ކުރިއަށް އޮތް ރިޔާސީ އިންތިޚާބުގައި އެމްޑީޕީން ވާދަކުރާ ކެނޑިޑޭޓަކު ކަނޑައެޅުމަށް ބާއްވާ ޕްރައިމަރީގައި ކޮންމެ ކެނޑިޑޭޓަކު ބަލިވިޔަސް، ބަލިވާ މީހަކު ޖެހޭނީ މޮޅުވާ މީހެއްގެ ފަހަތުގައި ހުންނަން ކަމުގައި އެމްޑީޕީގެ ކުރީގެ ޗެއާޕާސަން މޫސާ މަނިކު ވިދާޅުވެއްޖެއެވެ.

އެމްޑީޕީގެ ޕްރައިމަރީގައި ރައީސް މުހައްމަދު ޞާލިހު ވާދަކުރައްވާނެކަން ހާމަކުރައްވާފައިވާއިރު، ރައީސް ނަޝީދުވެސް ގެންދަވަނީ ޕްރައިމަރީގައި ވާދަކުރުމަށް މަސައްކަތް ކުރައްވަމުންނެވެ. ނަމަވެސް މިހާތަނަށް ރަސްމީކޮށް އެކަން ދެބޭފުޅުންވެސް އިއުލާން ކޮށްފައި ނުވެއެވެ.

އެމްޑީޕީން ނެރޭނެ ކެނޑިޑޭޓަކު މިހާތަނަށް ސާފު ނުވާއިރު، ރައީސް ނަޝީދާއި ރައީސް ޞާލިހާއިމެދު ސިޔާސީ ވާދަވެރިކަން ބޮޑުވެ، އެކީގައި މަސައްކަތް ކުރަން ދަތުވާ ހިސާބަށް ކަންކަން ގޮސްފައިވާކަމަށް ގިނަ ބަޔަކު ދެކެއެވެ. އަދި ޚުދު ރައީސް ނަޝީދުވެސް ވަނީ ރައީސް ޞާލިހާއިއެކު މަސައްކަތް ކުރުމަކީ އުދަގޫ ކަމެއްކަމަށް ވިދާޅުވެ ސަރުކާރުގެ ސިޔާސަތުތަކަށާއި، ސަރުކާރަށް ވަރަށް ބޮޑަށް ފާޑު ވިދާޅުވަމުންނެވެ.

އެމްޑީޕީއާއި ދާދިފަހުން ގުޅުނު އެޕާޓީގެ ކުރީގެ ޗެއާޕާސަން މޫސަ ވިދާޅުވީ ކުރިއަށް އޮތް އެމްޑީޕީގެ ޕްރައިމަރީގައި ކޮންމެ ކެނޑިޑޭޓަކު މޮޅުވިނަމަވެސް އެމީހަކާއިއެކު ޕްރައިމަރީން ބަލިވާ މީހާޖެހޭނީ ކުރިއަށް ދާންކަމަށެވެ. ސިޔާސީ ގޮތުން އެމީހެއްގެ ސިޔާސީ މުސްތަގުބަލު ބިނާކުރާނީ އެމީހަކު ކަމަށާއި، ބަލިވާ މީހާ މޮޅުވާ މީހެއްގެ ފަހަތަށް ނާރައިފިނަމަ އޭގެ ނަތީޖާ ގޯސްވާނެ ކަމަށް މޫސަ ވަނީ ވިދާޅުވެފައެވެ.

ކުރިއަށްއޮތް ރިޔާސީ އިންތިޚާބަށް MDP ނުުކުންނާނީ ޕްރައިމަރީން މޮޅުވާ ކެންޑިޑޭޓަކާއެކީ. އެއީ ވަކިމީހެއްކަން ކަނޑައަޅާނީ ވޯޓުން. ޕްރައިމަރީގަ ބަލިވާމީހަކީMDPގެ ކޮންމެ މީހެއް ކަމަށްވިޔަސް މޮޅުވާ ކެންޑިޑޭޓާއެކީ ހުންނަންޖެހޭނީ! އެމީހެއްގެ ސިޔާސީ މުސްތަޤްބަލް ކަނޑައަޅާނީ އެމީހަކު.

– މޫސަ ވިދާޅުވިއެވެ.

އެމްޑީޕީގެ ޕްރައިމަރީ އަންނަ އަހަރުގެ ކުރީކޮޅު ބާއްވަން މަސައްކަތް ކުރަމުންދާއިރު، އަދި މިހާތަނަށް ޕްރައިމަރީ ބާއްވާނެ ތާރީހެއް އިއުލާން ކޮށްފައިނުވެއެވެ. ޕްރައިމަރީ ބާއްވާނެ ދުވަހެއް ކަނޑަނޭޅިގެން އުޅެނީ އެމްޑީޕީގެ ރައީސް މުހައްމަދު ނަޝިދަށާއި، އެމްޑީޕީގެ އެންމެ އިސްލީޑަރަށް ތާރީހަކާއިމެދު އެއްބަސް ނުވެވިގެންކަމަށް އެމްޑީޕީގެ ބައެއް މެމްބަރުން ވިދާޅުވެއެވެ.