދާފައިވާއިރު، މިއީ ފިއުޝަން ރިއެކްޝަންގެ ވަސީލަތުން ސައިންސްވެރިންނަށް ނިއުކުލިއަ ހަކަތައް އުފެއްދުނު ފުރަތަމަ ފަހަރެވެ. މިއީ ދުނިޔެއަށް އަލިކޮށްދޭ އިރުގައި އުފައްދާ ބާވަތުގެ ހަކަތައެވެ. އަދި މިއީ ކާބަންގެ މާއްދާތައް ނުހިމެނޭގޮތުން ހަކަތަ އުފެއްދުމުގައި ލިބިގެންދިޔަ އެންމެ ބޮޑު ކުރިއެރުމެއްކަންވެސް ސައިންސްވެރިން ވަނީ ފާހަގަ ކޮށްފައެވެ.

ދުނިޔޭގެ ބައެއް ސައިންސްވެރިން ފާހަގަކުރާ ގޮތުގައި، ދުނިޔޭގެ މުސްތަގްބަލުގެ ހަކަތައިގެ އެންމެ މުހިންމު ވަސީލަތަކަށް ވެގެންދާނީ ނިއުކުލިއަރ ފިއުޝަންގެ ވަސީލަތުން އުފައްދާ ހަކަތައެވެ. މިއީ ބޭކާރު ނިއުކުލިއަރ ކުނި ބުނި (ނުރައްކާތެރިކަންބޮޑު، އަދި އެތައް ޒަމާނަކަށް ފަރުވާތެރިކަމާއެކު ބަހައްޓަންޖެހޭ ނިއުކުލިއަރ ވޭސްޓު) އުފެއްދުމެއް ނެތް، އަދި މިހަކަތައިގެ ވަސީލަތުން ޖައްވަށް ގެއްލުންދޭ އެއްވެސް ބާވަތެއްގެ ގްރީންހައުސް ގޭހެއްވެސް އުފައްދާ ނުދޭ، ސާފު ހަކަތައިގެ ވަސީލަތެކެވެ.

އަލަށް އުފެއްދި ހަކަތަ އުފައްދަނީ ކިހިނެއް؟ ފިއުޝަންއާއި ފިޝަންއަކީ ކޮބާ؟

އެމެރިކާގެ ލޯރެންސް ލިވަމޯ ނޭޝަނަލް ލެބޯޓްރީގެ ނޭޝަނަލް އިގްނިޝަން ފެސިލިޓީގައި ނިއުކުލިއަރ ފިއުޝަން ރިއެކްޝަންއަކުން ނިއުކުލިއަރ ހަކަތައް އުފައްދާފައިވާއިރު، ސައިންސްވެރިންނަށް މުޅިން އަލަށް މި ހޯދުނު ކާމިޔާބީ ވެގެންދާނީ ހަކަތައިގެން ޓެކްނޮލޮޖީއާއި ގުޅުންހުރި އިންގިލާބީ އީޖާދަކަށެވެ.

އަދި މިއީ އާދަޔާ ޚިލާފު ބޮޑު ކާމިޔާބާިއެެއްގެ ގޮތުގައި ދުނިޔޭގެ ސައިންސްވެރިން ފާހަގަ ކުރަމުންދާއިރު، މި ކާމިޔާބީ ވެގެންދާނީ މުސްތަގުބަލުގައި ދުނިޔޭގައި އުފައްދާނެ ހަކަތައިގެ އެންމެ މުހިންމު ވަސީލަތަށް ކަމުގައިވެސް ސައިންސްވެރިން އުއްމީދު ކުރެއެވެ.

ނިއުކުލިއަ ފިއުޝަންއަކީ ކޮބާ؟

ފިއުޝަން އަކީ، ދުނިޔޭގެ އެކި ކަންކޮޅުތަކުގައިވާ ނިއުކުލިއަރ ރިއެކްޓަރުތަކުގައި ހަކަތައް އުފައްދާ ފިޝަން ޕްރޮސެސްއާއި ތަފާތު ވަސީލަތެކެވެ. މިގޮތުން ނިއުކުލިއަރ ފިއުޝަން ޕްރޮސެސްއަކީ ދެ އެޓޮމެއްގެ (އެޓޮމްއަކީ މާއްދީ އެއްޗެއްގެ އެންމެ ކުޑަ މާއްދާ) ނިއުކުލިއަ (ނިއުކުލިއައަކީ އެޓޮމްގެ އެންމެ އެތެރޭގައި އިންނަ ބައި) ވަކިވަކި ކުރުމުގެ ބަދަލުގައި، ދެ އެޓޮމިކް ނިކުލިއައި އެއްކޮށްގެން ހަކަތަ އުފައްދާ ވަސީލަތަކަށް ކިޔާ ނަމެކެވެ. މިގޮތުން، ނިއުކުލިއަރ ފިއުޝަންއަކީ، ދުނިޔެއަށް އަލިކޮށްދޭ އިރުގައި ހަކަތައް އުފައްދާ ވަސީލަތް ނަކަލު ކޮށްގެން މަސްނޫއީގޮތުން ސައިންވެސް ހަކަތައް އުފެއްދުމުގައި ހޯދި މުޅިން އާ ހޯދުމެއްވެސްމެއެވެ. މި ގޮތުން އުފައްދާ ނިއުކުލިއަ ހަކަތައިން، ނިއުލުކިއަ ވޭސްޓް މެޓީރިއަލް އެއްވެސް މިންވަރަކަށް އުފައްދައެއް ނުދެއެވެ.

