ލ.އަތޮޅުގެ ރައްޔިތުންނަކީ ރާއްޖޭގެ އެހެން އަތޮޅުތަކުގެ ރައްޔިތުންނާއި ޚިލާފަށް ވަރަށް ކިޔަމަންތެރި ރައްޔިތުން ދިރިއުޅޭ އަތޮޅަކަށް ވެފައިވާކަމަށާއި، ނަމަވެސް ކަންކަން ނުވާނަމަ އިހުތިޖާޖުކޮށްގެންވެސް ރައްޔިތުންގެ ހައްގުތައް ކަށަވަރު ކުރަންޖެހޭކަމަށް ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު މޫސާ ސިރާޖު ވިދާޅުވެއްޖެއެވެ.
ސިރާޖު މިހެން ވިދާޅުވީ ހައްދުން މަތީގައި ހިންގަމުންފާ ހޮރައިޒަން ފިޝަރީސްއިން މަސްވެރިންނަށް ދޭންޖެހޭ 21 މިލިއަން ރުފިޔާ ދިނުމަށް ކަމާބެހޭ އިދާރާތަކުން މަސައްކަތްކޮށް އެ މައްސަލަ ހައްލުކޮށް ދިނުމަށް ގޮވާލައި ރައްޔިތުންގެ މަޖިލީހަށް ކުއްލި މައްސަލައިގެ ބަހުސްގައި ވާހަކަ ދައްކަވަމުންނެވެ.
ސިރާޖު ވިދާޅުވީ މަސްވެރިންނަކީ ބުރަ މަސައްކަތުން ލިބޭ އާމްދަނީ އުޅޭބަޔަކަށްވާއިރު އެމީހުން ބާނާ މަހަށް ހަމަ އަގު ހޯދައިދިނުމަކީ ސަރުކާރުން ކުރަންޖެހޭ ކަމެއްކަމަށެވެ. ދެކުނާއި އުތުގައި މަސްވެރިންނަށް ތެޔޮ ގަންނަން ލިބޭ އަގާއި ހައްދުންމަތީގައި މަސްވެރިން ތެޔޮ ގަންނަން ލިބޭ އަގުގައިވެސް ތަފާތު ހުރުމަކީ އޮތް ބޮޑު ކަންބޮޑުވުމެއްކަމަށް ސިރާޖު ވިދާޅުވިއެވެ.
އޭނާ ވިދާޅުވީ މަސްވެރިންގެ ހައްގުތައް ހޯދުމަަށް މިހާތަނަށް ލ.އަތޮޅުގެ ރައްޔިތުން ތިބީ ވަރަށް މަޑުންކަމަށެވެ. ނަމަވެސް ކުރިއަށް އޮތް ތަނުގައި ހައްގުތައް ހޯދުމަށް އިހުތިޖާޖުކޮށްގެންވެސް ރައްޔިތުންގެ ހައްގުތައް ކަށަވަރު ކުރުމަކީ ކުރަންޖެހޭ ކަމެއްކަމަށް ސިރާޖު ވިދާޅުވިއެވެ.
އިހުތިޖާޖު ކުރުމަކީ ކަންކަން ނުވާކަމުގައިވާނަމަ، ހަމަ އެހެން އަތޮޅުތަކޭވެސް އެއްގޮތަށް އިހުތިޖާޖު ކުރަންވީ. އަޅުގަނޑަށް ފެންނަނީ ލ.އަތޮޅުގެ ރައްޔިތުން އަބަދުވެސް މާބޮޑަށް ކިޔަމްތެރިކަމާއިއެކީ އަބަދުވެސް މަޑުންތިބޭ މަންޒަރު. ކަންކަން ނުވާކަމުގައިވާނަމަ އެރީތިމަގު އިހުތިޔާރުކޮށް، އިހުތިޖާޖަށް ނިކުމެގެން ކަންކަން ހާސިލްކުރުމަކީ އަޅުގަނޑުވެސް ވަރަށް ތާއީދުކުރާކަމެއް.
– މެމްބަރު ސިރާޖު ވިދާޅުވިއެވެ.
ބާނާ މަސް ނުކިރުމުގެ މައްސަލަ އާއި ކިރާ މަހަށް ފައިސާ ދޫނުކުރުމުގެ މައްސަލަތައް ފުނިޖެހި މަސްވެރިން ތިބީ ގޮތް ހުސްވެފައި ކަމަށާއި މިވަގުތުވެސް މާންދޫ ފަޅުގައި 26 ދޯންޏަކުން ފައިސާ ހޯދުމަށް އިޖުތިޖާޖު ކުރަމުންދާ ކަމަށް ކުއްލި މައްސަލައިގައި ބުނެފައިވެއެވެ.
ކުންފުނިން މަސްވެރިންނަށް ދޭންޖެހޭ ފައިސާގެ އަދަދު 21 މިލިއަނަށްވުރެ އިތުރުވާނެ ކަމަށް އަންދާޒާ ކުރެވޭއިރު މިއީ މަސްވެރިކަން އެ ސަރަހައްދުގައި ހުއްޓިދާނެ ފަދަ ކަމެއްކަން ވަނީ ފާހަގަކޮށްފައެވެ. މިއީ މަސްވެރިންގެ ހައްގުތަކަށް އަރައިގަނެ އެމީހުންނަށް ލިބެންޖެހޭ އާމްދަނީ ހިފެހެއްޓުން ކަމުގައި ދެކޭ ކަމަށެވެ.
