އޮލިމްޕަސް މަރާމާތުކޮށް ނިންމައި އަންނަ މަހުގެ 16 ވަނަ ދުވަހު ހުޅުވާނެކަމަށް މިނިސްޓަރ އޮފް އާރޓްސް ކަލްޗަރ އެންޑް ހެރިޓޭޖް ޔުމްނާ މަޢުމޫން ވިދާޅުވެއްޖެއެވެ.
އެންސީއޭ އިން މީގެ ކުރިންވެސް ބުނެފައިވަނީ އެތަނުގައި މަރާމާތުގެ ބޮޑެތި މަސައްކަތް ތަކެއް ކުރަމުން އަންނަ ކަމަށާއި، މި ސަބަބާހެދި އޮލިމްޕަސް ހުޅުވުމަށް އަދި ވަގުތު ބޭނުން ވާކަމަށެވެ.
ނަމަވެސް މިކަމަށް ފާޑުކިޔައި ގިނަ އަދަދެއްގެ ތަރިން އަންނަނީ ސޯޝަލް މީޑިއާގައި އަޑު އުފުލަމުންނެވެ. މިހާދުވަސް ވީއިރުވެސް އޮލިޕްހުގެ އެއްވެސް މަސައްކަތެއް ނުކުރެވި، ހުޅުވާ ތާރީހް ލަސްވަމުން އަންނަތީ ގިނަ ބަޔަކު ވަނީ ނުރުހުން ފާޅުކޮށްފައިއެވެ.
އޮލިމްޕަސް ތަރައްޤީކުރުމުގެ މަސައްކަތްތައް ކުރިއަށްގެންދަނީ ދެ ފިޔަވައްސަކަށް ބަހާލައިގެންނެވެ. އެގޮތުން ފުރަތަމަ ފިޔަވަހީގައި ކުރިއަށް ގެންގޮސްފައިވަނީ އިމާރާތް މަރާމާތުކޮށް، ގެންނަންޖެހޭ ބޮޑެތި ބަދަލުތައް ގެނައުމުގެ މަސައްކަތެވެ. މި މަސައްކަތްތައް މިހާރުވަނީ ނިމިފައެވެ. އެގޮތުން ޓިކެޓް ކައުންޓަރަށް ބަދަލުގެނައުމާއި، ކޮރިޑޯއާއި އަދި އިމާރާތުގެ ބޭރަށްވެސް ބަދަލު ގެނެސްފައިވެއެވެ.
މީގެ ކުރިން މީޑިއާއާއި ވާހަކަ ދައްކަމުން އެންސީއޭގެ އޮފިޝަލަކު ވަނީ މިއަހަރު ސެޕްޓެމްބަރު މަހުގައި އޮލިމްޕަސް ހުޅުވޭނެކަމަށް ބުނެފައިއެވެ. ނަމަވެސް ފަހުން ވަނީ މަރާމާތު ނުނިމޭތީ ނުހުޅުވޭނެކަމަށް ބުނެފައިއެވެ.
އޮލިމްޕަހަކީ ރާއްޖޭގައި މިވަގުތު ހުރި އެންމެ ޒަމާންވީ އަދި އެންމެ ބޮޑު ސިނަމާއެވެ. 1959 ހުޅުވި އޮލިމްޕަހުގައި އެންމެ ފުރަތަމަ ދައްކަން ފެށީ ހިންދީ ފިލްމާއި އިނގިރޭސި ފިލްމްތަކެވެ. ދިވެހި ފިލްމް ދައްކަން ފެށީ 1980ވަނަ އަހަރުން ފެށިގެންނެވެ.
އޮލިމްޕަސް މަރާމާތުކޮށް ޒަމާނީ ކުރުމަށް ކުރިއަށްގެންދާ މަސައްކަތާއި ގުޅޭގޮތުން މަކުނުދޫ ދާއިރާގެ މެމްބަރ މުޙައްމަދު ރާޢީ ކުރެއްވި ސުވާލައް ޖަވާބު ދެއްވަމުން މިނިސްޓަރ ޔުމްނާ ވިދާޅުވީ، އޮލިމްޕަސް ހުޅުވުން ލަސްވެފައިވަނީ އެތަން ތަރައްޤީކުރުމަށްޓަކައި ބޭނުންވާ ސާމާނު ހޯދުމަށް ދިމާވި ދަތިތަކުގެ ސަބަބުންކަމަށެވެ. ނަމަވެސް މިހާރު އަންނަ މަހުގެ 16 ވަނަ ދުވަހު ހުޅުވުމަށް މަސައްކަތް ކުރަމުން އަންނަކަމަށާއި، އޮލިމްޕަސް ނިމުމާއެކު ދިވެހި ފަންނާނުގެ ހުނަރުދައްކާލުމުގެ ޕްލެޓްފޯމެއް ޤާއިމްވެގެންދާނެކަމަށެވެ.
އޮލިމްޕަސް ނިމޭއިރުގައި އެތަނުގައި ފިލްމް ސްކްރީން ކުރުމަށް ޑިޖިޓަލް ސިނަމާ ޕްރޮޖެކްޓަރާއި، މިއުޒިކާއި ޑާންސް ޕްރެކްޓިސްކުރުމަށް ޚާއްސަ ކޮޓަރިތައް ހެދިގެންދާނެކަމަށް މިނިސްޓަރ ވިދާޅުވެއެވެ.
ކޯވިޑް 19ގެ ސަބަބުން ސިނަމާ ބަންދު ކުރި ގޮތަށް އަދި މިހާތަނަށް ނުހުޅުވައެވެ. ސިނަމާ ބަންދު ކުރުމުގެ ކުރިން އެންމެ ފަހުން އެޅުވި ފިލްމް އަކީ އަލީ ސީޒަންގެ "އަނދިރިކަން" އެވެ.
