ސްރީ ލަންކާގައި ހުންނަ ދިވެހި ސަފީރަކަށް ޕޮލިސް ބޯޑުގެ ކުރީގެ ރައީސް އަލީ ފާއިޒު އައްޔަންކުރުމަށް މަޖިލީހުގެ ރުހުން ހޯދުމަށް ނަން ހުށަހަޅައިފިއެވެ.
އޭނާ އެންމެ ފަހުން ހުންނެނި ޕޮލިސް ބޯޑުން ދާދި ފަހުން އިސްތިއުފާ ދެއްވާފައިވާއިރު، ފުލުހުންގެ މުއައްސަސާ ރިފޯމް ކުރުމަށް އުފައްދާފައިވާ ޕޮލިސް ބޯޑުގެ މަސައްކަތާއި މެދު ހިތްޕުޅާހަމަނުވާކަމަށް ދާދި ފަހުން ހޯމް މިނިސްޓަރ އިމްރާން ވަނީ މަޖިލީހުގެ ކޮމެޓީއެއްގައި ވިދާޅުވެފައެވެ. ފުލުހުންގެ ބޯޑަކީ ފުލުހުންގެ ސިޔާސަތުތައް ކަނޑައެޅުމުގައި ވަޒީރަށް ލަފާ ދޭ އެންމެ އިސް ފަރާތެވެ.
ޕޮލިސް ބޯޑް އެކުލެވިފައި އޮންނަނީ ހަތް މެންބަރުންގެ މައްޗަށެވެ. ބޯޑުގައި ހިމެނެނީ ރައީސުލްޖުމްހޫރިއްޔާ އައްޔަން ކުރައްވާ ދެ މެންބަރުންނާއި ފަންނީ ދާއިރާއަކުން ތައުލީމާއި ތަޖުރިބާ ލިބިފައިވާ ތިން މީހުންގެ އިތުރުން އާންމު ރައްޔިތުންގެ ތެރެއިން ދެ މީހުންނެވެ.
ލަންކާގައި ހުންނަވާ ދިވެހި ސަފީރުގެ މަގާމު ހުސްކޮށް އޮންނަތާ އަހަރަކަށްވުރެ ގިނަ ދުވަސް ވަނީ ވެފައެވެ. މި މަގާމަށް އަލީ ފާއިޒު އައްޔަންކުރުމަށް ނަން ހުށަހަޅާފައިވާއިރު އޭނާއަކީ މީގެ ކުރިންވެސް ސަރުކާރުގެ އެކި މަގާމުތައް ފުރުއްވާފައިވާ ބޭފުޅެކެވެ.
ފާއިޒަކީ މީގެ ކުރީގެ ރައީސް މުހައްމަދު ނަޝީދުގެ ވެރިކަމުގައި ރައީސް އޮފީހުގެ ޗީފް އޮފް ޕްރޮޓޮކޯލްގެ މަޤާމާއި، މިފްކޯގެ މެނޭޖިން ޑިރެކްޓަރުގެ މަޤާމުވެސް ފުރުއްވާފައިވާ ބޭފުޅެކެވެ.
ލަންކާގެ ސަފީރުކަމަށް އައްޔަން ކުރެއްވުމަށްޓަކައި ފާއިޒުގެ ނަން ދިރާސާ ކުރައްވާނީ ރައްޔިތުންގެ މަޖިލީހުގެ ޚާރިޖީ ގުޅުންތަކާއި ބެހޭ ކޮމެޓީއަށެވެ.
