ފަސް ދުވަހުގެ ތަމްރީނު ޕްރޮގްރާމަކަށް ރާއްޖޭގެ ފަނޑިޔާރުން އިންޑިއާއަށް ފުރައިފިއެވެ.
މިއީ އިންޑިއާގެ ނޭޝަނަލް ޖުޑީޝަލް އެކަޑަމީ އާއި ރާއްޖޭގެ ޖުޑީޝަލް ސާވިސް ކޮމިޝަނާ ދެމެދު 2020ވަނަ އަހަރު ސޮއިކުރި އެމްއޯޔޫގެ ދަށުން ކުރިއަށްގެންދާ ޕްރޮގްރާމެކެވެ. މިއެއްބަސްވުމުގެ ދަށުން ރާއްޖޭގެ 49 ފަނޑިޔާރަކު 5 ދުވަހުގެ ކަސްޓަމައިޒްޑް ޓްރެއިނިން އަދި ކެޕޭސިޓީ ބިލްޑިންޕްރޮގްރާމަކަށް އިންޑިއާގެ ބޯފަލަށް ދިއުމަށް ވަނީ ހަމަޖެހިފައެވެ.
އިންޑިއާގެ ނޭޝަނަލް ޖުޑީޝަލް އެކަޑަމީ އަކީ 1993ވަނަ އަހަރު އުފެދުނު މުއައްސަސާއެކެވެ. މި ތަނުގެ މި ޕްރޮގްރާމުގެ ދަށުން ދިވެހި ފަނޑިޔާރުންނަށް ތަމްރީނު ދިނުމުގެ އިތުރުން އަވަށްޓެރި ގައުމުތައް ކަމަށްވާ މިޔަންމާ އަދި ބަންގްލަދޭޝް ފަދަ ގައުމުތަކަށް ތަމްރީނު ދިނުމަށް އެހީތެރިވެ، މަގުފަހިކޮށްދޭނެ ކަމަށާއި މިއީ ބޯޕާލްގެ ނޭޝަނަލް ޖުޑީޝަލް އެކަޑަމީ ކެމްޕަހުގައި ކުރިއަށްގެންދާ ދިވެހި ފަނޑިޔާރުންނަށް އަމާޒުކޮށްގެން ހިންގާ ފުރަތަމަ ތަމްރީނު ޕްރޮގްރާމް ކަމަށް ރާއްޖޭގެ ޖޭއެސްސީން ބުނެއެވެ.
މި ޕްރޮގްރާމުގައި ބައިވެރިވާ ފަނޑިޔާރުންގެ ތެރޭގައި ހިމެނެނީ ހައިކޯޓުގެ 2 ފަނޑިޔާރަކާއި ސުޕީރިއާ ކޯޓުގެ 14 ފަނޑިޔާރަކާއި 6 އަންހެން ފަނޑިޔާރަކާއެކު އެކި އަތޮޅުތަކުން 33 މެޖިސްޓްރޭޓުންނެވެ. މި ތަމްރީނު ޕްރޮގްރާމް ކުރިއަށް ގެންދިއުމަށް ހަމަޖެހިފައިވަނީ މިމަހުގެ 12 އިން 16 އަށެވެ. މި ޕްރޮގްރާމުގައި އިންޑިއަން ޖުޑިޝަރީ، ކޮންސްޓިޓިއުޝަނަލް ވިޝަން އޮފް ޖަސްޓިސް، އެލިމެންޓްސް އޮފް ޖުޑީޝަލް ބިހޭވިއަރ، ޖަޖިންގ ސްކިލްސް، ކޯޓް މެނޭޖްމަންޓް އެންޑް ކޭސް މެނޭޖްމަންޓް އަދި އައި.ސީ.ޓީ މެދުވެރިކޮށް ރީ-އިންޖިނިއަރިންގ ޖުޑީޝަލް ޕްރޮސެސްތަކާ ގުޅޭ ސެޝަންތައް ހިމެނެއެވެ.