ނިއުކުލިއަރ ފިއުޝަންގައި، ދޭއް ނުވަތަ އެއަށްވުރެ ގިނަ އެޓޮމްތަކެއް އެކުވެ އެޓޮމްތައް ބަދަލުވެގެން ދަނީ ބޮޑު އެއް އެޓޮމަކަށެވެ. އެޓޮމްތައް އެކުވެ، ބޮޑު އެޓޮމަކަށް ބަދަލުވުމުގެ މަރުހަލާގައި، އާދަޔާ ޚިލާފަށް ގިނަ އަދަދެއްގެ ހަކަތަ ހޫނުގެ ގޮތުގައި ބޭރުވެގެން ދެއެވެ.

ދުނިޔޭގެ އެކި ކަންކޮޅުތަކުގައި ތިބި ސައިންސްވެރިވަނީ ފާއިތުވެދިޔަ ބައި ގަރުނެއްހާ މުއްދަތުގައި ނިއުކުލިއަ ފިއުޝަންގެ ވަސީލަތުން ހަކަތައް އުފެއްދޭނެ މަގެއް ހޯދުމަށް ދިރާސާ ކުރަމުން ގެންގޮސްފައެވެ. މަަގުސަދަކީ ހުސްނުވާ، ކާބަން އެކުލެވިގެން ނުވާ ހަކަތައިގެ ވަސީލަތެއް އީޖާދު ކުރުމެވެ. އަދި، މިހާރު ދުނިޔޭގައި ގާއިމް ކޮށްފައިވާ ނިއުކުލިއަރ ރިއެކްޓަރތަކުން، ފިޝަން ރިއެކްޝަންއިން (އެއް އެޓޮމްގެ ނިއުކުލިއައި އިން ގިނަ އެޓޮމިކް ނިއުލިއައި ތަކެއް އުފައްދައިގެން ނިއުކުލިއަރ ހަކަތަ އުފެއްދުން) ނިއުކުލިއަ ހަކަތައް އުފެއްދުމުން ބާކީވެގެންދާ ފަދަ، ނިއުކުލިއަރ ވޭސްޓް (ބާކީވާ ނުރައްކާތެރި މައުދަންތައް) އެކުލެވިގެންނުވާ ނިއުކުލިއަރ ހަކަތައިގެ ވަސީލަތެއް އީޖާދު ކުރުމެވެ.

ނިއުކުލިއަރ ފިއުޝަން ރިއެކްޝަންތަކުގައި ބޭނުން ކުރަނީ ޑިއުޓީރިއަމްއާއި ޓްރިޓިއަމް ނަމަކަށް ކިޔާ ދެ މައުދަނެކެވެ. ނުވަތަ ދެ މައްދާއެކެވެ. މި ދެ މާއްދާއަކީވެސް ހައިޑްރޮޖެންގެ އައިސޮޓޯޕްތަކެވެ. ހައިޑްރޮޖެންއަކީ އެންމެ އާންމު، އަދި ބޯން ބޭނުންކުރާ ފެނުގައި މަތީ ދަރަޖައަކަށް އެކުލެވިގެންވާ މާއްދާއެކެވެ.

މިގޮތުން، ބޯން ބޭނުންކުރާ ފެން ތައްޓެއްގައި އެކުލެވޭ ފެނުން ލިބޭ ހައިޑްރޮޖެންގެ މާއްދާގެ ތެރެއަށް ޓްރިޓިއަމްގެ މަދު މިންވަރެއް ބޭނުންކޮށްގެ އުފައްދާ ނިއުކުލިއަރ ހަކަތައިން އާދައިގެ ގޭބިސީއަކަށް ބޭނުންވާ އެއް އަހަރުގެ ނިއުކުލިއަރ ހަކަތައް އުފައްދާ ދެއެވެ. މިއީ ނިއުކުލިއަރ ވިހައިގެ ނުރައްކަލެއް ނެތް، ޖައްވަށް ގެއްލުންދޭ ނުރައްކާތެރި އެއްވެސް މާއްދާއެއް ބޭރު ނުކުރާ ސާފު ހަކަތައެވެ.

