ޖަޕާންގައި ހުންނަ ދިވެހިރާއްޖޭގެ އެމްބަސީން އިންތިޒާމުކޮށްގެން ޖަޕާނުގައި ބޭއްވުނު އިވެންޓެއްގައި، ދިވެހިންގެ ތެރޭގައި މަޝްހޫރު ދެވަލައެއް ދާދިފަހުން ހުށަހަޅައިދިން ޖަޕާން ލަވަ ކިޔުންތެރިޔާ ރާއްޖޭގައި ޕާފޯމް ކުރާގޮތަށް ހަމަޖެހިއްޖެއެވެ. މައުލޫމާތު ލިބިފައިވާ، އޭނާގެ ހުށަހެޅުން ރާއްޖޭގައި ޕާފޯމް ކޮށްދިނުމަށް އޭނާއަށް ދައުވަތު ދީފައިވަނީ ރާއްޖޭގެ ރިސޯޓަކުންނެވެ.
ދިވެހިރާއްޖެއާއި ޖަޕާންއާއި ދެމެދު ސިޔާސީ ގުޅުން ގާއިމް ކުރެވުނުތާ 55 އަހަރު ފުރުން ފާހަގަ ކުރުމުގެ ގޮތުން، ޖަޕާނުގައި ހުންނަ ދިވެހިރާއްޖޭގެ އެމްބަސީން އިންތިޒާމް ކޮށްގެން ދާދިފަހުން ޖަޕާނުގައި ބޭއްވި ޚާއްސަ އިވެންޓެއްގައި މިދޮރިކޯ ވަނީ ދިވެހި ބަހުން ދެލަވައެއް ހުށަހަޅާ ދީފައެވެ. މި އިވެންޓަކީ ދެގައުމުގެ ދެމެދުގައި ސިޔާސީ ގުޅުން ގާއިމް ކުރެވުނުތާ 55 އަހަރު ފުރުނު އަހަރީ ދުވަހާއި ދިމާކޮށް ޖަޕާނުގައި ހުންނަ ދިވެހިރާއްޖޭގެ އެމްބަސީން އިންތިޒާމް ކޮށްގެން ބާއްވާފައިވާ އިވެންޓެކެވެ. މި އިވެންޓުގައި ފަތުރުވެރިކަން އިސްތިހާރުކުކޮށް، އަދި ދެގައުމުގެ ދެމެދުގައި ސިޔާސީ ގުޅުން ގާއިމް ކުރެވުނު 55ވަނަ އަހަރީ މުނާސަބާ ފާހަގަ ކުރުމުގެ ގޮތުން ދިވެހި އެމްބަސީން ސްޓޯލެއް ގާއިމް ކޮށްފައިވެއެވެ.
މި އިވެންޓުގައި މިދޮރިކޯ ޕާފޯމް ކޮށްފައިވަނީ އިވެންޓުގައި ކުރިޔަށް ސްޓޭޖް ޕާފޯމަންސް ސެގްމަންޓުގައެވެ. ފާއިތުވެދިޔަ ނޮވެމްބަރުމަހުގެ 12 އަދި 13 ގައި ޖަޕާނުގައި އޮތް މި އިވެންޓުގައި މިދޮރިކޯ ހުށަހަޅާ ދީފައިވަނީ ދިވެހިންގެ މެދުގައި ޒަމާނުއްސުރެ މަޝްހޫރު ދެވަލައެއް ކަމުގައިވާ "ލޯބި ލޯބިން ލޯބީގެ ދާނުން" މިލަވައާއި "އިލާހީ މިބިން ކުރައްވާށި އަމާން" މި ވަލައެވެ.
ޚަބަރު އޮންލައިނަށް މައުލޫމާތު ލިބިފައިވާ ގޮތުގައި، މިދޮރިކޯވަނީ ދެގައުމުގެ ދެމެދުގައި ސިޔާސީ ގުޅުން ގާއިމް ކުރިތާ 50 އަހަރު ފުރުމުގެ މުނާސަބާގައި ބޭއްވުނު އިވެންޓުގައިވެސް ދިވެހިލަވަ ހުށަހަޅާ ދީފައެވެ.
