ކޮވިޑްގެ ބަލިމަޑުކަމާ ގުޅިގެން ބަންދުކުރި އޮލިމްޕަސް މަރާމާތުކުރުމަށްފަހު އަންނަ މަހުގެ 16ވަނަ ދުވަހު ހުޅުވާނެކަމަށް މިނިސްޓަރ އޮފް އާރޓްސް ކަލްޗަރ އެންޑް ހެރިޓޭޖް ޔުމްނާ މަޢުމޫން ވިދާޅުވެއްޖެއެވެ.
މިނިސްޓަރ ޔުމްނާ މިގޮތަށް ވިދާޅުވީ މިއަދުގެ ރައްޔިތުންހެ މަޖިލީހުގެ ޖަލްސާގައި މެމްބަރުން ކުރެއްވި ސުވާލުތަކަށް ޖަވާބުދެއްވަމުންނެވެ. މިނިސްޓަރ ވިދާޅުވީ އޮލިމްޕަސް އަލުން ހުޅުވާނީ ޒަމާނީ ފެންވަރުގެ އެތައް ވަސީލަތްތަކާއެކުކަމަށެވެ. އޮލިމްޕަސް މަރާމާތުކުރުމަށް ދެ ފިޔަވައްސަކަށް ބަހާލައިގެން ކުރިއަށްގެންދާ މަސައްކަތުގެ ފުރަތަމަ ފިޔަވަހީގައި އެތަނުގެ އިމާރާތް މަރާމާތުކޮށް ޢިމާރާތާށް ގެންނަންޖެހޭ ބަދަލުތަކުގެ މަސައްކަތް ކުރިއަށް ގެނގޮސްފައިވާނެކަމަށް މިނިސްޓަރ ވިދާޅުވިއެވެ.
އޮލިމްޕަސް މަރާމާތުކޮށް އަލުން ހުޅުވުން ލަސްވެގެން ގިނަ ބައެއްގެ ފާޑުކިއުންތައް ވަނީ ސަރުކާރަށް އަމާޒުވެފައެވެ. އެގޮތުން ކޮވިޑަށް ބަންދުކުރި ހުރިހާ ކަމެއް އަލުން ހުޅުވައި ޤައުމު ޢާއްމު ޙާލަތަކަށް ރުޖޫޢަވީކަން ސަރުކާރުން ޢިއުލާންކުރިތާވެސް އެތައް މަސްތަކެއް ފާއިތުވެދިޔައިރު، އޮލިމްޕަސް ނުހުޅުވަނީ ކީއްވެގެންކަމެއް ނޭނގޭކަމަށް މުނިފޫހިފިލުވުމުގެ ދާއިރާގެ ބައެއް ފަރާތްތަކުން ވަނީ ސުވާލު އުފައްދާފައެވެ.
މިނިސްޓަރ ޔުމްނާ ،މިއަދު ވިދާޅުވީ، އޮލިމްޕަސް ހުޅުވުން ލަސްވެފައިވަނީ އެތަން ތަރައްޤީކުރުމަށްޓަކައި ބޭނުންވާ ސާމާނު ހޯދުމަށް ދިމާވި ދަތިތަކާހެދިކަމަށެވެ. އެހެންނަމަވެސް މިހާރު އެކަން ހައްލުވެފައިވާކަމަށާ، އަންނަ މަހުގެ 16 ވަނަ ދުވަހު އިލިމްޕަސް ހުޅުވާނެކަމަށް މިނިސްޓަރު ވިދާޅުވިއެވެ. އަލުން ހުޅުވޭއިރު، އޮލިމްޕަހުގައި ފިލްމް ސްކްރީން ކުރުމަށް ޑިޖިޓަލް ސިނަމާ ޕްރޮޖެކްޓަރާއި މިއުޒިކާއި ޑާންސް ޕްރެކްޓިސްކުރާނެ ކޮޓަރިތައްވެސް ހުންނާނެކަމަށް މިނިސްޓަރ ޔުމްނާ ވިދާޅުވިއެވެ.