މިހަކަތައިގެ ވަސީލަތް މުހިންމު ވަނީ ކީއްވެ؟

މިއީ މިބާވަތުގެ ހަކަތަ ދުނިޔޭގެ ތާރީޚުގައިވެސް ސައިންވެރިންނަށް ކާމިޔާބުކަމާއެކު އުފެއްދުނު ފުރަތަމަ ފަހަރެވެ. އަދި ފާއިތުވެދިޔަ އަހަރުތަކުގައި މިބާވަތުގެ ނިއުކުލއަރ ހަކަތަ އުފެއްދުމަށް ސައިންވެސް އެތަކެއް ތަހުލީތަކެއްކޮށް ކާމިޔާބީއާއިހަމައަށް ދަތުރު ކުރެވިފައި ނުވިނަމަވެސް، ކާމިޔާބު ކަމާއެކު ސާފު ނިއުކުލިއަރ ހަކަތަ އުފެއްދޭނެކަމުގެ ޔަގީންކަން މިއަދު ސައިންސްވެރިން މިވަނީ ހޯދާފައެވެ.

އެހެންނަަމަވެސް، ވިޔަފާރި އަދި އާންމު ބޭނުންތަކަށް މި ހަކަތަ އުފެއްދުމަށް އަދިވެސް އެތައް އަހަރެއް ނަގާނެކަމަށް ސައިންވަރިން އަންދާޒާ ކުރެއެވެ. ސަބަބަކީ ފިއުޝަން ރިއެކްޝަންއިން އިންސާނުންނަށް ނުސާފުކަމެއް ނެތް ނިއުކުލިއަރ ހަކަތަ އުފެއްދިފައިވި ނަމަވެސް، ދުނިޔެއަށް ބޭނުން ކުރެވޭ މިންވަރަށް މި ހަކަތައް އުފެއްދޭނެކަމުގެ ޔަގީންކަން އަމަލީ ގޮތުން ހޯދަން ޖެހިފައި ވުމެވެ. އެހެން ނޫންކަމަށް ވާނަމަ، މި ހޯދި އާ އީޖާދުގެ މާ ބޮޑު ބޭނުމެއް ނެތި ހިގައިދާނެކަމަށް ސައިންސްވެރިން ދެކޭތީވެސް މެއެވެ.

އެހެންކަމުން، ދެން ސައިންވެސް ކުރިމަތިލާން ޖެހިފައިވާ މަރުހަލާއަކީ ނުސާފުކަމެއް ނެތް މި ނިއުކުލިއަރ ހަކަތަ ދުނިޔެއަށް ބޭނުން ކުރެވޭނެ އުސޫލަކުން، އާންމު ބޭނުންތަކަށް އަމާޒުކޮށް އުފެއްދުމަށް ކުރާންޖެހޭ މަސައްކަތްތަކެވެ. ހަމަ އެއާއެެކު، އަގުހެޔޮކޮށް މިހަކަތަ އުފެއްދޭނެ މަގުތަށް ހޯދާ، މިއީ ވިޔަފާރީގެ ބޭނުންތަކަށް އެކަށިގެންވާ ހަކަތަ އުފެއްދޭނެ ވަސީލަތެއްކަން ޔަގީންކޮށް، އެމަގު ފަހިކުރުމަކީ ދުނިޔޭގެ ސައިންސްވެރިންގެ ކުރިމަތީގައި މިހާރު އޮތް އެންމެ ބޮޑު މަސައްކަތެވެ. ގޮންޖެހުމެވެ.

މިގޮތުން ނިއުލިއަރ ފިއުޝަންގެ ވަސީލަތުން ހަކަތަ އުފައްދާ، ކަރަންޓުގެ ގޮތުގެ ގޮތުގައި އެހަކަތަ ޕަވަރ ގްރިޑްތަކަށް ވާސިލްކޮށްދޭން އަދި ގިނަ އަހަރުތަކެއް ނަގާނެކަމަށް ސައިންސްވެރިން ދަނީ ބުނަމުންނެވެ. އެހެންކަމުން، ސައިންސްވެރިން ހޯދި ހަކަތައިގެ މި އާ ވަސީލަތަކީ ދުނިޔެއަށް ނުހަނު ބޭނުންތެރި ވަސީލަތަކަށް ވިނަމަވެސް، ތިމާވެއްޓާއި ރައްޓެހި، ސަލާމްތަތެރިކަން ބޮޑު، ހުސްވުމެއްނެތް، މި އިއާދަކުރަނިވި ހަކަތަ އާންމުކޮށް ދުނިޔޭގައި ބޭނުންކުރަން ފެށުމަށް ކުރާ އުއްމީދަކީ އަދި އެތައް އަހަރެއްގެ ދިގު އިންތިޒާރީއެކެވެ.