"ރައީސް ވިދާޅުވި ހިސާބުތައް ދިމައެއް ނުވި"

ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވެރިކަމާއި ހަވާލުވެ ވަޑައިގެން ދައުލަތުގެ ހިސާބުތަކާއި ގުޅޭގޮތުން ދެއްކެވި ވާހަކަތަކާއި މިހާރު ދައްކަވާ ވާހަތަކުގައި އަދަދުތަކުގެ މައްސަލަތަކެއް ދިމާވެއްޖެއެވެ.

ހޯރަފުށީ އެއާޕޯޓް ހުޅުވުމަށް ބޭއްވި ރަސްމިއްޔާތުގައި ވާހަފުޅު ދައްކަވަމުން ރައީސް ޞާލިހު ވަނީ ދައުލަތުގެ ދަރަންޏާއި ގުޅޭގޮތުން ސަރުކާރަށް ނިސްބަތްވާ ބައެއް ބޭފުޅުންނާއި، އިދިކޮޅު ފަރާތްތަކުން ދައްކަވާ ވާހަތަކަށް ވަރަށް ޖޯޝުގައި ޖަވާބު ދެއްވާފައެވެ. އެމަނިކުފާނު ވިދާޅުވީ ދައުލަތް މިއަދު ދަރާފައިވަނީ މިސަރުކާރުން ނަގާފައިވާ ދަރަނި ތަކަކުން ނޫންކަމަށެވެ. ދައުލަތް ދަރައިގެން އުޅެނީ ރައީސް ޔާމީންގެ ވެރިކަމުގައި ނަގާފައިވާ ބޮޑެތި ލޯނުތައް އަނބުރައި ނުދައްކަވައި ވެރިކަން ނިންމާލާފައި ދިއުމުން އެބުރަ މިސަރުކާރަށް ކުރިމަތި ވުމުންކަމަށެވެ.

އެމަނިކުފާނު ވިދާޅުވީ ރައީސް ޔާމީން ވެރިކަމުން ފައިބައި ވަޑައިގެންނެވި އިރު ދައުލަތުގެ ދަރަނި ހުރީ 60 ބިލިޔަން ރުފިޔާގައިކަމަށެވެ. އަދި ރަސްމީ ރިޒާވުގައި ހުރީ އެންމެ 250 މިލިޔަން ޑޮލަރުކަމަށެވެ.

ރައީސް ހޯރަފުށީ އެއާޕޯޓް ހުޅުވި ރަސްމިއޔާތުގައި މިފަދަ ގޮތަށް ވިދާޅުވެފައިވާއިރު، ވެރިކަމާއި ހަވާލުވެ ވަޑައިގެންނެވިތާ މާގިނަ ދުވަހެއްނުވެ ބޭއްވި ރަސްމިއްޔާތެއްގައި ވާހަކަފުޅު ދައްކަވަމުން ވިދާޅުވެފައިވަނީ ރައީސް ޔާމީން ވެރިކަމުން ފައިބައި ވަޑައިގެންނެވިއިރު ދަރަނި ހުރީ 47.9 ބިލިޔަން ރުފިޔާގައި ކަމަށެވެ. އަދި ރިޒާވްގައި 757.8 މިލިޔަން ޑޮލަރު ހުރިކަމަށެވެ. ރައީސްގެ މިވާހަފުޅާއި ހޯރަފުށީގައި ދެއްކެވި ވާހަތަކާއި ދިމާނުވާތީ ގިނަބައެއްގެ ފާޑުކިޔުން ސަރުކާރަށް ވަނީ އަމާޒުވެފައެވެ.

ހޯރަފުށީ ޖަލްސާގައި ވާހަކަ ދައްކަވަމުން ރައީސް ޞާލިހު ވިދާޅުވީ ރައީސް ޔާމީނު ވެރިކަމާއި ހަވާލުވިއިރު ރާއްޖޭގެ ދަރަނި އޮތީ 26 ބިލިޔަން ރުފިޔާގައިކަމަށާއި އެމަނިކުފާނު ވެރިކަމުން ފައިބައިވަޑައިގެންނވިއިރު ދައުލަތުގެ ދަރަނި 60 ބިލިޔަން ރުފިޔާއަށް އަރާކަމަށެވެ.

އެމަނިކުފާނުގެ ސަރުކާރަށް މިހާތަނަށް އަދި ނެގުނީ 15 ވަރަކަށް ބިލިޔަން ރުފިޔާގެ ދަރަނިކަން ފާހަގަކުރައްވަމުން ރައީސް ޞާލިޙް ވިދާޅުވީ 2008 ވަނަ އަހަރު އެމްޑީޕީގެ ސަރުކާރު ވެރިކަމަށް އައިއިރު ރާއްޖޭގެ ދަރަނިއޮތީ 6.5 ބިލިޔަން ރުފިޔާގައިކަމަށާއި، 3 އަހަރަށްފަހު ވެރިކަމުން ވަކިވިއިރު އެއަދަދު 26 ބިލިޔަންރުފިޔާއަށް އަރާފައިވާކަމަށެވެ.

މިއަހަރުގެ ބަޖެޓްގައި ދަރަނި ދެއްކުމަށް ޖަހާފައިވާ 4 ބިލިޔަބން ރުފިޔާއަކީ ކުރީގެ ސަރުކާރުތަކުން ނެގި ދަރަނިތައް ދެއްކުމަށް ހިމަނާފައިވާ އަދަދެއް.

– ރައީސް ޞާލިހު ވިދާޅުވިއެވެ.

ރައީސް ޞާލިޙް ވިދާޅުވީ އެމަނިކުފާނު ސަރުކާރާއި ހަވާލުވެވަޑަިގެންނެވިއިރު ދައުލަތުގެ ރިޒާވްގައި ފައިސާއެއް ނެތްކަމަށާއި ހަމައެކަނި 250 މިލިޔަން ޑޮލަރު ރިޒާވްގައި ހުރެގެން ކުރެވޭނެ ކަމެއްނެތްކަމަށެވެ. އެމަނިކުފާނު ވިދާޅުވެފައިވަނީ އަންނަ އަހަރަށް ހުށަހަޅާފައިވާ ބަޖެޓުގައި ދަރަނި ބޮޑުވިޔަސް މިއީ ހާލަތަށް ބަލައި ހުށަހެޅޭނެ އެންމެ ފުރިހަމަ ބަޖެޓު ކަމަށެވެ.