މިދިޔަ ބުދަ ދުވަހުރޭ މާލޭގައި ހިނގައިދިޔަ ނުރައްކާތެރި، ހިތާމަވެރި އަލިފާނުގެ ހާދިސާގައި ނިޔާވި މީހުނގެ ތެރެއިން ގައުމަށް ގެންދަން ބޭނުންވާ ހަށިގަނޑުތައް ގެންދިއުމުގެ މަސައްކަތް ފަށައިފިއެވެ.
މިހާދިސާގައި ނިޔާވި އެންމެނަކީވެސް އަވަށްޓެރި އިންޑިޔާ އަދި ބަންގްލަދޭޝްއަށް ނިސްބަތްވާ ރައްޔިތުންނެވެ. މިހާތަނަށް 9 މީހެއްގެ ހަށިގަނޑު ދެނެގަނެވިފައިވާއިރު، ކަށަވަރު ނުވާ އެކެއްގެ ހަށިގަނޑުވާކަމަށް ފުލުހުން ވަނީ ބުނެފައެވެ.
ފުލުހުން މީގެ އިރުކޮޅެއް ކުރިން ބުނެފައިވަނީ އަލިފާނުގެ ހާދިސާގައި ނިޔާވި މީހުންގެ ތެރެއިން އެމީހުންގެ އާއިލާއިން ހަށިގަނޑު ގައުމަށް ގެންދަން ބޭނުންވާ މީހުންގެ ހަށިގަނޑު އެމީހުންގެ ގައުމަށް ގެންދިއުމަށް ކުރަންޖެހޭ މަސައްކަތްތައް ފޮރިން މިނިސްޓްރީއާއި އެޤައުމުގެ އެމްބަސީތަކާއި ގުޅިގެން ފުލުުން ދަނީ ކުރަމުން ކަމަށެވެ.
ހާދިސާގައި ނިޔާވި މީހުންގެ ހަށިގަނޑުތައް ވަރަށް ބޮޑަށް އަނދާފައިވާތީ އެމީހުން ވަކިކުރަން ނޭނގޭ ވަރަށް ސިފަ ގެއްލިފައިވާ ކަމަށް ފުލުހުން ކުރިން ވިދާޅުވެފައިވެއެވެ. ފުލުހުން ވިދާޅުވީ، އެމީހުން ދެނެގަތުމުގެ މަސައްކަތްކުރީ، އާންމުންނަށް ހުޅުވާލައިގެން ލިބުނު މަޢުލޫމާތާއި ފުލުހުން ހެދި ކްރޮސް މެޗްތަކުން ކަމަށެވެ. އެގޮތުން ފުލުހުން އިއްޔެ ވަނީ ބުދަ ދުވަހުގެ ރެއިން ފެށިގެން ވާނުވާ ނޭނގި ގެއްލިފައިވާ ބިދޭސީންގެ މަޢުލޫމާތު ހިއްސާކޮށްދިނުމަށް އެދިވަޑައިގެންފައެވެ.
މިކަމާ ގުޅިގެން ފުލުހުން ވިދާޅުވީ، އެތަނުގައި އަލިފާން ރޯވާން މެދުވެރިވި ސަބަބު އަދި ހޮދިފައި ނުވާ ކަމަށާއި، އެ ތަހުގީގު މިހާރު ވެސް ކުރަމުން އަންނަ ކަމަށެވެ. އެތަން ސާފު ކުރުމުގެ ތެރޭގައި އިއްޔެ އެތަނުން ވަނީ ބޮޑެތި ގޭސް ސިލިންޑަރުތަކެއް ވެސް ހޯދާފައެވެ.
