އޭޝިއާ ޕެސިފިކް ބްރޯޑްކާސްޓިން ޔޫނިއަން (އޭބީޔޫ) އިން އިންތިޒާމްކޮށްގެން ބާއްވާ ޓީވީ އަދި ރޭޑިއޯ ފެސްޓިވަލްގައި މި އަހަރު ރާއްޖޭން، ބައިވެރިވަނީ މަޝްހޫރު ލަވަކިޔުންތެރިޔާ ޝައްމޫން މުޙައްމަދު (ޝައްމު) އެވެ.
ޝައްމު އަކީ ރިސޯޓް މިއުޒިކްގެ ދާއިރާގައި މަޝްހޫރު ލަވަކިޔުންތެރިޔެކެވެ. އަދި ޒުވާނުންގެ މެދުގައި މަޤުބޫލު އިކުއިޓިކް ވައިބްގެ، ލީޑް ލަވަކިޔުންތެރިއާގެ އިތުރުން ރިދަމް ގިޓަރިސްޓެއެވެ. ޝައްމު އޭބީޔޫ ޓީވީ ސޯންގް ފެސްޓިވަލްގައި ހުށައަޅައިދީފައިވަނީ އެ ބޭންޑްގެ އަމިއްލަ އުފެއްދުމެއްކަމަށްވާ "މަގޭ ރާއްޖެ" މި ލަވައެވެ. މިއީ 2019 ވަނަ އަހަރުގެ އައިޓީބީ ފެއަރގައި ރިލީސްކޮށްފައިވާ ލަވައެކެވެ.
ދެއަަރުގެ މެދުކެޑުމަކަށް ފަހު މިފަހަރުގެ ފެސްޓިވަލުގައި ރާއްޖެއިން ބައިވެރިވެފައި ވާއިރުގައި އެންމެ ފަހުން މި ކާނިލަވްގައި ރާއްޖެ ތަމްސީލް ކުރީ 2019 ވަނަ އަހަރުއެވެ. އެ އަހަރު ރާއްޖެ ތަމްސީލްކުރީ ލަވަކިޔުންތެރިިޔާ ޙަސަން އިރުފާން (ޒަކިއްޓެ)އެވެ.
މި ފެސްޓިވަލް އެކި އަހަރު އެކި ޤައުމުތަކުގައި ބާއްވަމުން އަންނައިރު، މިއަަހަރުގެ ފެސްޓިވަލް ބާއްވާފައިވަނީ އިންޑިއާގެ ނިއުދިއްލީގައެވެ. މިއަހަރުގެ ފެސްޓިވަލްގައި 9 ޤައުމަކުން، މަޝްހޫރު ހުށައެޅުންތެރިން ބައިވެރިވިއެވެ. ދިވެހިރާއްޖޭގެ އިތުރުން އިންޑިއާ، އިންޑޮނޭޝިއާ، ޖަޕާން، ކަޒަކިސްތާން، ރިޕަބްލިކް އޮފް ކޮރެއާ، ތުރްކަމަނިސްތާނު، ތުރްކީ އަދި ވިއެޓްނާމުން ބައިވެރިވެފައިވެއެވެ.
