ޗައިނަގެ ރައީސް ޝީ ޖިންގ ޕިންއާއި އެމެރިކާގެ ރައީސް ޖޯ ބައިޑްން ހޯމަ ދުވަހު ބައްދަލު ކުރައްވައިފިއެވެ. މި ބައްދަލު ކުރެއްވުމަކީ ގިނަ ދުވަސްތަކެއްގެ އިންތިޒާރީއަށްފަހު، އެހެންނަމަވެސް ދެގައުމުގެ ގުޅުން ފާއިތުވެދިޔަ އެއްވެސް ޒަމާނެއްގައި ދަށަށް ނުދާ މިންވަރަށް ދަަށަށް ގޮސްފައިވަނިކޮށް ބޭއްވުނު ބައްދަލުވުމުގެ.
ޖޯ ބައިޑްން އެމެރިކާގެ ރައީސްކަމާއި ހަވާލުވެ ވަޑައިގަތުމަށްފަހު ދެ ލީޑަރުން އެއްތަނަކުން ބައްދަލުވާ ފުރަތަމަ ބައްދަލުވުން ކުރިޔަށް ދިޔައީ އިންޑޮނޭޝިއާގެ ބާލީ ރިސޯޓުގައި، އަންގާރަދުވަހު ފެށުމަށް ހަމަޖެހިފައިވާ ޖީ 20 ސަމިޓްގެ ކުރިންނެވެ.
ޖީ20 ސަމިޓްގައި މިހާރު ކުރިޔަށްދާ ރަޝިއާ ޔޫކުރެއިން ހަގުރާމައިގެ އުދާސްތައް ވަރަށް ބޮޑުވާނެކަމަށް ވަނީ ބެލެވިފައެވެ.
ބައިޑްންއާއި ޝީއާއި ދެބޭފުޅުން، އެމެރިކާ އަދި ޗައިނާގެ ދިދަތަކުގެ ކުރިމަތީގައި ތިބެ، އަތާ އަތް ޖޯޑުކޮށް ސަލާމް ކުރައްވާފައިވަނީ ބާލީގެ ނުސާ ދުއާގައި ހުންނަ ލަގްޒަރީ ހޮޓެލެއް ކަމުގައިވާ މުލިއާގައެވެ.
މި ބައްދަލު ކުރެއްވުމުގައި ދެބޭފުޅުން ޓައިވާން، ޔޫކުރެއިން އަދި އުތުރު ކޮރެއާގެ ނިއުކުލިއަރ މަޝްރޫއާއި ގުޅޭގޮތުން މަޝްވަރާ ކުރައްވާނެކަމަށް ވަނީ ބެލެވިފައެވެ. މި މައްސަލަތަކަކީ މާދަމާ ފެށުމަށް ހަމަޖެހިފައިވާ ޖީ20 ސަމިޓްގައިވެސް މަޝްވަރާކުރުމަށް ހަމަޖެހިފައިވާ މައްސަލަތަކެވެ.
މިފަހަރުގެ ޖީ20 ސަމިޓް ކުރިޔަށް ދާނީ ރަޝިއާގެ ރައީސް ލާޑިމިރ ޕުޓިންއާއި ނުލައެވެ. އޭގެ ބަދަލުގައި މި ސަމިޓުގައި މިފަހަރު ރަޝިއާ ތަމްސީލު ކުރުމަށް ހަމަޖެހިފައިވަނީ އެގައުމުގެ ޚާރިޖީ ވަޒީރު ސާގޭ ލާވްރޯވްއެވެ.
މި ސަމިޓަކީ ރަޝިއާއިން ޔޫކުރެއިންއަށް އުދުވާނީ ހަމަލާ ދޭން ފެށިފަހުން ބޭއްވޭ ފުރަތަ ސަމިޓެވެ. ރަޝިއާއިން ބުނެފައިވަނީ ޕުޓިންއަށް މިސަމިޓަށް ވަޑައި ނުގެންނެވުނީ މާ ބުރަކޮށް އުޅުއްވަން ޖެހިވަޑައިގަތުމުން ކަމަށެވެ.
ރަޝިއާގެ ޚާރިޖީ ވަޒީރު ލާވްރޯވް ބާލީއަށް ވަޑަގަތުމަށްފަހު ހޮސްޕިޓަލުގައި އެޑްމިޓް ކުރިކަމުގެ ވާހަކަ ރަޝިއާގެ ފޮރިންގ މިނިސްޓްރީންވަނީ ދޮގު ކޮށްފައެވެ.
މިހަފްތާގެ އާދީއްތަ ދުވަހު ބައިޑްން ކެމްބޯޑިއާގައި އާސިއާންގެ ލީޑަރުންނާއި ބައްދަލުކުރައްވާ ވިދާޅުވެފައިވަނީ، ބޮޑު ހަމަނުޖެހުމެއް އުފެދިގެންދިޔަ ނުދިނުމަށްޓަކާ އެމެރިކާއާއި ޗައިގާއަށް ވާކަ ދެއްކެވޭނެ މަގުތައް ހުންނާނީ ހުޅުވިފައި ކަމުގައެވެ.
