ވޯލްޑް ކަޕަށް ލީގު މެދުކަނޑާލުމުގެ ކުރިން ކުޅުނު އެންމެ ފަހު މެޗުގައި ބޮޑު މޮޅެއް ހޯދާ ޕީއެސްޖީން ފްރާންސް ލީގު ތާވަލުގެ އެއްވަނައިގައި ރަނގަޅު ލީޑެއް ނަގައިފިއެވެ.
ޕީއެސްޖީގެ ދަނޑުގައި އާދީއްތަ ދުވަހުގެރޭ އޯޒޭއާއި ބައްދަލުކުރި މެޗު ޕީއެސްޖީން ކާމިޔާބުކުރީ 5-0ންނެވެ. ރޭގެ މެޗުގައި ޕީޢެސްޖީ އަށް ލަނޑުތައް ޖަހައިދިނީ ކީލިއަން އެމްބާޕޭ، ކާލޮސް ސޮލެއާ، އަޝްރަފު ހަކީީމީ، ރެނާޓޯ ސަންޗޭޒް އަދި ހޫގޯ އެކިޓީކޭއެވެ. މެޗުގެ 11 ވަނަ މިނެޓުގައި ޕީއެސްޖީއަށް ލީޑު ނަގައިދިނީ ޓީމުގެ ތަރި ކީލިއަން އެމްބާޕޭއެވެ. ޕީއެސްޖީގެ އަނެއް ހަތަރު ލަނޑުވެސް ފެނުނީ ދެވަނަ ހާފުގައެވެ.
ދެވަނަ ހާފުގެ ހަވަނަ މިނެޓުގައި ޕީއެސްޖީއަށް ލީޑު ފުޅާކޮށްދިނީ ކާލޯސް ސޯލާއެވެ. އޭގެ ހަމިނެޓު ފަހުން އަޝްރަފް ހަކީމީ އިތުރު ލަނޑެއް ޖެހިއިރު 81 ވަނަ މިނެޓުގައި ރެނާޓޯ ސަންޗޭޒްވެސް ލަނޑެއް ޖެހިއެވެ. ޕީއެސްޖީގެ ފަހު ލަނޑު 84 ވަނަ މިނެޓުގައި ޖެހީ ހޫގޯ އެކިޓިކޭއެވެ.
އާދިއްތަ ދުވަހުގެ ރޭ ފަށާ ވޯލްޑް ކަޕް ގައި ނޭމާ، މެސީ، އެމްބާއްޕޭގެ އިތުރުން، ޕީއެސްޖީގެ ގިނަ ކުޅުންތެރިންތަކެއް ހިމެނެއެވެ. އޭގެ ތެރޭގައި ސްޕެއިންގެ ޕަބްލޯ ސެރާބިއާ އާއި ތަފާތު ފޯމެއްގައި ހުރި ސޮލާ ގެ އިތުރުން، ޓީމުގެ ކެޕްޓަން ބްރެޒިލްގެ މާކީނިއޯސް އާއި ފްރާންސްގެ ޕްރެސްނެލް ކިމްޕެމްބޭ އަދި މޮރޮކޯގެ ހަކީމީ ހިމެނެއެވެ.
ޕީއެސްޖީ މި ސީޒަންގައި މެޗަކުން ބަލި ނުވާ އިރު ލީގު އެއް ވަނައިގައި އޮތީ ކުޅުނު 15 މެޗުން 41 ޕޮއިންޓް ހޯދައިގެންނެވެ. ދެ ވަނައިގައި އޮތް ލެންސް އަށް ލިބިފައި ވަނީ 36 ޕޮއިންޓެވެ. އެ ޓީމު ވަނީ ފްރާންސްގެ ސީޒަން ފަށަން ކުޅުނު ސުޕަ ކަޕް ކާމިޔާބު ކޮށް، ޗެމްޕިއަންސް ލީގުގެ ނޮކައުޓް ބުރުން ވެސް ޖާގަ ހޯދައިފައެވެ.
