ގްރޭޓާ މާލޭ ކަނެކްޓްވިޓީ ބްރިޖު ނުވަތަ ތިމަލަމާލެ ބްރިޖަކީ މިސަރުކާރުގެ މުހިންމު މަޝްރުޢުތަކުގެ ތެރެއިން ފާހަގަކޮށްލެވޭ މަޝްރޫޢެކެވެ. އެއީ އެތައް ސަބަބަކާ ހެދިއެވެ. ސަރުކާރުން ރާއްޖޭގެ ތަރައްޤީއަށް ކުރަމުންދާ މަސައްކަތްތަކުގެ ރަމްޒެއްގެގޮތުގައި މިފަދަ ބޮޑެތި މަޝްރޫޢުތައް އަބަދުވެސް ޢާންމުން ބަލާނެއެވެ. އަދި އަމުދުން މިއީ ރާއްޖޭގައި މިހާތަނަށް ކުރިއަށްގެންދާ މިފަދަ އެންމެ ބިޔަ މަޝްރޫޢުވެސް މެއެވެ.

މިމަޝްރޫޢަށް ޢާންމުންގެ ސަމާލުކަން ހުއްޓޭ އަނެއް ސަބަބަކީ ސިޔާސީ ވާދަވެރިކަމެވެ. އިދިކޮޅު ލީޑަރު، ކުރީގެ ރައީސް ޔާމީންގެ ވެރިކަމުގެ ދުވަސްވަރު އެމަނިކުފާނުގެ 5 އަހަރުގެ ދައުރުގެތެރޭގައި ވަނީ ބްރިޖު ހަދައި ނިންމައި ބޭނުންކުރަން ފަށާފައެވެ. އެ ބްރިޖު އެއޮތީ ފެންނާށެވެ. އެހެންވީމާ ޢާނުން ސިޔާސީގޮތުން ދެސަރުކާރުގެ ޤާބިލުކަން މިނެކިރުމަށް ދެބްރިޖު އަޅާކިޔައެވެ.

މިސަރުކާރުގެ ދައުރު ނިމެން އަހަރަކަށްވުރެ ކުޑަވެގެންދާއިރު އަދި ބްރިޖުގެ ތަނބެއްހާހިސާބުވެސް ފެނުންމައްޗަކަށް ނާރައެވެ. މިމަޝްރޫޢުވެސް އަދި އެހެން މަޝްރޫޢުތައްވެސް ލަސްވާ ސަބަބަކަށް ސަރުކާރުން ދައްކަނީ ކޯވިޑް-19އެވެ. އަދި ދުނިޔެއަށް ކުރިމަތިވެފައިއޮތް އިޤްތިޞާދީ ދަތިކަމެވެ. އެހެންނަމަވެސް ދަންނަވަން މިއުޅެނީ ބްރިޖުގެ މަސައްކަތް ލަސްވާވާހަކައެއް ނޫނެވެ.

މިބުރިޖު ހަދަން އިންޑިއާގެ އެފްކޮންސް ކުންފުންޏާ ޙަވާލުކުރުމާއެކުވެސް އިދިކޮޅު ފަރާތްތަކުން ކުރި ތުހުމަތަކީ އެކުންފުންޏަކީ މިފަދަ މަޝްރޫޢެއް ހިންގޭފަދަ ޤާބިލްކަމެއް ހުރި ކުންފުންޏެއް ނޫންކަމަށެވެ. އަމުދުން ރާއްޖޭގެ މާ ކަނޑެއްގައި ތަނބު ޖަހައިގެން މިފަދަ ކަމެއް ކުރުމުގެ ކުޅަދާނަކަމެއް އެމީހުންގެ ކިބައިގައި ނެތްކަމުގެ ތުހުމަތެވެ. އެއީ މާބޮޑު ހެކިތަކެއްގެ މައްޗަށް ދައްކާ ވާހަކައެއް ނޫންނަމަވެސް ފެންނަ މަންޒަރުތަކުންނާއި ޚަބަރުތަކުން އެތުހުމަތު ޤަބޫލުކުރުމަށް އެތައް ބަޔަކަށް މަޖުބޫރެވެ. އަދި ޤަބޫކުރޭވެސް މެއެވެ.

އެންމެފަހުން އިވުނު ޚަބަރަކީ ބްރިޖު އެޅުމަށް ބޭނުންކުރާ ކެރޭނެއް މޫދަށްވެއްޓި މަސައްކަތަށް ހުރަސް އެޅުނުވާހަކައެވެ. ބްރިޖް އޮފީހުގެ އޮފިޝަލަކާ ޙަވާލާދީ މީޑިއާތަކުގައި ވަނީ ގި އެ ހާދިސާގައި ވެއްޓިފައި ވަނީ ވިލިމާލޭ ކޮޅުގައި ބްރިޖްގެ ތަނބު ޖަހަން ބޭނުންވާ ހޮޅިތައް މޫދަށް ޖެހުމުގެ މަސައްކަތުގައި ބޭނުންކުރާ ކެރޭނެއް ކަމަށެވެ. އެ ކެރޭން ވެއްޓުނީ، އޭނާ ވިދާޅުވި ގޮތުގައި، ކެރޭންގެ ބޫމަރަށް ދިމާވި މައްސަލައަކާ ގުޅިގެންނެވެ. އޭތި ވެއްޓުނީ މޫދަށް ޖަހާ ހޮޅިއެއް ލިފްޓްކުރުމުގެ ތެރޭގައިކަމަށްވެއެވެ. 

މީގެ ދުވަސްކޮޅެއްފަހުން ވަނީ ބްރިޖު އެޅުމަށް ބޭނުން ކުރާ ޕްލެޓް ފޯމެއް ވިލިމާލޭ ފަރަށް އަރައި ބޮޑެތި ގެއްލުންތަކެއް ވެފައެވެ. އެ ޕްލެޓްފޯމު ފަރުމަތިން ނެގުނީވެސް އެތައް ދުވަހެއްފަހުންނެވެ. އެތައް ގެއްލުމެއް ފަރަށްވެ އެތައް ބައެއްގެ ކަންބޮޑުވުން ފާޅުވެފެން ދިޔައެވެ. މިކަމާ ގުޅިގެން ތިމާވެށި ޙިމާޔަތްކުރުމަށް މަސައްކަތްކުރާ އިދާރާތަކާއި މީހުންގެ ކަންބޮޑުން އިންތިހާއަށް އެބައޮތެވެ. މިމައްސަލާގައި ބްރިޖުގެ މަސައްކަތްކުރާ އިންޑިއާގެ، އެފްކޮންސް ކުންފުނި ވަނީ 68 މިލިއަން ރުފިޔާއިން ޖޫރިމަނާ ވެސް ކޮށްފައެވެ.