މާލޭ ސަރަހައްދުގެ ކަރަންޓުގެ ޚިދުމަތް ފޯރުކޮށް ދިނުމަށް ނަގާ އަގުތަކާއި ރާއްޖޭގެ އެހެން ރަށްރަށުގައި ކަރަންޓަށް ނަގާ އަގުތައް އެއް ހަމަ ކުރުމަށް 6 މަސްދުވަހުގެ މުހުލަތެއް ދިނުމަށް ރައްޔިތުންގެ މަޖިލިހުގެ ސްޓޭޓް އޯވްންޑް އެންޓަރ ޕްރައިސަސް (އެސްއޯއީ) ކޮމިޓީން ނިންމައިފިއެވެ.
އެސްއޯއީ ކޮމިޓީން މިގޮތަށް ނިންމާފައިވަނީ ރައްޔިތުންގެ މަޖިލިހިގެ ތޮއްޑޫ ދައިރާގެ މެމްބަރު ހަސަން ޝިޔާން ހުށަހެޅުއްވި ގަރާރު ދިރާސާ ކުރުމަށްފަހުއެވެ.
ޝިޔާންގެ ގަރާރުގައި ބުނެފައިވަނީ، ފެނަކައިން ޚިދުމަތްދޭ ރަށްރަށުގައި ކަރަންޓު ބިލުގައި މާލެއާއި ރަށްރަތަކާއި ތަފާތުކުރުން ހުރުމުގެ ޝަކުވާއަކީ ވިޔަފާރަވެރިންގެ ބޮޑު ޝަކުވާއެއް ކަމުގައެވެ. އަދި ފެނަކައިން ޚިދުމަތްދޭ ރަށްތަކުގައި ވިޔަފާރިތަކުން ބޭނުންކުރާ ކަރަންޓަށް ދައްކާންޖެހޭ އަގު ބޮޑުކަމުގެ ޝަކުވާވެސް ބޮޑުކަމުގައި އޭނާގެ ގަރާރުގައި ބުނެފައި ވެއެވެ.
މި ގަރާރާއި ގުޅޭގޮތުން ކޮމިޓީން ފާސް ކޮށްފައިވަނީ، ޓެރިފަށް ކުރާ އަސަރު ދެނެގަނެ ކަރަންޓުގެ ޚިދުމަތް ވިޔަފާރަވެރިންނަށް ހަމަހަމަ ގޮތެއްގައި ފޯރުކޮށް ދިނުމަށް ޓެރިފްގެ ރިވިއުއެއް ހެދުމަށެވެ. އަދި އެއަށްފަހު މާލެއާއި ރަށްރަށުގައި ހިންގާ ވިޔަފާރިތަކުގެ ޓެރިފް ރޭޓުތައް އެކި ގިންތިތަކުގައި އެންހަމަ ކުރުމުގެ މަސައްކަތް އަންނަ ޖެނުއަރީމަހުގެ ނިންމުމަށް ކޮމިޓީން ފާސް ކޮށްފައި ވެއެވެ.
އޭގެ އިތުރުން ކޮމިޓީގެ ނިންމުމުގައި ވާގޮތުން، އިއާދަކުރަނިވި ހަކަތަ ބޭނުން ކޮށްގެން ކަރަންޓު އުފައްދާ މިންވަރު އިތުރު ކޮށްގެންނާއި، ޑީސަލްގެ ޚަރަދު ކުޑަ ކޮށްގެންނާއި، ކުންފުނިޔަކުގެ ހިންގުމުގެ ޚަރަދުތައް ކުޑަކޮށްގެން ޓެރިފް ރޭޓްތައް ކުޑަކުރުމަށް ކުރެވެންހުރި އެންމެހާ މަސައްކަތް ކުރުމަށްވެސް އެންގުމަށް ފާސްކޮށްފައި ވެއެވެ. އޭގެ އިތުރުން ފެނާއި ނަރުދަމާގެ ޚިދުމަތް ފޯރުކޮށްދެމުންދާ އަގުތަކުގައި ހުރި ތަފާތުކުރުންތައްވެސް އެއްހަމަކޮށް އެ މަސައްކަތްވެސް އަންނަ އަހަރުގެ ޖޫންމަހުގެ ނިޔަލަށް ނިންމަން ޖެހޭނެކަމަށްވެސް ކޮމިޓީން ފާސްކޮށްފައި ވެއެވެ.
އެސްއޯއީ ކޮމިޓީގެ މި ނިންމުންތައް ކޮމިޓީ ރިޕޯޓުގައި ހިމަނާ ރިޕޯޓު މިހާރުވަނީ މަޖިލިހުގެ ތަޅުމަށްވެސް ފޮނުވާފައެވެ.
ކޮމިޓީން މި މައްސަލަ ދިރާސާ ކުރިއިރު، ފެނަކަ ކޯޕަރޭޝަންއާއި، ސެޓެލްކޯއާއި، އަދި އެމްޑަބްލިއުއެސްއީގެ އޮތުރުން އެންވަޔަރމަންޓް މިނިސްޓްރީގެ ބޭފުޅުންނާއި ބައްދަދު ކޮށްފައެވެ.