ދިވެހިރާއްޖެއާއި ޖަޕާނާ ދެމެދު ސިޔާސީ ގުޅުން ގާއިމް ކުރެވިފައިވަނީ 1967ވަނަ އަހަރު ނޮވެމްބަރުމަހުގެ 14ވަނަ ދުވަހުއެވެ. ޖަޕާނަކީ ރާއްޖެއާއި އެހާތަނަށް ސިޔާސީ ގުޅުން ގާއިމްކުރި 10ވަނަ ގައުމެވެ.
ދިވެހިރާއްޖެއާއި ޖަޕާނާ ދެމެދު ސިޔާސީ ގުޅުން ގާއިމުކުރެވުނު މުނާސަބާއާއި ދިމާކޮށް ބޭއްވުނު މި އިވެންޓަށް ޖަޕާނުގައި ދިރިއުޅޭ ގިނަ އަދަދެއްގެ ދިވެހިންވެސް ޒިޔާރަތް ކޮށްފައި ވެއެވެ. އަދި ގިނަބަޔަކު ވަނީ މިދޮރިކޯގެ މި ދެވަލަ ސޯޝަލް މީޑިއާގައި ޝެއާރވެސް ކޮށްފައެވެ. މި ދެލަވައަށް ގިނަބައެއްގެ ޝައުގުވެރިކަން ލިބިގެންދިޔަކަން ފާހަގަ ކޮށްލެވެއެވެ.
ޖަޕާނާއި ރާއްޖޭގެ ގުޅުމަށް 55 އަހަރު ފުރިފައިވާއިރު، ޖަޕާން ފާހަގަވެގެން ގޮސްފައިވަނީ ރާއްޖެއަށް އެކި ރޮގުރޮގުން ގިނަގުނަ އެހީތަކެއް ފޯރުކޮށް ދެމުންދާ ގައުމެއްގެ ގޮތުގައެވެ. މިގޮތުން އެންމެ ޚާއްސަ ގޮތެއްގައި ފާހަގަ ކޮށްލެވެނީ 2004 ވަނަ އަހަރުގެ ސުނާމީއަށްފަހު ޖަޕާނުން ރާއްޖެއަށް ފޯރުކޮށްދިން އެހީތަކާއ،ި ފާއިތުވެދިޔަ ކޯވިޑް ކާރިސާގައި ޖަޕާނުން ރާއްޖެއަށް ފޯރުކޮށްދީފައިވާ ދީލަތި އެހީތަކެވެ. އޭގެ އިތުރުންވެސް، ވެރިރަށް މާލޭގެ ވަށައިގެން ބިނާކޮށްފައިވާ ސީވޯލް ޕްރޮޖެކްޓާއި، ރާއްޖޭގައި ބިނާ ކޮށްފައިވާ ބޮޑެތި ބައެއް ސޫލްތަކަކީވެސް ޖަޕާނު ސަރުކާރުގެ އެހީގައި އިމާރާތްކޮށްފައިވާ ޚާއްސަ ބިނާތަކެވެ.
އޭގެ އިތުރުންވެސް ތައުލިމީ ދާއިރާއާއި، މަސްވެރިކަމުގެ ދާއިރާއާއި، ދަނޑުވެރިކަމުގެ ދާއިރާގެ އިތުރުން ބަޖެޓްރީ ސަޕޯޓުގެ ގޮތުގައިވެސް ޖަޕާނުންދަނީ ރާއްޖެއަށް އެހީތެރިކަން ފޯރުކޮށްދެމުންނެވެ. ޖަޕާނުގައި ދިވެހިރާއްޖޭގެ އެމްބަސީއެއް ގާއިމް ކުރެވިފައިވަނީ 2007 ވަނަ އަހަރުއެވެ. ރާއްޖޭގައި ޖަޕާނުގެ އެމްބަސީއެއް ހުޅުވާފައިވަނީ 2016ވަނަ އަހަރުގެ ޖެނުއަރީމަހުއެވެ.
ޖަޕާނާއި ރާއްޖޭގައި ހުންނަ ދެގައުމުގެ އެމްބަސީންވެސް ދަނީ، ދެގައުމުގެ ގުޅުމަށް 55 އަހަރުފުރުން ފާހަގަ ކުރުމުގެ ގޮތުން ބައެއް ހަރަކާތްތައް އިންތިޒާމް ކުރަމުންނެވެ.
