މާލެއަތޮޅު މާފުށީ ޖަލުގައި ބަންދުކޮށްފައިތިބޭ ޤައިދީން ހިންގާ ސްކޭމް ކުރުމުގެ ޢަމަލުތަކާއި ޓެރަރިޒަމާ ގުޅުވައި ތުހުމަތުކުރެވޭތީ، ސަލާމަތީ ބާރުތަކުން ޚާއްސަ އޮޕަރޭޝަނެއް ފަށައިފިއެވެ.
ފުލުހުން ކުރި ޓްވީޓެއްގައި ވަނީ ކ.މާފުށީ ޖަލަށް މަނާތަކެތި ވައްދައިގެން ސްކޭމް ކުރުމާއި ޓެރެރިޒަމަށް މަގުފަހިވާ އަމަލުތައް ހިންގާކަމަށް ލިބިފައިވާ މައުލޫތުތަކާ ގުޅިގެން މާފުށި ޖަލު ބަލައި ފާސްކޮށްދިނުމަށް މޯލްޑިވްސް ކަރެކްޝަން ސަރވިސް އިން ދިވެހި ފުލުހުންގެ ހިދުމަތުގައި އެދިފައިވާކަމަށެވެ. އެހެންކަމުން ފުލުހުންނާއި މޯލްޑިވްސް ނެޝަނަލް ޑިފެންސް ފޯސް އަދި މޯލްޑިވްސް ކަރެކްޝަން ސަރވިސް ގުޅިގެން މާފުށި ޖަލު ބަލައި ފާސްކުރުމުގެ އޮޕަރޭޝަނެއް ރޭ ވަނީ ފަށައިފައިކަމަށް ފުލުހުން ވިދާޅުވެއެވެ.
ކ.މާފުށީ ޖަލަށް މަނާތަކެތި ވައްދައިގެން ސްކޭމް ކުރުމާއި ޓެރެރިޒަމަށް މަގުފަހިވާ އަމަލުތައް ހިންގާކަމަށް ލިބިފައިވާ މައުލޫތުތަކާ ގުޅިގެން މާފުށި ޖަލު ބަލައި ފާސްކޮށްދިނުމަށް މޯލްޑިވްސް ކަރެކްޝަން ސަރވިސް އިން ދިވެހި ފުލުހުންގެ ހިދުމަތުގައި އެދިލައްވާފައިވާތީވެ،
1/2— Maldives Police (@PoliceMv) December 6, 2022
ރާއްޖޭގެ ޖަލުތަކުގެ މާހައުލަކީ އެތަނުގައި ބަންދުގައި ތިބޭ ކުށްވެރިންނަށް އެކިކަހަލަ ކުށްކުށަށް އަރައިގަންނަން ފަސޭހަ އަދި އެކަމަށް ަމަގު ފަހިވެފައި އޮންނަ މާޙައުލެއްކަން ފާހަގަކުރައްވައި އެކަން ހުޓުވަންޖެހޭކަމުގައި ޖަލުތަކާ ބެހޭ ވަޒީރު، ހޯމް މިނިސްޓަރ ޢިމްރާން ޢަބްދުﷲ ވަނީ ހޯމަދުވަހު ވިދާޅުވެފައެވެ.
މިހެން ވިދާޅުވެ އިމްރާން ކަންބޮޑުވުން ފާޅުކުރެއްވީ ސްކޭމް ކޯލްތަކާއި މަކަރާއި ޙީލަތުގެ ތެރެއިން މީހުންގެ އަތުން ބޮޑެތި ޢަދަދުތަކުން ފައިސާ ފޭރިގަންނަ މައްސަލަތައް އިތުރުވާތީ ފުލުހުންނާއި ކަމާ ގުޅޭ މުއައްސަތާތައް ގުޅިގެން ފެށި މަސައްކަތު ބައްދަލުވުމުގައި ވާހަކަފުޅުދައްކަވަމުންނެވެ. އިމްރާން ވަނީ ރާއްޖޭގެ ޖަލުތަކުގައި ކުށްކުރުން އާންމުވެ، ޖަލަށް ލާމީހުންނަކީވެސް އެތަނަށް ވަންނައިރު ތިބޭ މިންވަރަށްވުރެ ބޮޑެތި ކުށްވެރިންނަށް ނުކުންނައިރު ބަދަލުވާކަން ފާހަގަކުރައްވާފައެވެ. މިމައްސަލަ ޙައްލުކުރުމަށް ސަރުކާރުން މަސައްކަތްކުރައްވާކަމަށާ، ޖަލުތަކަކީ ޤައިދީން ރިހެބިލިޓޭޓް ކުރާ ތަންތަނަކަށް ހެދުމަށް މަސައްކަތްކުރާކަން އިމްރާން ފާހަގަކުރެއްވިއެވެ.
މިހާތަނަށް ޖަލުތަކުގެ ޙާލަތު އޮތްގޮތް ހާމަކުރައްވަމުން މިނިސްޓަރު އިމްރާން ވިދާޅުވީ ދިގުމުއްދަތަކަށް ޖަލަށްލާފައި ތިބޭ މީހުންނަކީ ޖަލުގައި ވަރަށްގިނަ ވަގުތު އެއްވެސް ކަމެއްނެތި ތިބެންޖެހޭ މީހުންކަމަށްވުމުން ޖަލުން އެތައް އިތުރު ކުށްތައް ދަސްވެ އެކަންކަމަށް އަރައިގަތުމުގެ ފުރުސަތު ލިބޭކަމަށެވެ.
އެހެންކަމުން ޖަލުގައި ގައިދީން ހިންގާ ކުށްތައް ހުއްޓުވުމަށް ކަރެކްޝަންސްއިން އެކަނި ކިތަންމެ ވަރަކަށް މަސައްކަތްކުރިޔަސް ހައްލެއް ނުލިބޭނެކަމަށް އިމްރާން ވިދާޅުވިއެވެ. ކަރެކްޝަންސްއަށް ދިމާވާ މައްސަލަތަކާއި ގޮންޖެހުންތައް ޙައްލުކޮށް ފުލުހުންނާއި ކޮމިއުނިކޭޝަން އޮތޯރިޓިއާއި، މުއާސަލާތީ ޚިދުމަތްތައް ދޭ ކުންފުނިތަކާއި ޖަމްޢިއްޔާތައް ގުޅިގެން މިމައްސަލަ ޙައްލުކުރަން މަސައްކަތް ކުރަންޖެހޭކަމަށް އިމްރާން ވިދާޅުވިއެވެ.
