މާފުއްޓަކީ ހަށިވިއްކުމުގެ މަރުކަޒެއްގެ ގޮތުގައި ރާއްޖޭގެ ބައެއް މީޑިއާތަކުގައި ސިފަ ކުރަމުންދާތީ އެރަށު ކައުންސިލުން އެކަން ކުއްވެރިކޮށް، ކަންބޮޑުވުން ފާޅު ކޮށްފިއެވެ.
"މިހާރު" ނޫހުން ކ. މާފުއްޓާއި ގުޅޭގޮތުން "މެދު ޞަފްހާ"ގައި ޝާއިއު ކޮށްފައިވާ ރިޕޯޓުތަކާއި ގުޅޭގޮތުން މާފުށީ ކައުންސިލުން އާންމު ކޮށްފައިވާ ނޫސް ބަޔާނެއްގައި ވިދާޅުވެފައިވަނީ އެއްވެސް ކަމަކީ އެންމެ ރުހޭ ކަމަކަށް ނުވާހަމައިގެމަތިން ރާއްޖޭގައި ލޯކަލް ޓުއަރިޒަމް ކުރިއެރުވުމަށް ނުރުހޭ މީހުންވެސް އުޅޭނެ ކަމަށް އެކައުންސިލުން ގަބޫލުކުރާ ކަމުގައެވެ.
އެހެންނަމަވެސް، މިހާތަނަށް މާފުށީގައި ހަށި ވިއްކުމުގެ އެއްވެސް ހާދިސާއެއް ހިގައިގެން މިހާތަނަށް އެކަން ރެކޯޑު ކުރެވިފައި ނުވާއިރު، ހަށި ވިއްކުމުގެ ވިޔަފާރީގެ މަރުކަޒެއްގެ ގޮތުގައި އެރަށް ސިފަކުރުމަކީ ޒިންމާދާރު ކަމެއް ނޫންކަމުގައެވެ.
މާފުށީ ކައުންސިލްއިން ނެރެފައިވާ ނޫސްބަޔާނުގައި ވިދާޅުވެފައިވަނި މާފުށީގައި ދިރިއުޅޭ މީހުންނާއި އެރަށް އަރާފައިބާ ދެ ޖިންސުގެ މީހުންނަކީ ހަށި ގަނެ ވިއްކުމުގައި ހަރަކާތްތެރިވާ މީހުންކަމުގައި ދެކޭނަމަ އެއީ އެގޮތަށް ހިތަށް ތަސައްވުރު ކުރެވޭ ބައެއްގެ ހުރި އުނިކަމެއް ކަމުގައެވެ.
ކައުންސިލުން ބުނެފައިވާ ގޮތުގައި މަސްތުވާތަކެއްޗާއި ގުޅުންހުރި މައްސަލަތައް ރާއްޖޭގެ އެކި ރަށްރަށުގައި ތަކުރާރުވަމުން ދަނީ އެ ރަށްރަށުގައި ލޯކަލް ޓުއަރިޒަމް ހިގަމުންދާތީއެއް ނޫނެވެ. އަދި އޭގެ އިތުރުން ޒިޔާރަތްކުރާ މީހުންގެ އަދަދު އިންތިހާއަށް ގިނަ ރަށްރަށުގައި ކުރިމަތިވާ އިޖުތިމާއީ މައްސަލަތަކަށް އިޖާބަ ދިނުމުގައި ކަމާބެހޭ ހުރިހާ އިދާރާތައް މަސައްކަތް ކުރަން ޖެހޭނީ އެމާއުލަކާ އެކަށޭނަ ގާބިލްކަން ލިބި ތިބެގެންކަމަށްވެސް ކައުންސިލްގެ ބަޔާނުގައި ފާހަގަ ކޮށްފައި ވެއެވެ.
މާފުށީ ކައުންސިލުން ވިދާޅުވެފައިވަނީ ކަމުގެ ވަށައިގެންހުރި ހަގީގަތްތަކަށް ބުރަވެ އޮންނަ ނުރަގަޅު، ރަގަޅު ކުރުމަށްވުރެ ބޮޑަށް ސިޔާސީ ނިޔަތުގައި ކަންކަން ނަގައިގެން ސަރޔކާރަށް ފާޑުކިޔުމުގެ ރޫޙުގައި ތެދުވުމުގެ އާދަ ދޫކޮށް، އީޖާބީ ހުށަހެޅުންތަކަށް އެކައުންސިލުން މަރުހަމާ ކިޔާނެ ކަމުގައެވެ.
ކ. މާފުއްޓަކީ ރާއްޖޭގައި ލޯކަލް ޓުއަރިޒަމް އެންމެ ބޮޑަށް ކުރިއަރާފައިވާ ރަށެވެ. އަދި އެރަށުގެ އާންމު ފަރުދުންނަށް އެންމެ ބޮޑު އާމްދަނިއެއް ލިބެމުންދާ މަސައްކަތަކީވެސް ލޯކަލް ޓުއަރިޒަމެވެ.
ކޮމެންޓު ފޮނުވާ