ހޮލީވުޑްގެ ފިލްމް އެއް ކުޅެން ލިބިއްޖެ ނަމަ އިންކާރު ނުކުރާނެ ކަމަށާއި، ރަނގަޅު އޮފާއެއް އަތުވެއްޖެ ނަމަ މަސައްކަތް ކުރަން ހުރީ ތައްޔާރަށް ކަމަށް ބޮލީވުޑްގެ މަޝްހޫރު އެކްޓަރު ރަންބީރު ކަޕޫރު ބުނެފިއެވެ.
ސައުދީ އަރަބިއްޔާގެ ޖިއްދާގައި މިހާރު ކުރިއަށްދާ ދެވަނަ ރެޑް ސީ އިންޓަނޭޝަނަލް ފިލްމު ފެސްޓިވަލްގައި ބައިވެރިވެ އޭގެ ހަވާސާގެ ތެރެއިން ހޮލީވުޑްގެ ޚަބަރުތައް ގެނެސްދޭ ޑެޑްލައިނަށް ދިން އިންޓަވިއުއެއްގައި 40 އަހަރުގެ އެކްޓަރު ބުނީ ހޮލީވުޑްއިން ފުރުސަތެއް ލިބިއްޖެ ނަމަ އެއްވެސް އިރެއްގައި ނޫނެކޭ ނުބުނާނެ ކަމަށެވެ.
ރަންބީރު މިވާހަކަތަށް ދެއްކި އިރު އޭނާގެ އަންހެނުން އާލިއާ ބަޓް ދާދި ފަހުން "ހާޓް އޮފް ސްޓޯން" ކިޔާ ހޮލީވުޑްގެ ފިލްމެއްގެ މަސައްކަތްކޮށްފައިވެއެވެ. އަންނަ އަހަރު އެ ފިލްމު ރިލީޒްކުރާނެއެވެ.
View this post on Instagram
މި ފެސްޓީވަލްގައި ވާހަކަ ދައްކަމުން 40 އަހަރުގެ އެކްޓަރު ބުނީ އަބަދު ވެސް ޑައިރެކްޓްކުރުމަކީ ވަރަށް ބޮޑު ހުވަފަނެއް ކަމަށެވެ. އެކަމަކު އަމިއްލަ އަށް ސްކްރިޕްޓް ލިޔުމުގެ ގާބިލުކަން ނެތުމުން، ފިލްމެއް ޑައިރެކްޓްކުރުމަކީ ވަރަށް އުނދަގޫ ކަމަކަށް ވާނެ ކަމަށް ބުންޏެވެ. ނަމަވެސް އަމިއްލަ އަށް ވާހަކައެއް ޑިވެލޮޕްކޮށް، އެއަށް ސްކްރީންޕްލޭ ލިޔައި، ޑައިރެކްޓްކުރަން ބޭނުންވާ ކަމަށް ބުންޏެވެ.
ރަންބީރްގެ އެންމެ ފަހުގެ ފިލްމަކީ އަންހެނުންނާ އެކީ އޮގަސްޓްގައި ފެނިގެން ދިޔަ "ބުރައްމަަސްތުރާ" އެވެ. އަންނަ އަހަރު އޭނަގެ ދެ ފިލްމެއް ރިލީޒްވާނެ އެވެ. އެއީ އަދި ނަން އިއުލާން ނުކުރާ ޑައިރެކްޓަރު ލަވް ރަންޖަންގެ ރޮމޭންޓިކް ކޮމެޑީއަކާއި ޑައިރެކްޓަރު ސަންދީޕް ރެޑީ ވަންގާގެ ތުރިލާ "އެނިމަލް" އެވެ.
