ރައްޔިތުންގެ މަޖިލީހުގެ އިއްޔެގެ ޖަލްސާ ނިންމަވާލެއްވީ ޤަވާއިދާއި ޚިލާފަށްކަމަށް ސަރުކާރު ފެކްޝަނުގެ މެންބަރުން ކުރައްވާ ތުހުމަތަށް މަޖިލީހުގެ ރައީސް މުޙައްމަދު ނަޝީދު ރައްދު ދެއްވައިފިއެވެ.
މިއަދުގެ ޖަލްސާގައި ރައީސް ނަޝީދު މިހެން ވިދާޅުވީ އިއްޔެ ތެކްސް ބޮޑުކުރުމުގެ ބިލަށް ވޯޓަށް ނާހައި ނިންމާލީ ޤަވާއިދާއި ޚިލާފަށްކަމަށްބުނެ، ސަރުކާރު ފެކްޝަންގެ މެންބަރުން ކަނބޮޑުވުން ފާޅުކޮށް، މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ) ވަނީ ރިޔާސަތުގެ ގޮނޑިކޮޅުގައި އިށީންނަވާފައެވެ.

އިއްޔެގ ޖަލްސާގައި ޓެކްސް ބިލަށް ވޯޓަށް ނާހައި ނިންމާލީ ބޭނުންވާރަށް ކޯރަމް ހަމަނުވާކަމަށް ބުނެއެވެ. އެވަގުތު ރިޔސާތުގައި އިންނެވީ ވިލުފުށީ ދާއިރާގެ މެންބަރު ޙަސަން އަފީފެވެ. ޖަލްސާ ނިންމާލުމާއެކު ސަރުކާރު ފެކްޝަންގެ މެންބަރުން ވަނީ ކަންބޮޑުވުންފާޅުކޮށް އަޑުގަދަ ކުރައްވާފައެވެ. ނަމަވެސް އެިއްޔެ ކޯރަމް އެގަޑީގައި އޮތްކަމަށް އެ މެންބަރުން ވިދާޅުވިއެވެ.

އަފީފު ދިފާޢުކުރައްވާ މިއަދުގެ ޖަލްސާގައި ނަޝީދު ވިދާޅުވީ، ޖަލްސާ ނިންމާލެއްވީ ރަނގަޅަށްކަމަށެވެ. މަޖިލީހުގެ ޖަލްސާ ނިންމާލައްވަނީ ހަމްދު ކިޔުމަށްފަހުކަމަށާއި، އެގޮތަށް ނިންމާލެއްވީ ބިލުގެ ތިންވަނަ ކިޔުން އިއްވާފައި ނުވާތީަކަމަށްވެސް ނަޝީދު ވިދާޅުވިއެވެ.

ނަޝީދުގެ އެ ވާހަކަފުޅާއި ގުޅިގެން ހިތްހަމަނުޖެހުން ފާޅުކޮށް އައްޑޫ މަރަދޫ ދާއިރާގެ މެންބަރު އިބްރާހީމް ޝަރީފް ވަނީ އަފީފް ހެއްދެވީ ގޯހެއްކަމަށާއި،އ ެއީ ކޯރަމް އޮއްވައި ކޯރަމް ގެއްލުނުކަމަށް ނިންމެވުންކަމަށެވެ.

ނަޝިދު ވިދާލުވީ، މަޖިލީހުގެ ރިޔާސަތަކީ މެންބަރުން ވޯޓު ދެއްވައިގެން ކަނޑައަޅާކަމެއްކަމަށާއި، ޝަރީފް ރިޔާސަތުގައި އިންނެވުން އެއީ ކުރެއްވި ގޯހެއްކަމަށެވެ.

ޓެކްސް ބޮޑުކުރާ ބިލު މިހާރު އޮތީ ވޯޓު މަރުހަލާގައެވެ.